Reino de Sobrarbe

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Ta atros emplegos se veiga Sobrarbe (desambigación)

O Reino de Sobrarbe estió un mitico reino altoaragonés con capital en a villa de l'Aínsa.

Historia[editar | modificar o codigo]

Se diz que yeran os cristianos aragoneses reunitos en a Espelunga de Galión, en l'actual puesto d'o Monesterio de Sant Chuan d'a Penya dimpués d'a invasión d'a Peninsula Iberica por os musulmans. Decidioron formar un exercito ta luitar contra o invasor y esleir d'entre éls a un que haberba de dirichir-los. Asinas entre toz trigoron a García Ximéniz con o títol de rei en l'anyo 724.

Tan y mientres os musulmans ya s'heban establito en a vecina ciudat de Chaca y yeran un buen numero, por o que pareixeba prou dificil que o chicot exercito de cristianos podese prener a ciudat con exito. Asinas que s'enfiloron ta l'Aínsa que yera mas chicota y bi heba menos musulmans. Cuan i plegoron, l'asitioron y la prenioron, dimpués se-i facioron torres y atras construccions esfensivas ta evitar un nuevo ataque d'os moros que ya yera inminent. Cuan as tropas musulmanas atacoron l'Aínsa yeran cuatro vegatas mas numerosas que as cristianas. A fin d'o rei García y o suyo exercito y a victoria d'os infiels ya se devinaba cuan amaneixió en o cielo una cruz roya dencima d'una carrasca sobre un fondo d'oro. Os cristianos entrepitoron o feito como que Dios yera con éls y luitoron con totas as suyas fuerzas, os musulmans fuyiban espantatos por a visión, anque mui pocos salioron con vida d'ixa batalla.

O rei García agradeixito dió beneficios a la espelunga de Galión que dende allora se decirba Sant Chuan d'a Penya, en honor a Sant Chuan Baptista y que sería o panteón suyo y d'os suyos descendients, os reis d'ixe territorio que dende l'inte se conoixerba como Sobrarbe (Sobre + Arbe).