Joseph Pulitzer
Joseph Pulitzer | |
---|---|
![]() | |
Gebore | Jószef Pulitzer 10 April 1847 Makó, Oostenryk-Hongarye |
Sterf | 29 Oktober 1911 |
Nasionaliteit | Verenigde State |
Beroep | Verslaggewer, koerantuitgewer, advokaat, filantroop |
Bekend vir | Kampvegter teen groot maatskappye en korrupsie, new journalism, Pulitzerpryse |
Politieke party | Demokratiese Party |
Eggenoot | Katherine "Kate" Davis (1878-1911) |
Kinders | Ralph, Joseph II, Constance, Edith, Herbert, Lucille |
Handtekening | |
![]() |
Joseph Pulitzer [ˈpʊlɨtsər] (10 April 1847 - 29 Oktober 1911), gebore as Jószef Pulitzer, was 'n Hongaars-Amerikaanse Joodse verslaggewer, koerantuitgewer, advokaat en filantroop. Vandag staan hy veral bekend vir die Pulitzerpryse wat jaarliks vir prestasies in joernalistiek, fotografie, letterkunde, geskiedenis, digkuns, musiek en drama toegeken word. Die pryse word befonds uit finansiële middele wat Pulitzer aan die Columbia-universiteit bemaak het, net soos die Columbia School of Journalism wat hy in die lewe geroep het.
As dagbladuitgewer word Pulitzer verbind met die skryftegnieke van new journalism wat hy in die 1880's in sy koerante ingevoer het. In die volgende dekade was daar sterk mededinging tussen Pulitzer se World en William Randolph Hearst se New York Journal wat albei persmagnate na die praktyke van geel joernalistiek laat neig het om hul dagblaaie meer aantreklik vir die breë publiek te maak. So is die weg gebaan vir koerante met massasirkulasie wat hoofsaaklik op inkomste uit advertensies aangewese was en met hul verskeidenheid nuusvorme, vermaak en advertensies by die leserspubliek gewild geraak het.
Pulitzer het aktief aan die politieke lewe deelgeneem. As lid van die Demokratiese Party het hy nasionale bekendheid verwerf, onder meer met sy veldtog teen groot maatskappye en korrupsie, en is as kongreslid vir New York verkies.