Rusiya son vaxtlar kiberhücumlar və miqrantlardan istifadə ilə NATO üzvlərinə qarşı düşmənçilik hərəkətlərini artırıb.
APA xəbər verir ki, bunu NATO Baş katibi Yens Stoltenberq alyansın müdafiə nazirlərinin iclasından sonra mətbuat konfransında deyib.
"Bu gün nazirlər Rusiyanın bu hərəkətlərinə qarşı müttəfiqlərin fərdi və ya kollektiv şəkildə cavab verməsi barədə razılığa gəldilər. Bura kəşfiyyat məlumatlarının mübadiləsinin artırılması, kritik infrastrukturun, o cümlədən dəniz və kiberməkanın müdafiəsinin gücləndirilməsi və Rusiya kəşfiyyatının əməkdaşlarına əlavə məhdudiyyətlər daxildir", - Baş katib bildirib.
O vurğulayıb ki, alyans istənilən düşmənçilik hərəkətlərinə qarşı özünü müdafiə edəcək.