Kedang/ Kdang/ Kedang(茴香菖蒲)　

Manu ka hngaran kedang ni o snekxan sluun baga bi slmaxan hndaan usik qapang huling uri, mskudus bi hnkkawas mniq sasaw qcilus bling tasil bi dherang qnabin klbus. Hmaan dha babaw sraq bi lxan dherang, malu bi sknexan ka pnhmaan dherang. smkuxun bi hmru babaw qsiya bi rucaw qcilus bi langu tasil pngpung.

　　Saw ka kedang ni psprun bi mangan spawda kbusan nhmuk gaya bi emptsapuh knan, ngaran bi skdusan sknexan uqan jiyax rseejiq nii. Smiyus seejiq bi baran emptsapuh snpual ngaran dha psapuh, dngaan dha spawda kklgan narux bi sqaya da hii kiya sa psraman naqih utux.

　　Emptsapuh spawda na smalu nalux rhengak, gmlih nalux bgihur, pumalu sahu pshmaan, pklmu hiraw ssiyaq. ngaran dha smalu pngpang utux bi sghbun qbubur sunan uri, mkuni tunux utux, mkric rpun utux, mlikan qbubur bi narux buyas, qcilus slaq wilig, puru qaqay, nalux balung, mlubu hii; malu uri o pkmalu ini kklay nalux dahun. manu uri o spawda kana iyu niya lumau utux kmkan, ida na psqduriq naqih utux bi pskbiyax qbubur hii rseejiq.

kdang(茴香菖蒲)

kdang sunca pa hay kiya ka sspriq diyun bay Sediq muda smapuh pkmalu mnarux tunux mi snbuyas cbiyaw. Cbiyaw pa ita Sediq minjoku hay kdang ni u phman ta ssiyaw sapah ni, so hriqan qsiya ka dxral kiya, kiya da mi mosa mrranan nanak hiya ka kdang kiya da. Rmngaw ka rudan, shuma ssiyaw sapah ka kdang pa kiya ka ini yahi smdalih quyu ka sapah da, alaw ini skuxul sknexan kdang ka quyu, kiya ka ini sdlihi quyu ka nniqan kdang. Kdang ni u kiya ka sspriq diyun balay Sediq minjoku pkmalu mnarux knxalan kndusan Sediq minjoku. Spoda bnatas patas mi wangru saya hay, kdang ni pa malu ngalan so iyu pkmalu mnarux, pusu bay klmun na mnarux hay: Ptalang hngak so ini pknarux, pqduriq mskuy, ptalax doku, psbalay siyaq hiraw ptrawah lhbun. Sduwi ini trawah lnglungan, ptrawah so ini mkhmuya ka sediq, tkray thmuk ka rupun, thmuk brah mi snbuyas, mhduq mnarux mpuru mi mnarux pungu qaqay, mnarux so mbba hiyi.

Muda smmalu srwaun waru ka Sediq cida pa, dmuwi wamil kdang mi qmuru kdang smalu srwaun waru, kiya u meyluq cida ka qmuru kdang mi wamil kdang han hay, dmuwi snuyuk nuqah mi, lhun ka meyluq qmuru kdang mi wamil kdang, kiya mi rhqun ka rhiq na meyluq qmuru kdang mi meyluq wamail kdang, mnhdu lmihu qmuru kdang mi lmihu wamil kdang da u, hdaun hidaw ka lnhuwan meyluq qmuru kdang mi lnhuwan meyluq wamil kdang da, mdngu ka lnhuwan qmuru kdang mi lnhuwan wamil kdang da hay, kiya ka mosa so mbtraw bay mi mniq balay ka lnhuwan kdang da, kiya u ini qnaqah ka kdang srnuwan waru ni da, kiya ka malu srwanun waru ka kdang ni uri da.Kiya ka wowaya bay Sediq minjoku peyyah pnsltudan cbiyaw ka ni.

Kiya mi smiru waru kdang ka msapuh, so niqan mnarux tunux mi mnarux snbuyas ka sediq alang hay, msapuh u sdurun na brah Utux Tmninun ka sediq marux, mnhdu dmurun da u qclun na tikuh kdang snrwaun na waru ka sediq mnnarux tunux mi mnarux snbuyas, kiya mi spkan na sediq mnarux tunux mi mnarux snbuyas kiya, so kiya hari daw, wada asi kmalu ka sediq mnnarux tunux mi mnnarux snbuyas da.So bay so sklwiyun bay ka ndan ni, spoda tdhu snhiyan dmurun smapuh klmun Utux Tmninun ka sediq mnarux tunux mi sediq mnarux snbuyas, kiya u malu so kdang ni pqdalun na qnclan kdang ka sediq mnarux tunux mi sediq mnarux snbuyas, wada nanaq ka narux na sediq mnarux tunux mi snbuyas da.

Alaw uka ising ka sediq rudan cbiyaw, mnarux ka sediq alang cida pa, dsun dha msapuh hiya ka sediq mnarux tunux mi sediq snbuyas, spoda so ni pnltudan pkmalu mnarux tunux mi snbuyas ka rudan cbiyaw. Niqan uri ka sediq so qrapun bwihur naqah mi utux naqah pa,musa ming msapuh uri, so mosa klmun mi ptbalay ka lhbun na mi msblayaq. Mntna so kiya uri ka ndan na msapuh muda pkmalu mnarux mi pqduriq bwihur naqah mi utux naqah, pwela bay han u, muda tdhu snhiyan dmurun Utux Tmninun han mi, so mosa klmun Utux Tmninun ka sediq wada qrapun bwihur naqah mi utux naqah, mnhdu dmurun da u, muda qmcun tikuh kdang ka msapuh mi spkan na sediq wada qrapun bwihur naqah mi utux naqah kiya,mnekan kdang ka sediq kiya ka, wada klmun mi wada ptrawah ka lhbun niya uri da.

Snhiyi balay Utux Tmninun ka Sediq minjoku, manu so kiya hay, muda pkmalu mnarux sediq mi pqduriq bwihur naqah mi pqduriq utux naqah ka msapuh cida pa, ana mapuh mi ana sediq mnarux uri hay, asi ka dmuwi tdhu bay snhiyan dmurun sntama biyax Utux Tmninun muda pkmalu mnarux sediq, kiya u spoda kdang spkan mnarux sediq, so mosa malu ka mnarux sediq. Nasi so ini tdhu snhiyan muda dmurun ka sediq cida, uxay nanaq asi klmuwi ka mnarux sediq uri. Kiya u ya mntna so iyu niqan biyax na pkmalu mnarux sediq ka kdang, kiya mi pusu bay biyax niqan biyax pkmalu mnarux sediq ka Utux Tmninun, kiya ka pusa bay biyax spoda kdang pkmalu mnarux pa kiya ka Utux Tmninun uri, so kiya hay, asi ka dmuwi tdhu bay