Naomi van As
Naomi Frances van As De Haach, 26 july 1983) is in earder Nederlânsk hockeyspylster fan mingd Nederlânsk, Yndonezysk en Sineesk etnysk komôf, dy't trije kear meidie oan 'e Olympyske Simmerspullen en twa kear ta it Olympysk kampioensteam hearde. Yn totaal spile hja 229 ynterlânwedstriden foar it Nederlânske frouljushockeyteam, en makke hja dêrby 45 in doelpunten. Nei't Van As yn 2017 in ein makke oan har sportkarriêre, begûn se in nij wurkpaad as presintatrise op 'e Nederlânske tillefyzje. Se is ek bekend as de freondinne fan 'e Fryske hurdrider Sven Kramer.
Naomi van As | ||
![]() | ||
![]() | ||
Naomi van As (2009) | ||
persoanlike bysûnderheden | ||
echte namme | Naomi Frances van As | |
bynamme | Bami | |
nasjonaliteit | ![]() | |
bertedatum | 26 july 1983 | |
berteplak | De Haach | |
etnisiteit | ![]() ![]() ![]() | |
lingte | 1.79 m | |
gewicht | 64 kg | |
sportive ynformaasje | ||
sport | hockey | |
O.S. | Peking 2008 Londen 2012 Rio de Janeiro 2016 | |
debút | 2003 | |
karriêre-ein | 2017 | |
wichtige prestaasjes | ||
![]() ![]() ![]() ![]() ![]() ![]() |
Libben en karriêre
bewurkje seksjeJonkheid en oplieding
bewurkje seksjeVan As waard yn 1983 berne yn De Haach. Oer har komôf sei se yn in fraachpetear: "myn iene beppe is Sineesk en myn oare beppe is in lyts bytsje Yndysk".[1] De Sineeske beppe makke diel út fan 'e Sineeske minderheid yn Yndoneezje en kaam út in woltierich maatskiplik fermidden, folle se letter yn itselde fraachpetear oan. Nei de Twadde Wrâldoarloch wiene beide beppes nei Nederlân ta kommen.[1]
Omreden fan har Yndysk komôf krige Van As letter as hockeyspylster de bynamme 'Bami' (fan it Sineesk-Yndyske gerjocht bamy). Se spile doe yn in team mei in spylster dy't Noëmi hiet, en doe waard troch de oare leden fan it team betocht dat 'Noami' op 'bamy' rymt, dat sadwaande. Dat guon minsken sa'n bynamme rasistysk fine, sa't de ynterviewer har fertelde, woe har suver net oan.[1]
Van As trochrûn it basisûnderwiis oan 'e Montessoriskoalle Waalsdorp en it middelber ûnderwiis oan it Aloysius Kolleezje, beiden yn De Haach. Dêrnei folge se in HBO-oplieding ta mûlhygiêniste oan 'e Hegeskoalle fan Utert, dy't se lykwols net ôfmakke.
Sportkarriêre
bewurkje seksjeAs hockeyster begûn Van As mei seis jier yn 1989 by hockeyklub HMHC yn De Haach. Letter ûntjoech se har ta profesjoneel hockeyspylster by HDM, foar't se yn it seizoen 2001-2002 oerstapte nei stedsgenoat HC Klein Zwitserland. Yn juny 2010 feroare se op 'e nij fan klub, diskear om oer te stappen nei de Goaiske klub LMHC út Laren. It grutste part fan har karriêre hie Van As de funksje fan oanfalster, hoewol't se by LMHC op it middenfjild opsteld waard.
Van As stie bekend om har grutte manûvrearberheid, keppele oan in ferfine technyk en in ûnfoarsisbere faasje. Yn it seizoen 2004-2005 waard se troch de treners fan alle haadklasseklubs keazen ta bêste spylster yn 'e Rabo Haadklasse. Yn 2006 waard se troch de Ynternasjonale Hockey Federaasje (FIH) nominearre foar de titel Worldhockey Young Player of the Year. Yn it seizoen 2006-2007 waard se beneamd ta op ien nei bêste spylster yn 'e Rabo Haadklasse, en yn 2009 waard se troch de FIH útroppen ta bêste spylster fan 'e wrâld, in priis dy't se diele moast mei de Argentynse Luciana Aymar, dy't likefolle stimmen krige. Yn febrewaris 2017 waard Van As troch de FIH jitris útroppen ta bêste spylster fan 'e wrâld foar it jier 2016.
Ynternasjonaal makke Van As har debút as oanfalster doe't se op 20 juny 2003 ynfoel yn it duël tusken Nederlân en Súd-Afrika (0-3) op it seislannetoernoai yn Busan, yn Súd-Koreä. Dêr makke ek har klubgenoate Leonoor Voskamp foar it earst har opwachting yn in ynternasjonale wedstryd.
Van As die trije kear mei oan 'e Olympyske Simmerspullen as lid fan it Nederlânske nasjonale frouljushockeyteam: op 'e Spullen fan Peking, yn 2008, coacht troch Marc Lammers, op 'e Spullen fan Londen, yn 2012, coacht troch Max Caldas, en op 'e Spullen fan Rio de Janeiro, yn 2016, coacht troch Alyson Annan. Yn Peking wûnen Van As en de oare Nederlânske hockeysters de finale fan gastlân Sina en wûnen sa de gouden medalje. Van As sels tekene dêrby foar it iepeningsdoelpunt. Yn Londen wisten Van As-en-dy de Olympyske titel te prologearjen yn 'e finale tsjin Argentynje, dat krektlyk as Sina fjouwer jier earder mei in skoare fan 2-0 ferslein waard. Yn Rio de Janeiro ferlear it Nederlânske team de finale lykwols nei shoot-outs (3-3; 2-0) fan it Britske frouljushockeyteam.
Fierders wûn Van As mei it Nederlânske frouljusteam trije kear in gouden medalje yn 'e striid om 'e Champion's Trophy, twa kear in sulveren medalje en fiif kear in brûnzen medalje. Yn 2013 wûnen se de Hockey World League. Op it Jeropeesk kampioenskip behellen se yn 2005, 2009 en 2011 in earste plak en yn 2007 en 2015 in twadde plak. En op it wrâldkampioenskip wûnen se yn 2006 en 2014 it earste plak en yn 2010 it twadde plak. Nei it beheljen fan 'e wrâldtitel fan 2014 waard oan Van As de Stedspeinje fan De Haach útrikt. Nei ôfrin fan 'e Olympyske Spullen fan Rio de Janeiro, yn 2016, stoppe Van As mei hockey te spyljen yn ynternasjonaal ferbân. Se gie noch in skoftke troch mei klubhockey foar de LMHC yn Laren, oant se yn 2017 hielendal ophold.
Tillefyzjekarriêre
bewurkje seksjeYn 2012 wie Naomi van As ien fan 'e dielnimmers oan it realitytillefyzjeprogramma Strictly Come Dancing. Mei har dûnspartner Remi Janssen einige se dêrby op it fjirde plak. Nei ôfrin fan har aktive sportkarriêre sette Van As útein mei in nij wurkpaad as presintatrise. Yn 2017 begûn se yn dy funksje by it programma Zappsport, fan 'e AVRO-TROS. Tegearre mei in oare âld-hockeyster, har eardere teamgenoate Ellen Hoog, makke se foar SBS6 it tillefyzjeprogramma 24 Uur Mandekking, wêryn't eltse ôflevering in oare manlike bekende Nederlanner in etmiel lang folge waard. Yn 'e earste ôflevering gie it dêrby om André Hazes jr., en yn folgjende ôfleverings om bgl. Johnny de Mol, Jandino Asporaat en Gerard Joling. Neffens sifers fan 'e Stichting Kijkonderzoek waard de earste ôflevering út 'e searje sjoen troch 665.000 minsken.
Priveelibben
bewurkje seksjeYn desimber 2007 kaam Van As yn 'e kunde mei de Fryske hurdrider Sven Kramer. Op it Sportgala fan dat jier rekke se aardich boppe har teewetter, dat dyselde jûns noch folge de earste tút. De fonk sloech oer, en sûnt 15 febrewaris 2018, kwealk twa moanne letter, hawwe de beide sporters offisjeel in leafdesrelaasje. Op 'e fraach wat se yn Kramer seach, antwurde Van As yn in ynterview: "Hy hat leuke eagen en in boevekop. Mar ik fyn it fral leuk dat er sa dreaun is."[1] Sûnt de simmer fan 2016 wenje se yn Amstelfean. mei him hat van As in dochter en in soan.
Earelist
bewurkje seksje- Champion's Trophy 2004 te Rosario (Argentynje)
- EK hockey 2005 te Dublin (Ierlân)
- Champion's Trophy 2005 te Canberra (Austraalje)
- Champion's Trophy 2006 te Amstelfean (Nederlân)
- WK hockey 2006 te Madrid (Spanje)
- Champion's Trophy 2007 te Quilmes (Argentynje)
- EK hockey 2007 te Manchester (Ingelân)
- Champion's Trophy 2008 te Mönchengladbach (Dútslân)
- Olympyske Simmerspullen 2008 te Peking (Sina)
- Champion's Trophy 2009 te Sydney (Austraalje)
- EK hockey 2009 te Amstelfean (Nederlân)
- Champion's Trophy 2010 te Nottingham (Ingelân)
- WK hockey 2010 te Rosario (Argentynje)
- EK hockey 2011 te Mönchengladbach (Dútslân)
- Champion's Trophy 2012 te Rosario (Argentynje)
- Olympyske Simmerspullen 2012 te Londen (Ingelân)
- Hockey World League 2013 te San Miguel de Tucumán (Argentynje)
- WK hockey 2014 te De Haach (Nederlân)
- Champion's Trophy 2014 te Mendoza (Argentynje)
- EK hockey 2015 te Londen (Ingelân)
- Champion's Trophy 2016 te Londen (Ingelân)
- Olympyske Simmerspullen 2016 te Rio de Janeiro (Brazylje)
Boarnen, noaten en/as referinsjes: | ||
|