User:Fungdom/挑釁者

挑釁者係指一啲企圖陷害他人或者引誘他人去作出一啲違法或者不智嘅行為嘅人，以便摧毀他人嘅名譽或者喺法律上控告他人。挑釁者可以係執法機關嘅成員，而行動可以係為咗執行緊命令或者只係出於自己嘅責任感。佢哋嘅對象可以係任何團體，例如和平示威集會，工會，政黨，或者公司等。

一啲大型或者具爭議性嘅集會組織者經常會有指定嘅集會糾察人員，專門嚟阻止挑釁者滲透集會。

歷史

呢種手段自古以來喺世界各地都已經有出現，但係近代相對大規模嘅臥底行動出於十九世紀初嘅法國。喺十九世紀嘅後期，警察針對嘅對象包括工會領袖，呢啲工會領袖就開始對便衣警察產生恐懼。法文稱呢啲警察為agent provocateur，而呢個稱呼亦都隨後喺英文同德文度出現。

普遍定義

挑釁者可以指一啲警察或者特務，故意鼓勵佢哋嘅對象去作出一啲違法行為，然後喺違法嘅過程中搜集證據，以便之後將佢哋繩之於法。

除咗執法人員之外，挑釁者亦都可以指一啲政治組織或者甚至政府。挑釁者會試圖煽動反對派去做一啲冇效甚至有反效果嘅行為，嚟到引起公眾對反對派反感，為對反對派嘅打壓製造籍口。

歷史上喺工會裏面曾經有出現過所謂嘅工會間諜，佢哋嘅目的係去滲透同監視工會，同埋阻撓工會嘅活動，而呢啲間諜亦都有使用到挑釁手段。

挑釁者嘅活動帶嚟不同嘅道德上同法律上嘅問題。喺實行普通法嘅區域中，如果被控告嘅罪行背後嘅動機係主要原於挑釁者嘅話，被告可以引用「釣魚執法」嘅法概念嚟為自己作辯護。

各區域

俄羅斯

俄羅斯沙皇時代出現嘅挑釁者，以針對革命分子嘅行動而臭名遠播，其中著名嘅包括屬於俄羅斯帝國通稱「保衛部」嘅秘密警察Dr. Jacob Zhitomirsky，Yevno Azef，Roman Malinovsky，同Dmitry Bogrov。

蘇聯建立後，蘇聯嘅國家政治保衛局喺1921年至1926年期間發動代號名為「信任」嘅行動(Operation Trust)，設立一個叫做Monarchist Union of Central Russia嘅虛偽反布爾什維克嘅地下組織，成功引誘兩名反政府嘅活躍分子Boris Savinkov同Sidney Reilly返返蘇聯，隨後將兩人拘捕後處決。

美國

美國聯邦調查局嘅反諜計劃（COINTELPRO）曾經委派特務去打扮成活躍分子，然後加入同打亂不同政治組織嘅活動，組織包括三K黨，Student Nonviolent Coordinating Committee，同American Indian Movement。

紐約市警察曾經被指控喺2004年美國共和黨總統提名大會期間發生嘅示威中挑釁示威者。

哥羅拉度州丹佛市警員亦有被涉嫌喺2008年民主黨總統提名大會期間發生嘅示威中採用臥底偵探嚟煽動示威者向警察施暴。

2003年，紐約市發生另一件案件，有一名臥底電單車警員Wojciech Braszczok為咗調查一群電單車手，將自己打扮成電單車手後混入一場電單車集會嘅人群。集會中，一名電單車手畀一名汽車司機Alexian Lien撞到，令群眾憤怒。Braszczok喺影片中被錄到佢打爛司機架車嘅車窗，仲同群眾一齊襲擊司機。Braszczok嘅行為立即被紐約市警察局調查後，連同其他集會人士被起訴，結果被控二級攻擊，脅迫，暴動，同毀壞財物，四項罪名成立，2015年被判入獄兩年。

歐洲

1817年二月，英國佐治四世曾經被襲擊，隨後英國政府用挑釁者嚟搜集證據對付策劃者。

Sir John Retcliffe曾經為普魯士秘密警察擔任過挑釁者角色。

2008年，意大利前任總統同前任內政部長Francesco Cossiga，對於如何對付教師同學生嘅抗議嘅問題上，畀咗當時嘅警察局長咁樣嘅提議：

佢應該好似我做內政部長嗰陣時咁［...］派啲乜都肯做嘅挑釁者去滲入佢哋嘅運動裏面［...] 然後一贏到民意後，打到佢哋出血［...] 仲有打到煽動佢哋嘅先生都出血，尤其是啲先生。當然唔係啲老人家啦，但係啲年輕啲嘅女教師都可以。

法國2010年有另一個例子，當時警察打扮成左翼工會CGT嘅成員後，同示威者互動。

加拿大

2007年八月二十號，喺加拿大魁北克省Montebello鎮舉行嘅北美安全與繁榮伙伴協定會議進行期間有示威抗議，三名混入示威人群中嘅警員畀工會會長Dave Coles揭發。三名警員帶住面罩，全身着住黑杉，其中一名仲拎住舊大石。結果示威組織者要求佢哋離開。

三名警員被揭發後，其他嘅警察同事將佢哋扣上手扣後帶走。最初令到示威者對三人開始產生懷疑嘅都係啲表面證據：佢哋身材高大，衣著相似，仲着住警靴。根據資深社運人士Harsha Walia，最後認出同指出三名臥底警察嘅係其他示威者。

集會後，警方最初否認企圖滲入示威群眾。隨後佢哋承認有三位警員打扮成示威者，不過又否認警員有挑釁群眾或者煽動過暴力。 之後，警方發出法文新聞稿，聲明警察並冇作出挑釁行為或任何違法行為，只係履行緊佢哋維持秩序同治安嘅職責。

2010年喺多倫多舉行嘅G20峰會之際，加拿大皇家騎警（RCMP）拘捕咗五個人，其中兩名係多倫多警察局嘅警員。市級同省級警察（包括多倫多警察局）總共拘捕咗900人，成為加拿大史上最大規模嘅拘捕行動。皇家騎警監警會聲稱，佢哋見唔到有臥底騎警成員或者糾察人員作出任何不適當嘅行為。

互聯網

互聯網已經成為資訊戰嘅理想工具，網上嘅挑釁者經常發放黑色宣傳，嚟到幫助不同國家，集團，同政治組織達成佢哋嘅目的。

睇埋

• 偽旗行動
• 綫人
• 白目

註

• Belyaeva et al. (2007) [1], published by OSCE's Office for Democratic Institutions and Human Rights. Alternative version

出面網頁

• 維基辭典有掛agent provocateur嘅定義

[[Category:執法]] [[Category:間諜]] [[Category:犯罪學]]