Finlandeses
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Finlandeses Suomalaiset | ||||||||||||||||||
---|---|---|---|---|---|---|---|---|---|---|---|---|---|---|---|---|---|---|
![]() | ||||||||||||||||||
| ||||||||||||||||||
![]() | ||||||||||||||||||
| ||||||||||||||||||
Finlandés y sueco | ||||||||||||||||||
Cristianismo |
Os finlandeses u fineses[2] (en finés Suomalaiset) habitan Finlandia, on son a mayoría d'a población con 4.500.000 millons d'individuos. Parlan una luenga uralica d'a branca finesa, son cristianos luteranos y la mayoría se dedica a l'agricultura y industria fustera.
Historia
[editar | modificar o codigo]Os antipasaus d'os finlandeses plegoron a la costa baltica dende a cuenca d'a Volga y troboron pueblos indoeuropeus d'a branca balta. Se suposa que cuan plegoron yeran cazataires-recolectors, con importancia d'a pesca fluvial. O nombre de finlandeses provién d'o etnonimo fenni, d'un pueblo mencionato por Tacito en o sieglo I y que poderban estar os lapons y no referir-se a los antipasaus d'as comunidaz que huei dicimos finlandesas. En o sieglo VIII yeran estandillando-sen enta o norte por as actuals Finlandia y Carelia, y se i dividioron en cuatre grupos, que desplazoron a los lapons enta o norte:
- Kvans u hamalaiset a l'este d'o Golfo de Botnia.
- Tavastes u hamalaiset en o districto d'os lagos.
- Varsianis u suomalaiset en o sudueste de Finlandia.
- Carelians u karjalaiset en os arredols d'os lagos Ladoga y Onega.
As incursions d'os finlandeses contra os suecos facioron que os suecos encomenzasen una "cruzata" contra os finlandeses animistas-xamanistas. Con a conquiesta os suecos introducioron o cristianismo en l'actual Finlandia y entre os sieglos XIII y XVIII i ninvioron colons.
En os sieglos XV y XVI os finlandeses ixamploron a suya aria d'asentamiento enta o norte empentando a los lapons. Con ixa expansión finlandesa tamién s'estendilló o feudalismo. En 1600 os suecos habioron d'esclafar una revuelta campesina dita "revuelta d'as estacas" y introducioron una clase dirichent luterana. En o sieglo XVIII a influencia sueca s'enfeblió. En as guerras napoleonicas Rusia invadió Finlandia, que fue anexionata en 1809.
L'administración rusa organizó Finlandia como Gran Ducau[3] y estió respectuosa con as institucions y privilechios de fineses y suecos. Manimenos amaneixió un nacionalismo finlandés en o sieglo XIX a lo tiempo que encomenzó una rusificación forzata. En 1917 Finlandia declaró a suya independencia.
Dimpués d'a primera Guerra Mundial Finlandia perdió parte de Carelia a mans d'a Unión Sovietica. Dimpués d'o pacto secreto chermano-sovietico de 1939 (Pacto Ribbentrop-Molotov) os sovieticos obligoron a los finlandeses a ceder-lis atra part de Carelia, encomenzando la Guerra d'Hibierno (1939-1940), que remató con a derrota de Finlandia y importants perdas territorials y economicas (itsmo de Viborg, costa septentrional d'o Lago Ladoga[4], Salla y unas islas d'o Golfo de Finlandia). D'esta traza Finlandia alinió con o III Reich cuan Alemania crebó l'anterior pacto. Como castigo por aliniar-se con l'eixe dimpués d'a segunda Guerra Mundial Finlandia encara habió de ceder mes territorios (Petsamo), devez que os finlandeses u carelians d'o itsmo de Viborg fuoron forachitaus. Dende 1917 Finlandia heba perdito o 10 % d'o suyo territorio y fue obligata a absorber a 500.000 refuchiatos carelians.
A reforma agraria y a industrialización, que encomenzoron a fer-se pa pagar as deudas de guerra a la Unión Sovietica han permitito a Finlandia desembolicar una sociedat capitalista con component socialdemocrata con un alto livel de vida.
Referencias
[editar | modificar o codigo]- ↑ (es) Nacidos en el extranjero, residentes en Aragón en 2021. Instituto Aragonés de Estadística
- ↑ (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.
- ↑ (es) Felipe Fernández-Armesto: Los hijos de Zeus. Pueblos, etnias y culturas de Europa. 1996 Grijalbo, p 390.
- ↑ (es) André Sellier, Jean Sellier: Atlas de los pueblos de Europa Central. Acento editorial, p 54.
Bibliografía
[editar | modificar o codigo]- (es) Amiram Gonen, Diccionario de los pueblos del mundo. 1996 Anaya&Mario Muchnik.