Kiedrich
Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Kiedrich | |
---|---|
Dorp | |
![]() Kiedrich, soos gesien vanuit die bergpiek Sonnenberg in Eltville am Rhein | |
![]() Ligging in die deelstaat Hesse | |
Koördinate: 50°02′N 08°05′O / 50.033°N 8.083°O | |
Land | ![]() |
Deelstaat | Hesse |
Administratiewe streek | Darmstadt |
Administratiewe distrik | Rheingau-Taunus-Kreis |
Eerste verwysing | 10de eeu |
Regering | |
• Burgemeester | Winfried Steinmacher (SPD) |
Oppervlak | |
• Totaal | 12,35 km2 (4,77 vk. myl) |
Hoogte | 165 m (541 ft) |
Bevolking | |
• Totaal | 3 910[1] |
• Digtheid | 316/km2 (820/vk. myl) |
Tydsone | UTC+1:00 (MET) |
• Somertyd | UTC+2:00 (MEST) |
Poskode | 65399 |
Skakelkodes | 06123 |
Webwerf | www.kiedrich.de |
Kiedrich is 'n nedersetting temidde van 'n wynboustreek in die administratiewe distrik Rheingau-Taunus-Kreis van die Duitse deelstaat Hesse.
Vanweë sy goed bewaarde middeleeuse boukuns word na die dorp dikwels verwys as 'n "skatkissie van Gotiese boukuns".[2] Ook in die Rooms-Katolieke bedevaartskerk St. Valentinus, wat uit die 14de eeu dateer, het die Gotiese interieur volledig bewaar gebly, waaronder 'n kerkorrel van omstreeks 1500 wat steeds bespeel word.
'n Besondere aantreklikheid is kerkdienste op Sondae waartydens die plaaslike seunskoor, die Kiedricher Chorbuben, 'n rariteit aanbied, Latynse Gregoriaanse gesange in die Germaanse dialek met hoefnaelnotasie. Dié streeksvariant van Gregoriaanse gesange is in Lotaringiese (Metz) en Duitse manuskripte oorgelewer.
Interessant genoeg het 'n Engelse adellike, Sir John Sutton, 3de Baronet of Norwood Park (1820-1873), 'n boorling van Lincolnshire, as borg 'n beslissende rol by die bewaring van Kiedrich se kulturele erfenis gespeel. Sutton, 'n deskundige vir Gotiese boukuns en orrelbou, het vanaf 1854 op die Europese vasteland gebly en in België en Duitsland gewoon. Een jaar later het hy die Rooms-Katolieke geloof aangeneem.
In 1857 het hy vir die eerste keer 'n besoek aan Kiedrich gebring en vervolgens die dorp se orrel en Gotiese kerkgebou laat restoureer. Daarnaas het hy fondse beskikbaar gestel vir die bewaring van Kiedrich se unieke variant van Gregoriaanse gesange. 101 jaar ná sy afsterwe in Brugge, België is sy sterflike oorskot in Kiedrich in 'n eregraf herbegrawe.
Ander besienswaardighede sluit Kiedrich se Renaissance-raadsaal en talle historiese geboue in wat oorspronklik deur burgers en adellikes bewoon is. Die bouvalle van die Scharfenstein-kasteel, wat temidde van wingerde geleë is, bied 'n uitsig oor die dorp en sy omgewing.
Verwysings
[wysig | wysig bron]- ↑ Statistik Hessen: Bevölkerung der hessischen Gemeinden. Besoek op 1 April 2015
- ↑ Andreas Schimkus (red.): ADAC-Reiseführer Deutschland. München: ADAC/Wolfgang Kunth 2010, bl. 155