ენვერ ხოჯა
.jpg)
.svg){kind=small}
.svg)
ენვერ ხოჯა (ალბ. Enver Hoxha, დ. 16 გჷმათუთა, 1908 — ღ. 11 პირელი, 1985) — ალბანარი კომუნისტი პოლიტიკოსი, ალბანეთიშ ოკათე სოციალისტური რესპუბლიკაშ მადუდე 1944 წანაშე ღურაშახ (1985). რდჷ ალბანეთიშ ხანდაშ პარტიაშ გენერალური მელამოსე, პოლიტბიუროშ მაკათური, ალბანეთიშ დემოკრატიული ფრონტიშ დუდმახვენჯი, ერუანული აკოანჯარაფილი ნძალეფიშ მანჯღვერთარი, ალბანეთიშ 22-ა პრემიერ-მინისტრი 1944-1954 წანეფს, თაშნეშე, შხვადოშხვა ბორჯის რდჷ ალბანეთიშ გალენური საქვარეფიშ დო ალბანეთიშ დუდთხილუაშ მინისტრი.
ხოჯა გურაფულენდჷ ნოღა კორჩაშ ფრანგულ ლიცეუმს დო ტირანაშ ამერიკული ტექნიკური სკოლას. 1930 წანას მიპალუ სახენწჷფო სტიპენდია დო გურაფა გაგინძორჷ საფრანგეთის, მონპელიეშ უნივერსიტეტის. 1934-1936 წანეფს ხოჯა მუშენდჷ ბრიუსელს, ალბანეთიშ საკონსულოს. ართბორჯულო, ხოჯა გურაფულენდჷ იურისპრუდენციას ბრიუსელიშ დუდიშული უნივერსიტეტის. 1936 წანას ალბანეთიშა დირთჷ დო მუშობა ქიდიჭყჷ კორჩაშ ართ-ართი სკოლაშ მაგურაფალო. 1939 წანას ფაშისტური იტალიაშ ჯარეფქ ალბანეთიშა გემშეჭკირეს. ჸათე ბორჯის ალბანეთის დირსხუ ალბანეთიშ ფაშისტური პარტიაქ. ფაშისტური პარტიაშ მაკათურობა ხოჯას ვაკოდჷ, ჸათეშ გეშათ სკოლაშე გადუდიშულეს. უკულ ხოჯაქ მიდართჷ ტირანაშა, სოდეთ თუთუნიშ მაღაზია გონწყუ. ჸათე პერიოდიშე ჯოჯაქ დეხოლჷ კომუნისტეფს. 1941 წანას, იუგოსლავიარი კომუნისტეფიშ ალარინათ, ხოჯაქ ქუდარსხუ ალბანეთიშ კომუნისტური პარტია (პარტიას უკულ გიადჷ ხანდაშ პარტიაშ ჯოხოქ). ხოჯაქ პარტიაშ დინახალე შანულამი პოპულარობა მიპალუ დო გინირთჷ პარტიაშ ცენტრალური კომიტეტიშ მაართა მელამოსეთ (პოსტი უკინებუდჷ ღურაშახ - 1985 წანაშახ). ხოჯას თაშნეშე უკინებუდჷ ერუანული დემოკრატიული ფრონტიშ დუდმახვენჯიშ პოსტი, სოდეთ უმოსო კომუნისტეფი დომინირენდეს. ალბანეთიშ ოკუპაციაშე გადუდიშულებაშ უკულ, ხოჯაქ გინირთჷ ქიანაშ პრემიერ-მინისტრო.
ენვერ ხოჯაშ მართუალაშ ბორჯის, ალბანეთიქ მიოჭირინუ შანულამი ეკონომიკური წჷმოძინეფს. გევითარჷ ინდუსტრიაქ, ოფუტეშ მეურნობაქ, ელექტროფიცირაფილქ იჸუ ქიანაქ რსულას, გეშალჷ ეპიდემიური ლახარეფქ, გიფაჩჷ ჭარუა-კითხირიშ რჩქინაქ. ხოჯაქ დინდარი ფერმერეფს მიდუღჷ დიხეფი, გლეხეფი გემშეჸონჷ კოლექტივეფიშა (კოლექტივიზაცია), გაუქვჷ კერზო დორხველობა, დოკილუ ეკლესიეფი დო მეჩეთეფი, გამათხოზჷ ოპონენტეფს, ბრელი დოჸვილუ, ბრელი ოჭოფუ დო ჯიხას ქუდახუნუ, ბრელი ხოლო ქიანაშე გეგნახორუ.
ხოჯა რდჷ ნაციონალისტი კომუნისტი, ნამუთ მეთხოზუდჷ სტალინიზმიშ პოლიტიკას. სტალინიშ ღურაშ უკულ, ძალამს გეუფრაშჷ ურთიართალაქ სხუნუეთიშ გეჸვენჯი ლიდერი ნიკიტა ხრუშჩოვიწკჷმა. ხოჯაქ პოლიტიკური ორიენტაცია ჩინეთიჸურე გეჭოფუ, მარა მაო ძედუნიშ ღურაშ უკულ, მუჟამსჷთ ჩინეთიქ ბჟადალიშ ქიანეფს დეხოლუნჷ, ხოჯაქ ჩინეთიწკჷმა მეჭყვიდჷ ხოლო ურთიართობეფი.