Black Sabbath
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
Black Sabbath ye una banda británica d'Heavy metal formada en 1968 en Birmingham por Tony Iommi (guitarra), Ozzy Osbourne (voz), Geezer Butler (baxu) y Bill Ward (batería).
Black Sabbath | |
---|---|
![]() | |
![]() | |
Datos | |
Tipu | grupu de heavy metal |
Miembros | Ozzy Osbourne, Tony Iommi, Geezer Butler, Bill Ward y Ronnie James Dio |
Xéneru |
heavy metal, heavy metal tradicional, doom metal (es) ![]() |
Sellu discográficu |
Vertigo Mercury Records Virgin EMI Records Universal Music Group Warner Bros. Records I.R.S. Records (es) ![]() Sanctuary Records Warner Music Group |
País |
![]() |
Orixinarios de | Birmingham, Inglaterra |
Fecha fundación | 1968 |
Fecha disolución | 2017 |
Web oficial | |
![]() |
De magar, la banda sufrió ensame de cambeos de formación, con más de venticinco antiguos miembros. Formaos orixinalmente como una banda de Blues rock llamada nun principiu Polka Tulk y darréu, Earth, l'agrupación incorporó lletres sobre ocultismu y terror con guitarres afinaes de manera más grave, camudando'l so nome por Black Sabbath, y consiguiendo dellos discos d'oru y platino na década de 1970.
Al ser una de les primeres y más influyentes bandes d'Heavy metal de tolos tiempos, Black Sabbath ayudó a desenvolver el xéneru con publicaciones tales como Paranoid (1970), álbum que foi cuatro veces discu de platín. El grupu vendió más de quince millones de copies namái nos Estaos Xuníos.
Primeres producciones discográfiques
editarBlack Sabbath fichó pa la Philips Records n'avientu de 1969 y publicó'l so primer senciellu, «Evil Woman», en xineru de 1970, al traviés de Fontana Records, subsidiaria de Philips. Los posteriores discus saldríen pola nueva compañía de rock progresivu creada por Philips, Vertigo Records. Anque'l senciellu nun entró en nenguna llista de ventes, la banda consiguió dos díes nun estudiu pa grabar el so primer álbum col productor Rodger Bain. Iommi recuerda grabar en direutu: «Pensamos: "Tenemos dos díes pa faelo y unu d'ellos ye p'amiestos". Asina que grabamos en direutu. Ozzy taba cantando coles mesmes, namái lo asitiamos nuna cabina estreme y llanzámonos al asuntu. Nunca tuvimos una segunda ronda de la mayoría del material».
Black Sabbath, l'álbum debú de la banda, salió al mercáu'l vienres 13 de febreru de 1970. Algamó l'octavu puestu nel UK Albums Chart y, tres la so publicación n'Estaos Xuníos en mayu de 1970, algamó'l ventitrés nel Billboard 200, onde permaneció mientres más d'un añu. El discu foi un ésitu comercial pero foi duramente criticáu pelos medios; dende entós foi certificáu como discu de platín n'Estaos Xuníos y nel Reinu Xuníu.
Black Sabbath publicó'l so segundu álbum, Paranoid, n'ochobre de 1970, l'álbum esguiló hasta'l númberu unu nel Reinu Xuníu. L'ésitu de Paranoid dexó a la banda realizar la primer xira polos Estaos Xuníos n'avientu de 1970, lo que provocó la publicación del segundu senciellu, «Iron Man». Anque nun consiguió entrar nel top cuarenta, «Iron Man» permanez como unu de los cantares más populares de la banda, y ye el senciellu que más altu llegó nes llistes estauxunidenses hasta «Psycho Man» en 1998.
En febreru de 1971, Black Sabbath tornó al estudiu pa empezar a grabar el so tercer álbum. Tres l'ésitu de Paranoid, la banda consiguió más tiempu n'estudiu según «un maletu llenu de dineru», que los miembros utilizaron pa mercar drogues. «Tábamos metíos na coca, enforma», esplicó Ward. «Estimulantes, tranquilizantes, quaaludes, lo que fuera. Llegó al puntu de que teníes idees pero dempués se te escaecíen, porque tabes bien fuera de ti».
En xunetu de 1971 publicóse Master of Reality, namái seis meses dempués del llanzamientu de Paranoid. L'álbum algamó'l top diez tantu nel Reinu Xuníu como nos Estaos Xuníos. En xunu de 1972, la banda axuntóse en Los Angeles pa empezar a trabayar nel so siguiente LP nos estudios Record Plant. El procesu de grabación tuvo llaráu de problemes, na so mayoría debíos al abusu de sustancies. Mientres trataba de grabar el cantar «Cornucopia» dempués de sentase metanes el cuartu tomando drogues», Bill Ward tuvo a puntu de ser despidíu de la banda.
Black Sabbath Vol.4 publicóse en setiembre de 1972, y anque les crítiques siguíen siendo negatives, llegó al discu d'oru en menos d'un mes, y foi'l cuartu álbum consecutivu n'algamar el millón de copies vendíes nos Estaos Xuníos. El cantar «Tomorrow's Dream» foi editáu como un senciellu (el primeru dende Paranoid) pero nun consiguió entrar nes llistes de popularidá. Tres una estensa xira polos Estaos Xuníos, la banda visitó per primer vegada Australia y, de siguío, pasó pola Europa continental.
Pa la siguiente placa optaron por arrendar el castiellu Clearwell nel Monte de Dean, Inglaterra. «Ensayábamos nos cuartones y yera abondo espeluznante pero tenía daqué d'atmósfera, remembraba coses, y el material empezó a salir otra vegada». Mientres trabayaben nos cuartones, Iommi atopó col riff principal de «Sabbath Bloody Sabbath», que dio'l tonu pal nuevu material. Grabáu nos Morgan Studios de Londres por Mike Butcher ya inspirándose nos cambeos introducíos en Vol.4, los nuevos cantares incorporaben sintetizadores, cuerdes y arreglos complexos. El teclista de Yes, Rick Wakeman, collaboró como músicu de sesión nel cantar «Sabbra Cadabra».
En payares de 1973, Black Sabbath publicó Sabbath Bloody Sabbath, discu que foi aclamáu pola crítica. N'efeutu, per primer vegada na so carrera, la banda empezó a recibir crítiques positives de la prensa musical xeneralista.
La banda empezó una xira mundial en xineru de 1974 que remató nel festival "California Jam", ante 200.000 persones, al pie d'otres bandes como Emerson, Lake & Palmer, Deep Purple, Earth, Wind & Fire y Eagles. Parte d'esti conciertu foi emitíu pola cadena ABC n'Estaos Xuníos, dando a conocer a la banda ante una mayor audiencia.
Segunda metá de los 70 y llegada de Dio
editarBlack Sabbath empezó a trabayar nel so sestu álbum en febreru de 1975, nos Morgan Studios de Willesden, Inglaterra, con un nuevu representante, Don Arden, y con una clara intención de camudar el soníu de Sabbath Bloody Sabbath. «Podíamos siguir y siguir y siguir, volviéndonos más téunicos, usando orquestes y tou eso que particularmente nun queríamos. Miramos a nós mesmos y quixímos faer un discu de rock; Sabbath Bloody Sabbath nun yera un discu de rock, realmente». Producíu por Black Sabbath y Mike Butcher, Sabotage salió al mercáu en xunetu de 1975. De nuevu, l'álbum recibió crítiques positives y algamó'l top venti tantu nos Estaos Xuníos como nel Reinu Xuníu, pero foi'l primer álbum que nun consiguió'l discu de platín n'Estaos Xuníos, llegando namái al discu d'oru.
Anque l'únicu senciellu del álbum, «Am I Going Insane (Radio)», nun consiguió entrar nes llistes d'ésitos, Sabotage contién cantares clásicos como «Hole in the Sky» y «Symptom of the Universe». Black Sabbath realizaron una xira mundial con Kiss, pero viéronse forzaos a dexala en payares de 1975 tres un accidente de moto nel que Osbourne mancóse'l llombu. N'avientu la compañía discográfica de la banda publicó un álbum recopilatorio de grandes ésitos ensin consulta-y lo a la banda, tituláu We Sold Our Soul for Rock 'n' Roll. El discu vendió dos millones de copies nos Estaos Xuníos.
Technical Ecstasy, publicáu'l 25 de setiembre de 1976, foi recibíu con crítiques atopaes, y per primer vegada nun consiguió meyores crítiques a midida que pasaba'l tiempu. L'álbum contién el cantar «Dirty Women», un fixu nos conciertos del grupu, y la primer apaición como vocalista principal de Bill Ward nel cantar «It's Alright». La xira de promoción del álbum empezó en payares de 1976, teniendo de teloneros a Boston y Ted Nugent nos Estaos Xuníos y a AC/DC n'Europa, onde remató n'abril de 1977.
Tres esto la banda pasó cinco meses nos Sounds Interchange Studios de Toronto, Canadá, escribiendo y grabando lo qu'acabaría siendo Never Say Die!. «Llevónos abondo tiempu», dixo Iommi. «Tábamos drogando enforma, fumando montones de porros. Díbamos a les sesiones pero teníamos que dinos porque tábamos demasiáu drogaos, teníamos que parar. Naide faía nada bien, tábamos esvalixaos, tol mundu tocando daqué distintu. Teníamos que volver y folgar, ya intentalo a otru día». L'álbum foi publicáu en setiembre de 1978, esguilando hasta'l númberu 12 nel Reinu Xuníu y el 69 nos Estaos Xuníos. Les crítiques nun fueron bones y, de nuevu, tampoco lo fueron col pasu del tiempu. L'álbum produció los senciellos «Never Say Die» y «Hard Road», que llegaron al top cuarenta nel Reinu Xuníu, ente que la banda fixo la so segunda apaición nel Top of the Pops tocando'l cantar «Never Say Die».
Dempués de la xira, Black Sabbath tornó a Los Angeles y de nuevu los miembros arrendaron una casa en Bel Air, onde pasaron cuasi un añu trabayando en material nuevo pa otru álbum. Por causa de la presión per parte de la compañía discográfica y la falta d'idees d'Ozzy Osbourne, Iommi tomó la decisión de despidir a Osbourne en 1979.
Sharon Arden, la fía del representante Don Arden y futura esposa d'Ozzy Osbourne, propunxo al antiguu vocalista de Rainbow, Ronnie James Dio, como reemplazu d'Ozzy en 1979. Dio xunióse oficialmente en xunu, y la banda empezó a escribir el so nuevu discu. El baxista Geezer Butler dexó la banda temporalmente en setiembre de 1979, y foi reemplazáu en principiu por Geoff Nicholls de Quartz. La nueva alliniación entró nos Criteria Studios en payares pa empezar la grabación del álbum. Dos meses dempués, Butler tornó a la banda y Nicholls encargóse del tecláu. Producíu por Martin Birch, Heaven and Hell foi publicáu'l 25 d'abril de 1980 con bones crítiques. Black Sabbath realizó la so xira polos Estaos Xuníos, titulada Black and Blue, con Blue Öyster Cult como teloneros. Mientres la xira se filmó un conciertu en Uniondale, Nueva York, que s'estrenó en cines en 1981 col títulu de Black and Blue. El 26 de xunetu de 1980 la banda actuó ante 75.000 persones nel Los Angeles Memorial Coliseum con Journey, Cheap Trick y Molly Hatchet.
Mientres la xira, l'antigua discográfica de Black Sabbath n'Inglaterra publicó, ensin beneficiu pal grupu, un discu en direutu grabáu diba siete años, llamáu Live at Last, qu'algamó'l quintu puestu nes llistes britániques. Esti álbum favoreció la reedición del senciellu «Paranoid», qu'algamó'l top venti. El 18 d'agostu de 1980, tres un conciertu en Minneapolis, Bill Ward foi despidíu de la banda. «Nun toleraba'l fechu de xubir al escenariu ensin Ozzy», dixo Ward. «Yera un borrachu increíble, taba borrachu les venticuatro hores del día. Cuando entraba n'escena, l'escenariu nun yera tan brillosu. Sentía que me taba morriendo per dientro. L'espectáculu paecía vacíu, Ron taba ende delantre faciendo les sos coses y yo dixi "acabóse". Gústame Ronnie, pero musicalmente él nun yera lo mío».
Esmolecíu pol estáu de salú de Ward, Iommi traxo a Vinny Appice ensin informar a Ward. «Nun me lo dixeron, echáronme de la siella y nun me lo dixeron. Sabía que tendríen que traer a otra batería pa salvar la xira, pero tuviera na banda mientres años y años, desque yéramos mochachos. Y entós Vinny taba tocando y yera como: "¿Qué diablos pasa?" Dolió enforma». La banda acabó la xira Heaven and Hell en febreru de 1981, y tornó al estudiu pa componer la so siguiente obra.
El segundu álbum de Black Sabbath en ser producíu por Martin Birch y en tener como vocalista a Ronnie James Dio, Mob Rules, salió al mercáu n'ochobre de 1981, siendo bien recibíu pol públicu, pero non tan bien pola crítica. La banda, insatisfecha cola calidá de Live at Last, decidió grabar otru álbum en direutu (Live Evil) mientres la xira mundial en promoción de Mob Rules en ciudaes como Dallas, San Antonio y Seattle en 1982.
Mientres el procesu de producción del álbum, Iommi y Butler tuvieron un discutiniu con Dio. Iommi y Butler acusaron al vocalista de colase de nueche nel estudiu y xubir el volume de les sos pistes vocales nel amiestu. Amás, Dio nun taba satisfechu coles fotografíes que se tomaren d'él y qu'apaecíen nel diseñu del álbum. Ronnie James Dio dexó Black Sabbath en payares de 1982 pa empezar la so propia banda, Dio, y llevóse a Vinny Apice con él. Live Evil vio la lluz n'avientu de 1982, pero foi asombráu por Speak of the Devil d'Ozzy Osbourne, un álbum en direutu certificáu como discu de platín, que contién namái cantares de Black Sabbath, y que fuera publicáu cinco meses antes.
Los 80, Ian Gillan y Tony Martin
editarCon namái dos miembros orixinales restantes, Tony Iommi y Geezer Butler empezaron a faer audiciones pal futuru álbum de la banda. Dempués de dellos intentos fallíos con David Coverdale de Whitesnake, Nicky Moore de Samson y John Sloman de Lone Star, la banda finalmente decidióse pol vocalista de Deep Purple, Ian Gillan, pa reemplazar a Ronnie James Dio en 1983.
Anque la primer idea yera que'l proyeutu nun se llamara Black Sabbath, les presiones de la compañía discográfica forzaron a la banda a caltener el nome. Black Sabbath entró en The Manor Studio de Shipton-on-Cherwell, Oxfordshire, Inglaterra, en xunu de 1983, con Bill Ward de vuelta y sobriu nel so puestu de batería. El nuevu álbum, Born Again algamó'l puestu númberu cuatro nes llistes britániques y el puestu númberu 39 nes d'Estaos Xuníos. Aun así, cuasi una década dempués del so llanzamientu, el críticu d'Allmusic Eduardo Rivadavia calificó l'álbum de «espantible», añadiendo que «l'estilu blues de Gillan y les lletres humorístiques yeren totalmente incompatibles colos señores de les clarixes».
La xira pa promocionar Born Again incluyía un xigantescu monumentu megalíticu similar a Stonehenge como parte de la escenografía, pero los constructores cometieron un grave error nes midíes del megalitu, que resultaba ridículamente grande sobre l'escenariu, fechu que sirvió pa una escena paródica nel falsu documental This Is Spinal Tap. Dempués de completar la xira de Born Again en marzu de 1984, el vocalista Ian Gillan abandonó Black Sabbath pa volver con Deep Purple.
Depués d'un periodu de receso, Tony Iommi grabó lo que sería Seventh Star, el so primer álbum en solitariu col vocalista Glenn Hughes, pero la discográfica negóse a llanzalo como un álbum en solitariu d'Iommi, aportunando n'usar nuevamente'l nome de Black Sabbath. Primíos pol representante de la banda, Don Arden, dambos decidieron llanzar l'álbum como «Black Sabbath featuring Tony Iommi» en xineru de 1986. «Realmente foi metese en camisa d'once vares», esplicó Iommi, «porque creo que si lo pudimos llanzar como un álbum en solitariu, tendría muncha meyor aceptación». Seventh Star, que sonaba pocu a álbum de Black Sabbath, incorporaba más elementos de "AOR" popularizaos pola escena Soft metal de Sunset Strip de los años 1980, y foi criticáu polos periodistes musicales de la dómina, anque reseñes posteriores como la d'Allmusic fueron positives, diciendo del álbum que yera «de cutiu incomprendido y subestimado».
«Yo taba metíu nel "Tony Iommi project", pero nun taba sol paragües de Black Sabbath», dixo Hughes. «La idea de formar parte de Black Sabbath nun diba conmigo de nenguna de les maneres. Glenn Hughes cantando en Black Sabbath ye como James Brown cantando en Metallica. Nun diba funcionar».
Namái cuatro díes enantes del empiezu de la xira, el cantante Glenn Hughes metióse nuna engarradiella de chigre col mánager de producción John Downing, quien -y astilló el güesu orbital. La mancadura interfería na habilidá d'Hugues pa cantar, polo que la banda escoyó a Ray Gillen pa la xira con W.A.S.P. y Anthrax, anque cuasi la metá de les feches d'Estaos Xuníos fueron atayaes poles escasa venta d'entraes.
The Eternal Idol, siguiente álbum col nuevu vocalista Tony Martin lanzóse el 8 d'avientu de 1987, siendo ignoráu polos críticos del momentu. Debíu al fracasu comercial d'Eternal Idol, Vertigo Records y Warner Bros Records (compañía de la banda en Estaos Xuníos) terminaron contratu con Black Sabbath. La banda tomó un descansu hasta 1988, volviendo n'agostu pa trabayar nel so siguiente álbum. Por cuenta de los problemes de producción d'Eternal Idol, Tony Iommi optó por producir l'álbum él mesmu. «Yera un empiezu dafechu nuevu», Iommi dixo. «Tenía que repensalo tou, y decidí que precisábamos reconstruyir la nuesa credibilidá un pocu». Iommi reclutó a la batería a Cozy Powell (ex Rainbow), al teclista Geoff Nicholls y al baxista de sesión Laurence Cottle, y arrendó un «estudiu bien baratu d'Inglaterra».
N'abril de 1989 Black Sabbath llanzó Headless Cross por IRS, la so nueva compañía, LP nuevamente ignoráu polos críticos de la dómina. L'álbum llegó al puestu númberu trenta y ún de la llista d'álbumes británica. N'Estaos Xuníos llegó al puestu númberu 115 de la llista del Billboard.
El guitarrista de Queen, Brian May, amigu d'Iommi, interpretó como artista convidáu un solu pal cantar «When Death Calls». La malograda xira estauxunidense d'Headless Cross empezó en mayu de 1989 con Kingdom Come y Silent Rage como teloneros pero, por cuenta de la escasa venta d'entraes, foi atayada tres solu ocho conciertos. La xira europea empezó en setiembre, nun momentu en que la banda taba esfrutando con ésitos nes llistes. Dempués d'una serie de conciertos en Xapón, la banda embarcóse nuna xira de 23 conciertos en la Xunión Soviética con Girlschool. Black Sabbath foi una de les primeres bandes en faer xira per esti país, dempués de que Mikhail Gorbachov abriera les fronteres p'actuaciones d'artistes occidentales.
La banda volvió al estudiu en febreru de 1990 pa grabar Tyr, la continuación d'Headless Cross. Anque téunicamente nun ye un álbum conceptual, dalgunos de les temes de les lletres tán basaes, en términos xenerales, na mitoloxía nórdica. Tyr foi llanzáu'l 6 d'agostu de 1990, llegando al puestu númberu 24 na llista d'álbumes británica, anque foi'l primer álbum de Black Sabbath que nun entró nel Billboard 200 d'Estaos Xuníos.
Les últimes décades
editarRonnie James Dio y Geezer Butler xuntáronse con Tony Iommi y Cozy Powell a finales de 1990 pa empezar a trabayar nel próximu llanzamientu de Black Sabbath. Mientres ensayaben en payares, Powell rompióse'l cadril cuando'l so caballu morrió, cayéndo-y enriba de les piernes. Incapaz de terminar la grabación del álbum, Powell foi sustituyíu por Vinny Appice, col que la banda entró nel estudiu xunto al productor Reinhold Mack. L'añu que duró'l procesu de grabación tuvo apináu de problemes, mayormente pola tensión ente Tony Iommi y Ronnie James Dio por cuenta de les lletres de los cantares, dalgunes d'elles siendo reescritas munches vegaes.
«Dehumanizer costó enforma tiempu, foi un trabayu duru», dixo Iommi. «Llevónos demasiao tiempu, esi álbum costónos un millón de dólares, que ye absolutamente risible». Dio depués dixo que la ellaboración del álbum foi difícil, pero que mereció l'esfuerzu. «Yera daqué que nos tuvimos qu'estrumir dende dientro, pero creo que ye por eso polo que funciona», dixo. «Dacuando precises esi tipu de tensión; si non, acabes faciendo un álbum de Navidá».
L'álbum resultante, Dehumanizer, llanzóse'l 22 de xunu de 1992. N'Estaos Xuníos, l'álbum publicó'l 30 de xunu de 1992 al traviés de Reprise Records. Anque l'álbum recibió reseñes de distinta índole, tuvo'l mayor ésitu comercial de la banda de los últimos diez años. En cierta midida gracies al senciellu «TV Crimes», l'álbum llegó al puestu númberu 44 de la llista Billboard 200. Dio abandonó Black Sabbath dempués del conciertu d'Oakland, California, del 13 de payares de 1992.
La banda llanzó'l so decimoséptimu álbum d'estudiu, Cross Purposes con un tornáu Tony Martin , el 8 de febreru de 1994. Nuevamente el CD recibió crítiques diverses. Blender concedió-y al álbum dos estrelles, diciendo amás que l'álbum de Soundgarden de 1994, Superunknown, yera «un muncho meyor álbum de Sabbath qu'esta chambonada».
Dempués de la xira de Cross Purposes, el baxista Geezer Butler abandonó de nuevu la banda. «Finalmente desilusionéme totalmente col últimu álbum de Sabbath, y prefería muncho más les coses que yo taba componiendo que lo que faía Sabbath». Butler empezó un proyeutu en solitariu llamdo GZR, llanzando en 1995 l'álbum Plastic Planet. Dempués de la marcha de Butler, Iommi readmitió al baxista Neil Murray y al batería Cozy Powell, volviendo a la formación de Tyr. La banda reclutó al guitarrista de Body Count, Ernie C, pa producir el nuevu álbum, que foi grabáu en Londres a finales de 1994. Amás, l'álbum contién l'apaición del vocalista de Body Count, Ice T, nel cantar «Illusion of Power».
El resultante Forbidden llanzóse'l 8 de xunu de 1995, ensin llegar a entrar en llistes estauxunidenses. L'álbum recibió crítiques bien dures. Black Sabbath embarcóse nuna xira mundial en xunetu de 1995 con Motörhead y Tiamat como teloneros, pero, a los dos meses d'empezar, Cozy Powell abandonó, aduciendo problemes de salú, y foi sustituyíu por Bobby Rondinelli. Dempués de los conciertos n'Asia n'avientu de 1995, Tony Iommi punxo la banda en descansu y empezó a trabayar nun álbum en solitariu con Glenn Hughes, l'ex vocalista Black Sabbath, y Dave Holland, ex batería de Judas Priest. L'álbum nun se llanzó oficialmente tres la so grabación, anque apaeció un bootleg llamáu Eigth Star pocu dempués. L'álbum llanzóse oficialmente en 2004 sol títulu de The 1996 DEP Sessions, coles partes de batería d'Holland regrabadas pol músicu de sesión Jimmy Copley.
En 1997, Tony Iommi eslleió la banda p'axuntar oficialmente a Ozzy Osbourne y la formación orixinal de Black Sabbath. El vocalista Tony Martin dixo que la xunta de la banda orixinal tuviérase entamando dende 1992, y que la banda llanzó los sos siguientes álbumes pa completar el contratu que teníen con I.R.S. Martin depués dixo que Forbidden foi «un álbum de rellenu que consiguió sacar a la banda de la discográfica, llibrase del cantante y poder siguir alantre cola xunta. Sicasí, yo nun taba al corriente d'esa información nesi momentu».
Nel branu de 1997, Tony Iommi, Geezer Butler y Ozzy Osbourne xuntáronse de forma oficial pa encabezar, al pie de la banda d'Ozzy, el "Ozzfest". La formación incluyía al batería de la banda d'Ozzy, Mike Bordin, supliendo a Bill Ward, que nun podía participar por cuenta d'unos compromisos col so proyeutu en solitariu, The Bill Ward Band. N'avientu de 1997, Ward xunióse a la banda, y la formación orixinal grabó dos conciertos nel Birmingham NEC, que seríen llanzaos como discu doble sol títulu Reunion el 20 d'ochobre de 1998. Reunion llegó al puestu númberu once del Billboard 200, y foi certificáu platino pola RIAA n'Estaos Xuníos.
Pol senciellu «Iron Man», Black Sabbath recibió'l so primer premiu "Grammy" en 2000 na categoría de meyor actuación de metal, trenta años dempués del llanzamientu orixinal del cantar. Reunion tamién contién dos nueves cantares d'estudiu, «Psycho Man» y «Selling My Soul», colándose dambos nel Top 20 de la llista Mainstream Rock Tracks del Billboard. Pocu enantes del empiezu de la xira europea del branu de 1998, Bill Ward sufrió un ataque al corazón, siendo temporalmente reemplazáu pol batería Vinny Appice. Ward volvió pa la xira d'Estaos Xuníos con Pantera como teloneros, que dio empiezu en xineru de 1999 y siguió hasta dempués del branu, encabezando'l Ozzfest. Dempués de los conciertos del Ozzfest, la banda detuvo la so actividá mientres cada unu de los miembros trabayaba nos sos proyeutos en solitariu. Tony Iommi llanzó'l so primer álbum en solitariu, Iommi, en 2000, ente que Osbourne llanzó Down to Earth.
En 2007 Iommi y Dio decidieron axuntar a los miembros de la dómina de Heaven and Hell pa una xira mundial. Ente que la formación d'Osbourne, Butler, Iommi y Ward siguió llamándose oficialmente Black Sabbath, esta nueva formación optó por llamar se Heaven and Hell, igual que l'álbum, pa evitar tracamundios. Primeramente, Bill Ward diba participar nel proyeutu, pero desvenceyar de la banda enantes d'empezar la xira, siendo reemplazáu pol batería Vinny Appice. Asina, la formación de la banda sería la mesma que nos álbumes Mob Rules y Dehumanizer. Heaven and Hell xiró per Estaos Xuníos con Megadeth y Machine Head como teloneros, amás de grabar un álbum en direutu y un DVD en Nueva York el 30 de marzu de 2007, llamáu Live from Radio City Music Hall. En payares de 2007, Dio confirmó que la banda tenía planes pa grabar un álbum d'estudiu, que foi grabáu al añu siguiente. N'abril de 2008 la banda anunció'l llanzamientu d'una caxa recopilatoria, amás de la so participación nel Metal Masters Tour, al pie de Judas Priest, Motörhead y Testament. En 2009, Heaven and Hell anunció'l nome del so álbum d'estudiu, The Devil You Know, llanzáu'l 28 d'abril. El 16 de mayu de 2010, Wendy Dio, esposa y representante de Ronnie James Dio, anunció la muerte del so home por cuenta d'un cáncer d'estómagu.
Black Sabbath entamó una ceremonia nel Whisky a Go Go d'Hollywood, California, el 11 de payares de 2011 pa realizar un comunicáu oficial. La ceremonia foi presentada pol ex-miembro de Black Flag, Henry Rollins, al pie de los cuatro miembros orixinales de Black Sabbath. Nel eventu, Black Sabbath anunció oficialmente la so vuelta. Confirmaron la so actuación nel Download Festival 2012 y un discu con material nuevo producíu con Rick Rubin pa finales de 2012. El 18 de payares anunciaron una serie de conciertos per Europa ente mayu y xunu de 2012. El 9 de xineru de 2012 anuncióse oficialmente que Tony Iommi fuera diagnosticáu con linfoma. El 2 de febreru de 2012, Bill Ward anunció que nun participaría na xunta de Black Sabbath nun siendo que-y dieren un "contratu": a otru día el restu de los integrantes anunciaron que nun tenía más remediu que siguir ensin él, anque dixeron que "tenía les puertes abiertes".
Pocu dempués dixeron que la xira habíase canceláu y que namái tocaríen nel Download Festival. En llugar de Black Sabbath, la xira sería d'Ozzy con músicos invitaos: "Ozzy and Friends". N'abril Perry Farrell, confirmó que l'únicu conciertu de Sabbath n'Estaos Xuníos sería nel festival "Lollapalooza". Finalmente, en xunu de 2013 salió a la venta'l decimonovenu álbum d'estudiu de la banda, llamáu 13, grabáu ente agostu de 2012 y xineru de 2013 en Shangri La Studios, Malibu, California, y Tone Hall, Warwickshire, Reinu Xuníu. El discu foi publicáu pola discográfica Vertigo y la producción corrió a cago de Rick Rubin, Brad Wilk de Rage Against the Machine encargóse de sustituyir a Bill Ward a la batería.
Discografía
editar- Álbumes n'estudiu
- Black Sabbath (1970)
- Paranoid (1970)
- Master of Reality (1971)
- Black Sabbath Vol.4 (1972)
- Sabbath Bloody Sabbath (1973)
- Sabotage (1975)
- Technical Ecstasy (1976)
- Never Say Die! (1978)
- Heaven and Hell (1980)
- Mob Rules (1981)
- Born Again (1983)
- Seventh Star (1986)
- The Eternal Idol (1987)
- Headless Cross (1989)
- Tyr (1990)
- Dehumanizer (1992)
- Cross Purposes (1994)
- Forbidden (1995)
- 13 (2013)
- Álbumes en vivu
- Live Evil (1982)
- Cross Purposes Live (1995)
- Reunion (1998)
Referencies
editarEnllaces esternos
editar- Sitiu web oficial (n'inglés)