Chudería

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Mapa de Zaragoza con a suya chudería.

Edificio en a Chudería de Mont Albán (Mont Albán, Cuencas Meneras).

A ilesia d'a Consolación de Calatayú, que se debanta dencima de l'antiga sinoga d'a chudería de Calatayú.

Chudería ye o nombre con que se conoixe a una parte d'una ciudat u lugar a on nomás que i viviban habitants chodigos. Gosaban estar lugars zarratos en sí mesmos, que no teneban so que un u dos puestos ta relacionar-se con a ciudat de que en feban parte y que se gosaban zarrar dezaga d'una puerta mientres a nueit. Son bella traza d'equivalent en os territorios de l'antiga Corona d'Aragón as institucions que en o sieglo XIX se conoixeban como guetos. Gosaban tener una sinoga ta poder fer-ie as suyas ceremonias relichiosas, mesmo que un fosal fuera d'o nuclio urbán a on apedacaban a os suyos difuntos.

Os chodigos que i viviban gosaban pagar os suyos impuestos dreitament a la Corona y no pas a os concellos de que en feban parte, encara que a ormino a Corona en arrendaba la percepción d'as rendas d'as chuderías.

As chuderías apareixioron en a Edat Meya como resultau d'una concepción d'a sociedat segregada en entidataz etnico-relichiosas, y d'as succesivas cochunturas historicas de mayor o menor tolerancia relichiosa u de persecución (pogromos). A segregación espacial respondeba tanto a la discriminación practicada por as comunidades mayoritarias (de relichión cristiana u musulmana) como a o deseyo por parti d'as comunidaz chodigas de mantener a suya identidat.

Dimpués de 1096 s'obligó a os chodigos de Praga a concentrar-se en un barrio amurallau, como consecuencia d'a esferra de chodigos a mans d'os cruzaus que se n'iban enta a Primera Cruzada. A peste de 1348 incrementó os ataques antichodigos por toda Europa (Narbona, Carcasona, Saboya, Basilea) y con ellos as midas de segregación.

Tanto en Al-Ándalus como en los reinos cristianos peninsulars os chodigos s'estableixioron en comunidaz diferenciadas, que teneba personalidat churidica y fiscal propia (alchamas), estasen u no deseparadas espacialment. En Catalunya y Mallorca se deciban calls. Dimpués d'as revueltas antichodigas de 1391, as conversions masivas orichinoron l'aparición d'a comunidat de conversos u cristianos nuevos, que no deixoron d'estar discriminaus tanto social como legalment. Con l'obchecto d'amugar o contacto entre conversos y chodigos s'incrementoron as midas d'aislamiento d'os chodigos. A suya dispersión fació que s'establisen comunidaz sefarditas en a-saber-las ciudaz d'Europa y o Mediterranio.

O papa Pablo IV creyó a primera chudería legal en Roma en l'anyo 1555. Chuderías semellants fuoron creyadas en a mayoría d'os países d'Europa mientres os tres sieglos siguients. Gosaban estar rodiadas por murallas y as suyas puertas se zarraban de nueiz. En muitos casos os chodigos yeran obligaus a levar un identificativo cuan saliban difuera d'o suyo recinto. L'abolición d'iste sistema se creyó a radiz d'a Revolución Francesa y d'os movimientos liberals d'o sieglo XIX. En 1870 a chudería de Roma, a zaguera legal que quedaba en Europa, fue abolida por Víctor Manuel II, rei d'Italia. Mientres a Segunda Guerra Mundial en Alemania y en os países ocupaus por os nazis se persiguió a las comunidades chodigas d'Europa y posteriorment se les segregó y aisló en a-saber-los guetos (denominación derivada d'a palabra italiana ghetto; emplegada orichinalment en referencia a la chudería de Venecia, en 1516).

Chuderías d'Aragón

As radices chodigas en Aragón se funden en o periodo tardorromano y visigodo, estando important a suya presencia en a val d'Ebro mientres a dominación musulmana d'a taifa de Saraqusta, encara que incrementando-se con a conquiesta cristiana y a creyación d'o nuevo Reino d'Aragón, en que bi heba una estructura pluriconfesional emparada en o Dreito Foral aragonés. Asinas una vegada asentada a estructura institucional, alto u baixo en o sieglo XIII bi heba mas d'un centenar d'asentamientos chodigos en tot o Reino, encara que no toz d'establioron como comunidaz fixas ni permaneixioron mientres toda a edat meya. A mayoría yeran basallos d'a Corona, encara que bi'n heba tamién que yeran dependients de sinyorías eclesiasticas, nobiliarias u militars.

Seguntes l'ambito lingüistico tamién se conoixeban como call, chudaría, hebreísmo, chudaísmo u alchama. En Aragón gosaban trobar-sen en espacios albandonaus por a comunidat musulmana dimpués d'a conquiesta cristiana chunto a os centros de poder politico u relichioso, como castiellos u ilesias. Iste puesto no yera trigau por éls mesmos normalment, sino que ye designau por o rei.

Encara que no existioron leis segregacionistas dica o sieglo XV, as chuderías yeran por un regular zarradas con murallas pa deseparar-las d'a resta d'a población. Bi heba manimenos eixemplos de localidaz como Epila, Mallén, Illueca, Luesia u Luna a on os chodigos viviban mezclaus con os atros vecins, encara que en barrios u zonas concretas.

En muitos d'istos lugars se conservan encara a distribución d'as carreras d'as antigas chuderías, asinas como en bels casos toponimia urbana que remera a suya presencia como Sinagoga (en Luesia y Mallén), Barrio Verde (en Biel y Alagón), Barrio Nuevo (en Uncastiello, Daroca, Taust y Luesia) u Judería (en Almonecir, Aguarón y Tarazona).

Bibliografía

• (es) Guía de las juderías de Aragón. Un apasionante recorrido por el Aragón judío. Miguel Ángel Motis Dolader. Guías Turísticas Prames. ISBN 978-84-8321-357-5

• Datos: Q9016264
• Multimedia: Jewish quarters / Q9016264