བཀྲ་ཤིས་སྒང་རྫོང་། Ι Trashigang Dzong
ངོ་སྤྲོད།
[ཞུན་དག།]
ང་བཅས་རའི་ དཔལ་ལྡན་འབྲུག་པའི་ རྒྱལ་ཁམས་ཀྱི་ཁོངས་གཏོགས་ ཤར་ཕྱོགས་འཁོར་ལོ་རྩིབས་བརྒྱད་ཀྱི་ནང་གསེས་ ཧེ་མའི་ཡིག་ཆ་ཚུ་ནང་ ཝེང་མཁར་ཟེར་སླབ་སྲོལ་ཡོད་མི་དང་། ད་རེས་ནངས་པ་ ཡོངས་གྲགས་ལུ་བཀྲ་ཤིས་སྒང་རྫོང་ཟེར་ ཤར་ཕྱོགས་རྫོང་ཁག་དྲུག་གི་གྲལ་ལས་ རྙིང་ཤོས་དང་ རྩ་ཆེ་ཤོས་ཅིག་ཨིན་མི་གི་སྐོར་ལས་ཞུ་ནི། དེ་ཡང་ དོན་ཚན་དང་འཁྲིལ་ཏེ། དང་པ་ རྫོང་ཟེར་བའི་ མིང་གི་ཐ་སྙད་དང་། གཉིས་པ་ རྫོང་ཁག་དེ་ དཔལ་ལྡན་འབྲུག་པའི་ ཆབ་འོག་ཏུ་བསྡུ་ཚུལ། གསུམ་པ་ རྫོང་བཞེངས་ནིའི་ སྟ་མགོན་མཛད་རིམ་མཛད་ཚུལ་དང་། བཞི་པ་ རྫོང་ཉམས་གསོ་ཞུ་ཚུལ། ལྔ་པ་ རྫོང་གི་མཚན་གནས་དང་། དྲུག་པ་ ད་ལྟོའི་རྫོང་གི་གནས་སྟངས་དང་ ལག་ལེན་བཅས། རྩ་བའི་དོན་ཚན་དྲུག་ལུ་དབྱེ་སྟེ་འབྲི་ནི་ཨིན།
དང་པ། རྫོང་ཟེར་བའི་ཐ་སྙད།
[ཞུན་དག།]རྫོང་ཟེར་བའི་ མིང་གི་ཐ་སྙད་དེ་ཧེ་མའི་དུས་ལུ་ཨིན་པ་ཅིན་ ཆོས་ཉམས་ལེན་འབད་ས་དང་ སྒྲུབ་པ་གནང་སའི་གནས་རྩ་ཆེ་ཏོག་ཏོ་ཚུ་ལུ་ གོ་དོ་ཡོདཔ་དང་། དེ་ཡང་ གུ་རུའི་སྒྲུབ་གནས་ མོན་ཁ་ནི་རིང་རྫོང་། སྟག་ཚང་སེངྒེ་བསམ་གྲུབ་རྫོང་། རྟ་མགོ་ཆོས་དབྱིངས་ཕོ་བྲང་རྫོང་། གླིང་བཞི་བྱ་རྒོད་རྫོང་། ཟེར་མི་མཚན་གནས་ཚུ་ལས་ ཧ་གོ་ཚུགས་པས།
ཨིན་རུང་ ད་ལྟོ་རྫོང་གཞི་དེ་ཚུ་ནང་ ཆོས་སྲིད་ལུགས་གཉིས་ཀྱི་ཕྱག་ལཱ་གནང་སའི་ ལྟེ་བ་ལུ་འགྱུར་མི་དེ། དུས་རབས་ ༡༧ པའི་ནང་ ཞབས་དྲུང་རིན་པོ་ཆེ་མཆོག་ ང་བཅས་རའི་འབྲུག་མི་ཡོངས་ཀྱི་བཀའ་དྲིན་བླ་ན་མེད་པའི་སྐྱབས་མཆོག་ གུ་རུ་རིན་པོ་ཆེ་དང་། རང་གི་སྐུ་གོང་མ་ གཙང་པ་རྒྱ་རས་ཀྱི་ལུང་བསྟན་དང་འཁྲིལ་ ལྗོངས་འདིར་ཞབས་ཀྱིས་བཅག་ཞིནམ་ལས་ཚུར་ དར་ཡོདཔ་སྦེ་ བློ་གསར་དགའ་སྟོན། ( གནམ་ལོ་མེད། ༢༠༡༦ ཤོག་གྲངས་༧༥ ) ནང་ལུ་ བཀོད་དེ་འདུག།
གཉིས་པ། དཔལ་འབྲུག་པའི་ཆབ་འོག་ལུ་ བཙུགས་ཚུལ།
[ཞུན་དག།]བཀྲ་ཤིས་སྒང་རྫོང་ཁག་དེ་ དཔལ་འབྲུག་པའི་མངའ་འོག་ལུ་ བསྡུ་ཚུལ་དེ་ཡང་། དཔལ་འབྲུག་པ་རིན་པོ་ཆེ་ཞབས་དྲུང་ངག་དབང་རྣམ་རྒྱལ་གྱི་རྣམ་ཐར། གནམ་ལོ་མེད། ༡༩༩༩ ཤོག་གྲངས་ ༣༠༨ གྱིས་འབད་བ་ཅིན། ཧེ་མ་ཤར་ཕྱོགས་ཁ་ཐུག་ ལུང་ཕྱོགས་རེ་ལུ་རྒྱལཔོ་རེ་འབད་སྡོད་པའི་སྐབས་ མཁའ་གླིང་རྒྱལཔོ་བདེ་བ་དང་། འབྲུག་རྒྱལ་གཉིས་ས་མཚམས་རྡོ་མཚམས་ཀྱི་སྐོར་ མ་འགྲིགས་པར་ བདེ་སྒྲིག་བཟོ་ནིའི་དོན་ལུ་ བོད་གཞུང་གིས་ མི་སྣ་ལྡིང་དཔོན་ཟེར་མི་དེ་གཏང་སྟེ་ བློ་སླབ་པའི་སྐབས་ མི་སྣ་ལྡིང་དཔོན་གྱིས་ལྷོ་མོན་གྱི་ཁ་ཧ་མ་གོ་བར་ བར་ན་ ལོ་ཙཱ་བ་བཙུགས་ཏེ་ བློ་སླབ་པའི་སྐོར་བཀོད་འདུག།
བློ་གསར་དགའ་སྟོན། གནམ་ལོ་མེད། ཤོག་གྲངས་ ༧༦ གྱིས་འབད་བ་ཅིན། དེ་སྒང་ ལོ་ཙཱ་བ་དེ་ཡང་ འབྲུག་རྒྱལ་གྱི་ཧོངས་ལས་ བོད་འབྲུག་པའི་བླ་མ་ཐུབ་བརྟན་པད་དཀར་གྱི་བུ་རྣམ་སྲས་རྡོ་རྗེ་དང་། མཁའ་གླིང་རྒྱལཔོ་བདེ་བ་གི་ཧོངས་ལས་ རྟ་ཝང་བླ་མ་ཆོས་དབྱིངས་རྒྱ་མཚོ་གཉིས་ཨིནམ་སྦེ་ བཀོད་དེ་འདུག། མ་གཞི་ དེ་བསྒང་ ཁོང་གཉིས་ཆ་རའི་ཁ་ཐུག་ལས་ བདེན་པ་བཟང་ཡོད་རུང་ མོན་པ་དང་བོད་པའི་བར་གྱི་སྐད་ཀྱི་སྒྲ་གདངས་དང་ སྙན་ཚིག་བསྒྱུར་ཐངས་ཀྱི་ཁྱད་པར་ལུ་བརྟེན་ མི་སྣ་ལྡིང་དཔོན་གྱིས་ འབྲུག་རྒྱལ་གྱི་རྒྱབ་བཟུང་མི་ལུ་ མཁའ་གླིང་རྒྱལཔོ་བདེ་བ་ ངལ་མ་རངས་པར་ ནང་འཁྲུགས་ལངས་སྡོདཔ་ད་ བླ་མ་རྣམ་སྲས་རྡོ་རྗེ་ཀུ་རི་ལུང་པར་བརྒྱུད་དེ་ དཀྲོང་གསར་ལུ་འབྱོན།
དཔོན་སློབ་མི་འགྱུར་བརྟན་པ་དང་མཇལ། དཔོན་སློབ་ཀྱིས་བླམ་དང་མཇལ་དགོཔ་འདུག་ཟེར་གསུངས་མི་དང་འཁྲིལ་ཏེ་ སྤུ་ན་ཁ་ལུ་སོང་ཞིན་ན་ བླ་མ་ངག་དབང་རྣམ་རྒྱལ་དང་མཇལ་བའི་སྐབས་ བླ་མ་རྣམ་སྲས་རྡོ་རྗེ་གི་མིག་ཏོ་ཁར་ བླམ་དེ་ འཕགསཔ་སྤྱན་རས་གཟིགས་དང་ དབྱེ་བ་ག་ནི་ཡང་མེདཔ་སྦེ་མཇལཝ་ལས་ སེམས་ལུ་དགའ་བ་སྦོམ་བྱུང་ནུག། དེ་ལས་ཚུར་ བླ་སློབ་གཉིས་ ཐུགས་ཡིད་གཅིག་ཏུ་འདྲེས་ཏེ། སྐྲ་ཕུད་ཕུལ། དཔལ་ལྡན་འབྲུག་པའི་བསྟན་པ་སྤེལ་ནི་ལུ་ འདྲོག་ནི་དང་འཚེར་ནི་མེད་པའི་མཚན་རྣམ་སྲས་རྡོ་རྗེ་ཟེར་གསོལ་གནང་ཡོདཔ་མ་ཚད། རིམ་པ་བཞིན་དུ་ དབང་ལུང་མན་ངག་ཚུ་ ཡོངས་རྫོགས་སྦེ་གནང་ཞིན་ན་ རྡོ་རྗེ་འཛིན་པའི་སར་ བཀྲ་ཤིས་པའི་མངའ་གསོལ་མཛད། སྐུ་གསུང་ཐུགས་ཀྱི་རྟེན་དང་ མཆོད་ཆ་ལ་སོགས་པ་ཚད་མེདཔ་ཅིག་གནང་སྟེ་ ཉི་མ་ཤར་གྱི་ཕྱོགས་ལུ་ ཆོས་ཀྱི་བརྟན་པ་དར་བའི་ ལུང་བསྟན་ཡང་གནང་ནུག།
ཨིན་རུང་ ཡུལ་ཁམས་འདི་ནང་ བཀའ་ཁྲིམས་དྲག་པོའི་སྒོ་ལས་ བཏུལ་མ་ཚུགས་པའི་ ང་རྒྱལ་ཅན་གྱི་དཔོན་ལེ་ཤ་ཡོད་ནི་འདི་གིས་ ཞི་བའི་ཐོག་ལས་ དམ་པའི་ཆོས་ཀྱི་བསྟན་པ་སྤེལ་ནི་དེ་ ག་དེ་སྦེ་འབད་ཚུགས་ག? ཟེར་ཞུ་བའི་སྐབས་ བླ་མ་གིས་ མ་འོངས་པའི་ནང་ ཤར་ཕྱོགས་རྫོང་ཁག་ཚུ་ནང་ ངེའི་ལུགས་གཉིས་ཀྱི་བསྟན་པ་དར་ནིའི་ ལུང་བསྟན་ཡོདཔ་ལས་ བུ་ཁྱོད་བློ་སྟོབས་མ་ཉམས་པར་ ང་གིས་སླབ་མི་དང་འཁྲིལ་ འབད་ཟེར་གསུང་ནུག། དེ་ལས་ བླ་མ་རྣམ་སྲས་ཡང་ འདི་ལུ་ཡིད་ཆེས་སྦོམ་བསྐྱེད། ལུས་གུས་པའི་ ཕྱག་འཚལ་ཞིནམ་ད་ ཀྲོང་གསར་བརྒྱུད་དེ་ ལོག་གཡུས་ཁར་བྱོན་ནུག།
དེ་བསྒང་ བླ་མ་རྣམ་སྲས་དེ་ གཡུས་འདི་ནང་ལས་ འཐོན་འགྱོ་ནི་འདི་གིས་ ལུངཔ་འདི་ནང་གི་མི་ཚུ་ག་ར་ མཁའ་གླིང་རྒྱལཔོ་བདེ་བ་གིས་དབང་ཡོདཔ་ཨིན་རུང་། ཤུལ་ལས་རིམ་གྱིས་འབད་ རྩེང་མི་མཚོ་ལྔ། ཨུ་རྫ་རོང་། རྐང་ལུང་། མཁའ་གླིང་ཕྱི་སྐོར་ནང་སྐོར་གྱི་འབངས་མི་ཚུ་ག་ར་ དཔལ་འབྲུག་པའི་མངའ་འོག་ལུ་ བཙུགས་མི་དང་འབྲེལ་ མཁའ་གླིང་རྒྱལཔོ་བདེ་བ་ཡང་ རང་བཞིན་གྱིས་འཛུལ་དགོཔ་འབྱུང་ནུག།
གསུམ་པ། རྫོང་གསར་བཞེངས་ཀྱི་སྟ་མགོན་མཛད་རིམ།
[ཞུན་དག།]དེ་ལས་ ཡུལ་ཕྱོགས་དེ་ཁར་ དཔལ་འབྲུག་པའི་གདན་ས་ འཕྲལ་ལུ་ཕན་པའི་སྲིད་དང་། ཕུག་ཏུ་ཕན་པའི་ཆོས། ཆོས་སྲིད་ལུགས་གཉིས་འཁོར་ལོ་བསྒྱུར་ཐབས་དང་། ལྷག་པར་དུ་ ཕྱིའི་དགྲ་ཚུ་ལས་བསྲུང་ནིའི་དོན་ལུ་ ས་བཙན་པོ། འདོད་ཡོན་ལོངས་སྤྱོད་ཚུ་ རང་བཞིན་གྱིས་བསྡུ་ཚུགས་པའི་ས་གོ་ཅིག་ ག་ཏེ་ལས་ཐོབ་ག? ཟེར་འཚོལ་བའི་སྐབས་ ཝེང་ཁར་གྱི་[1]རྒྱལ་བློན་འབང་འཁོར་ཚུ་གིས་ ས་གནས་ཝེང་ཁར་འདི་ ས་གོ་ལེགས་ཤོམ་ཅིག་ཨིན། འདི་ཁར་བཞེངས་པ་ཅིན་དྲག་ཟེར་ཞུ་ཞིན་དུ་ བླ་མ་རྣམ་སྲས་ཀྱིས་ གཞུང་ཞབས་ལུ་ སྙན་གསན་ཕབ་པའི་སྐབས་ ཞབས་དྲུང་རིན་པོ་ཆེ་གིས་ མཁརགསུམ་[2]འཛོམས་ས་སྦུག་ལུ་ བཞེངས་པ་ཅིན་ དཔལ་ལྡན་འབྲུག་པའི་བསྟན་པ་ལུ་ ཕན་སྦོམ་ཐོག་ནི་ཨིན་པའི་ ལུང་བསྟན་གནང་ཡོད་མ་ཚད། སྤྱི་བླ་མི་འགྱུར་བསྟན་པའི་བཀའ་བཞིན་དུ་ སྤྱི་ལོ་ ༡༦༤༦ ལུ་ རྫོང་ཆུང་ཀུ་ཅིག་བཞེངས་ཏེ་ བླ་མ་རྣམ་སྲས་ཁོ་ར་ མཁའ་གླིང་རི་ཟོར་ཟེར་སར་ བྱོན་བཞུགས་ནུག།
དེ་ནང་ཡུན་མ་རིངམ་གཅིག་ཁར་ ད་རུང་ བོད་དམག་ལེན་ཐེངས་གཉིས་པ་རྐྱབ་དགོཔ་འབྱུང་མི་དང་འཁྲིལ་ དམག་རྐྱབ་པར་འགྱོ་བའི་སྐབས་ བླ་མ་རྣམ་སྲས་བོད་དམག་གིས་འཁྱིད་དེ་ ལྷ་སར་བཙོན་ནང་བཙུགས་ཡོདཔ་མ་ཚད། དེ་ཁ་ལས་མར་ འབྱོག་འོངམ་ཨིན་ཟེར་ ལམ་བར་ན་ལྷོདཔ་ད་ བོད་དམག་གིས་དཀྲོངས་ཡོདཔ་ཨིན་པས།
བཞི་པ། རྫོང་ཉམས་གསོ་ཞུ་བའི་སྐོར།
[ཞུན་དག།]བློ་གསར་དགའ་སྟོན། གནམ་ལོ་མེད། ཤོག་གྲངས་ ༨༠ གྱིས་ནང་འབད་བ་ཅིན། དེ་ལས་དབུ་མཛད་ཀྱིས་ ཀྲོང་གསར་ཕྱོགས་ལུ་བྱོན། ཆོས་རྒྱལ་མི་འགྱུར་བརྟན་པ་ལུ་གནས་ཚུལ་ཚུ་ཞུ་བའི་སྐབས་ དཔོན་སློབ་ཀྱིས་ ཧེ་མ་ ང་གིས་སླབ་དོ་བཟུམ་ རྫོང་ས་ཝེང་མཁར་ལུ་བཟུང་པ་ཅིན་ དཀྲིག་ཀྲི་སོང་ཡི། ཨ་ཙི་འཛོལ་སོང་ནུག། ད་ ག་དེ་སྦེ་འབད་བ། ཨིན་རུང་ བླ་མའི་བཀའ་ཨིནམ་ལས་ དོ་རུང་ ཚར་གཅིག་འགོ་བཙུགས་ད་ཟེར་ བཀའ་གནངམ་བཞིན་དུ་ དབུ་མཛད་དམ་ཆོས་རབ་རྒྱས་དང་། སྐུ་དྲུང་པད་དཀར་ཆོས་འཕེལ་གཉིས་ཀྱིས་ ཝེང་ཁར་ལུ་ཡོད་པའི་ ཧེ་མའི་རྫོང་ཆུང་རྙིངམོ་དེ་ རྩ་བ་ལས་ར་བཤིག་ཞིན་ན། ཤར་ཕྱོགས་ཁ་ཐུག་ སྐྱིད་གླིང་དགྲ་འདུལ་རྫོང་། ལྷོ་ཕྱོགས་ཁ་ཐུག་ མཐོང་མཁར་ལྟ་རྫོང་། ནུབ་ཕྱོགས་ཁ་ཐུག་ སྒོ་སྲུང་ཕུད་པ་རྫོང་། བྱང་ཕྱོགས་ཁ་ཐུག་ རྫོང་སྨད་རྟ་ར་རྫོང་ཚུ་གི་སྐོར་བའི་སྦུག་ནང་ལུ་ དཔལ་ལྡན་འབྲུག་པ་ཕྱོགས་ལས་རྣམ་པར་རྒྱལ་བའི་ཕོ་བྲང་དེ་ སྤྱི་ལོ་ ༡༦༥༩ ལུའམ་ རབ་བྱུང་ ༡༡ པའི་ས་ཕག་ལོ་ལུ་ བཞེངས་གནང་ནུག།
ལྔ་པ། རྫོང་གི་མཚན་གནས།
[ཞུན་དག།]རྫོང་གི་མཚན་གནས་ བཀྲ་ཤིས་སྒང་རྫོང་ཟེར་གསོལ་དགོ་པའི་ ར་ཁུངས་དེ་ཡང་། རྫོང་གཞི་ཕྱོགས་སྡེབས།(གནམ་ལོ་མེད། ༢༠༠༦ ཤོག་གྲངས་ ༡༥༩) ནང་ལུ་ ཤར་ཕྱོགས་འཁོར་ལོ་རྩིབས་བརྒྱད་ཆ་མཉམ་དཔལ་འབྲུག་པའི་ མངའ་འོག་ལུ་བསྡུ་བའི་ རྟགས་དང་རྟེན་འབྲེལ་ལུ་དམིགས་ཏེ་ གསོལ་ཡོདཔ་སྦེ་བཀོད་དེ་འདུག།
དྲུག་པ། རྫོང་གི་གནས་སྟངས།
[ཞུན་དག།]
ད་ལྟོ་ མཇལ་སྲོལ་ཡོད་མི་རྫོང་དེ་ སྤྱི་ལོ་ ༡༩༣༦ མེ་བྱི་ལོ་ལུ་ཧེ་མའི་རྫོང་རྙིངམོ་གི་ཤིང་ཆས་ཚུ་མེདཔ་ཐལ་མི་དང་། ལོ་ངོ་ལེ་ཤ་སོང་ཡོད་མི་ལུ་བརྟེན་ཏེ་ རྫོང་དཔོན་ཕྲིན་ལས་སྟོབས་རྒྱས་ ཡོངས་གྲགས་ལུ་ སྲས་རྡོ་པོ་ལ་ཟེར་ཞུ་མི་གིས་ འབྲུག་གི་རྒྱལ་རབས་གཉིས་པ་ ༧ དཔལ་འཇིགས་མེད་རྡོ་རྗེ་དབང་ཕྱུག་མཆོག་ལུ་ སྙན་གསན་ཕབ་སྟེ་ བཀའ་གནངམ་ཞིན་དུ་ རྩ་བ་ལས་བཤིག་སྟེ་ ཉམས་གསོ་ཞུ་ཡོདཔ་སྦེ་བློ་གསར་དགའ་སྟོན། (གནམ་ལོ་མེད། ༢༠༡༦ ཤོག་གྲངས་ ༨༢) ནང་བཀོད་དེ་འདུག།
ད་རེས་ རྫོང་དེ་ བཟོ་དབྱིབས་གྲུ་བཞི་འབད་ཞིན་ན། ཐོག་ལྔ་སྦེ་མཇལ་ཚུགསཔ་མ་ཚད། རྫོང་གི་ཐོག་རེ་རེ་ནང་ ལག་ལེན་མ་འདྲཝ་རེ་འདུག། དེ་ཡང་། བླ་མའི་ལྷ་ཁང་། ཚེས་བཅུ་ལྷ་ཁང་། གྲུབ་ཐོབ་ལྷ་ཁང་། མགོན་ཁང་། ཀུན་ར་ལྷ་ཁང་འབད་ཡོདཔ་དང་། དབུ་རྩེའི་མདུན་ཕྱོགས་ལུ་ བླ་རྒྱུད་ཚོགས་ཞིང་། སྒྲོལ་མ་ལྷ་ཁང་། དྲག་ཤོས་རྫོང་བདག་གི་ཡིག་ཚང་། རྫོང་ཁག་བདག་སྐྱོང་གི་ཡིག་ཚང་གཞན། དབུ་རྩེའི་གཡས་ཕྱོགས་ལུ་ བླམ་གནས་བརྟན་གྱི་གཟིམ་ཅུང་དང་། གུ་རུ་ལྷ་ཁང་། གཡས་གཡོན་གཉིས་ལུ་ དགེ་སློང་ཚུ་གི་གྲྭ་ཤག་དང་། ལས་ཁུངས་ཁག་གི་ཡིག་ཚང་སྦེ་འདུག།
མཇུག་སྡུད།
[ཞུན་དག།]ད་རེས་ནངས་པ་ རྒེད་འོག་ ༡༥ གི་ཕྱག་ལཱ་གནང་སའི་ལྟེ་བ་ བཀྲ་ཤིས་སྒང་ངམ་ ཧེ་མ་ཝེང་ཁར་ཟེར་ཞུ་སྲོལ་ཡོད་མི་ ས་གནས་ཁར་ ཆགས་ཏེ་ཡོད་པའི་ རྫོང་ཆེན་འདི་ ལྷོ་ཁ་ཐུག་ལས་མཇལཝ་ད་ གསེར་གྱི་མནྜལ་ནང་ལུ་ གཡུའི་ཚོམ་བུ་ སྤུང་སྤུངམ་བཟུམ་དང་། ནུབ་ཁ་ཐུག་ལས་མཇལཝ་ད་ ནོརབུ་དགོས་འདོད་དཔུང་འཇོམ་ ཁ་ཡར་གཏད་དེ་ སྡོད་སྡོདཔ་བཟུམ། བྱང་ཁ་ཐུག་ལས་མཇལཝ་ད་ གླང་པོ་ཆེ་ཉལ་སྡོད་སྡོདཔ་བཟུམ་དང་། ལྕགས་ཟམ་ལས་ ཁ་ཡར་ལྟག་མཇལཝ་ད་ གནམ་ཁ་ལུ་ ད་ལྟོ་ར་ ཕུར་འགྱོ་སག་ས་སྦེ་མཇལ་ནི་ཡོད་མི་དང་། གཡང་རྩེ་ལས་ཁོ་ལོང་ཆུ་དང་། མོན་རྟ་ཝང་ལས་ གྲངས་མེད་ཆུ་གཉིས་འབབས་ཏེ་ དུས་ཉིན་མཚན་མེད་པར་ མཆོད་པའི་ཡུལ་ལུ་ འགྱུར་ཡོད་མི་དེ་ བཀྲ་ཤིས་སྒང་རྫོང་ཆེན་དེ་ཨིན།
༼རྩོམ་ཡིག་འདི་སྲོལ་འཛིན་དང་རྫོང་ཁ་གོང་འཕེལ་ལས་ཁུངས་ཀྱི་སྐད་ཡིག་ཞིབ་འཚོལ་དང་ལས་རིམ་སྡེ་ཚན་གྱི་ཞལ་འདེབས།༽
རྒྱབ་རྟེན་དཔེ་ཐོ།
[ཞུན་དག།]༡༽ བློ་གསར་དགའ་སྟོན། གནམ་ལོ་མེད། ༢༠༡༦ ཤོག་གྲངས་ ༧༦-༨༥ ཚུན། པར་སྐྲུན་པའི་ཁ་གསལ་མིན་འདུག།
༢༽ ཤར་རྫོང་གནམ་གྱི་འཁོར་ལོ། ཞིབ་འཚོལ་གོ་རིམ་ ༤ པ། གནམ་ལོ་མེད། ༢༠༠༩ ཤོག་གྲངས་༩༡ ། འབྲུག་རྒྱལ་ཡོངས་འགྲེམས་སྟོན་ཁང་། སྤ་རོ།
༣༽ ཞབས་དྲུང་རིན་པོ་ཆེ་ངག་དབང་རྣམ་རྒྱལ་གྱི་རྣམ་ཐར།གནམ་ལོ་མེད། ༡༩༩༩ ཤོག་གྲངས་ ༣༠༨ རྫོང་ཁ་གོང་འཕེལ་ལྷན་ཚོགས།
༤༽ རྫོང་གཞི་ཕྱོགས་སྡེབས།(གནམ་ལོ་མེད། ༢༠༠༦ ཤོག་གྲངས་ ༡༥༩) མེ་གྷ་ཚོང་ལས་ཁང་། འབྲུག་ཐིམ་ཕུག།
[1]རྒྱལཔོ། ལྷ་སྲས་གཙང་མ་འི་གདུང་བརྒྱུད་ལས་རིམ་པར་མཆེད་པའི་ ཝང་སེང་ཀུང་མའི་བུ་བརྒྱུད་ཐོས་པ་ཟེར་མིའི་ བུ་བརྒྱུད་རྒྱལ་པོ་གསེར་གདུང་།
[2]༡༽ རང་གཤིས་མཁར། ༢༽ བསམ་མཁར། ༣༽ སྦི་མཁར།