Ardon (lidn)

Ardon
Ардон (ven.)
Ӕрыдон (oset.)

Valdkund	Venäma
Eläjiden lugu (2022)	19,236 ristitud
Pind	29,14 km²
Pämez'	Igor' Hamicev (sügüz'ku 2017—)
Telefonkod	+7−86 732-xx-xxx
Avtokod	15
Aigvö	UTC+3 (MSK+0)

Ardon (ven.: Ардо́н, oset.: Ӕрыдон) om Venäman lidn da lidnankund Pohjoižosetijan — Alanijan Tazovaldkundan keskuzpalan pohjoižes. Se om Ardonan rajonan administrativine keskuz.

Istorii

Eländpunktan aluz om pandud vl 1824 kuti Venäman imperijan varmitez kaičemha ted. Ühtes vodes sijaližed osetinalaižed heimod sirdaškanziba varmitesen seinile. Vl 1838 panihe kozakoiden Ardonskai-stanicad (ven.: станица Ардонская) osetinan eländpunktanno. Žilod ühtištuiba aigan mändes. Ardonskai-stanic sai lidnan statusad vl 1964 nügüdläiženke nimitusenke.

Ardon šingotase šebnän i etilspirtan tegimil.

Geografijan andmused

Lidn sijadase ühtennimižen jogen hural randal (oset.: Æрыдон «äred jogi» 102 km pitte, Terekan hura ližajogi), 418 m keskmäižel korktusel valdmeren pindan päl. Matkad Vladikavkazhasai om 35 km suvipäivnouzmha. Lähembaižed lidnad oma Alagir 18 km suvhe i Digor 12 km päivlaskmha orhal vai avtotedme.

Bekan-žilo (oset.: Бехъан, 189 rist. vl 2022) mülüb lidnankundha Ardonan ližaks. Lidnankundan pind om 165,12 km².

Eläjad

Vn 2010 kaiken Venäman rahvahanlugemižen mödhe eläjiden lugu oli 18 774  ristitud, rajonan koume videndest. Vl 2018 lidnan ristitišt oli 19 412 eläjad, lidnankundan — 19 597 eläjad. Kaikiš suremb lidnan ristitišt oli 19 513 eläjad vl 2016.

Rahvahad (enamba 0,6% vl 2010, ozutadud rahvahudenke): osetinalaižed — 78,1%, venälaižed — 17,8%, armenijalaižed — 1,4%, toižed rahvahad — 2,7%.

Ortodoksižen hristanuskondan kaks' pühäpertid (jumalanpert' i časoun') oma avaitud lidnas. Mugažo Aleksandrovskai missionerine hengeline seminarii radoi vll 1895−1918 (Ardonan hengeline škol vll 1887−1895), vspäi 2006 sauvuz om anttud jumalankodikundale, no ei ole kohetud vodele 2019.

Pohjoižkavkazan agrariž-tehnologine kolledž om lidnan professionaližen opendusen aluzkundaks.

Irdkosketused

• Lidnan tobmuden oficialine sait (ardongorod.ru). (ven.)