Nicaragua

Nikaragua, officiääl de Republik Nikaragua (uutspreaken as 'NikaRAgwa'), is wat uppervlak angeyt et grötste land van Middenamerika, med 130.370 km². Nå Kosta Rika un Honduras woanet der de meyste lüde van dee streake; in 2021 warren et der 6.850.540. Nikaragua is nåbers med Honduras in et noorden un Costa Rica in et süden. In et ousten ligt et an de Karibiske Sey. Et hevt ouk seygrensen med El Salvador in et westen un Kolombia in et ousten. De grötste stad van et land is höyvdstad Managua, de up dree nå grötste stad van Middenamerika. In Nikaragua woant mestisen, inheymsken, un lüde med europeaansk un afrikaansk blood döär mekander. De meyste lüde küert der spaansk, mär inheymste stammen an de müggenküste hebbet öäre eygene språke. Ouk engelsk kennet der nen houp un is eyne van de erkende språken van et land, ümdat en deyl van Nikaragua ooit under et Britske Ryk vöäl.

República de Nicaragua (spaansk)
Vlagge van Nicaragua	Woapn van Nicaragua
Kaarte van Nicaragua
Informasie
Sproaken	Spaansk (officiääl) Erkende streakspråken: Engelsk Miskito Rama Sumo Müggenküstkreool Garifuna Ramakaaikreool
Heufdstad	Managua
Regeringsvörm	Republik
Geleuf	84,4% Kristendom 14,7% neet gelöyvig 0,9% wat anders
Laand en inwonners
Oppervlakte - Water	130.375 km² 7,14%
Inwonners - Dichtheid	6.359.689 (2013) 51 inw./km²
Koordinaten	12° 6′ N, 86° 14′ W
Oaverig
Volksleed	Salve a ti, Nicaragua ("Heil an dy, Nicaragua")
Munteenheid	Córdoba (NIO)
Tiedzone	UTC−6 (CST)
Web | Kode | Tel.	.ni | NI | +505

Al van oldsher woanet der verskeidene inheymske amerikanen in Nikaragua. In de 16. eywe wör et inenöämen döär et Spaanske Ryk, wåras et sik twey eywen later in 1821 weader van vrymakeden. De müggenküste hevt ne wat afwykende geskedenisse. Dat wör in de 17. eywe döär de britten koloniseerd un völ under britsk bestüür. In 1860 wör et en autonoom deyl van Nikaragua. Den noordeliken tip wör oaverdraegen an Honduras in 1960. Seyd de unafhangelikheid steyt Nikaragua der politik neet al to steavig vöär, un hevt to maken had med diktators, besetting un geldnoud. Sou ouk in de Nikaraguaanske Revoluty van de sestiger un söaventiger jåren, un den Kontra-oorlog in de jåren tachtig.

Van at der souvöäle kulturen döär mekander woanet is der nen houp verskeidenheid in folklore, koakkünst un skryverye in Nikaragua. Eyne van de bekende skryvers un dichters is Rubén Darío. Et land wördt ouk wal et 'land van mearen un vulkanen' enöömd. In Nikaragua sit et Bosawás biosfeerreservaat, et up eyn nå grötste reagenwold van Amerika. Et unmündige anbud an planten un deers, et warme tropiske klimaat un aktive vulkanen kummet voordan meyr turisten up an. Nikaragua is eyne van de uprichtende landen van de Vereynigde Natys un ouk lid van de Neet-lieerde Beweaging, Bolivaarsk Verbund vöär de Volker van Uns Amerika, un de Gemeynskop van Latynsk Amerikaanske un Karibiske Ståten.