AI Velorum
Coordenaes: 8h 14m 5.146s, -44° 34′ 32.852″
AI Velorum (AI Vel / HD 69213 / HIP 40330)[8] ye una estrella variable na constelación de Vela, la vela del Argo Navis, asitiada 2,8º al nor-nordeste de g Velorum. De magnitú aparente media +6,56, alcuéntrase a 328 años lluz de distancia de la Tierra.
AI Velorum ye una subxigante o estrella de la secuencia principal blanca de tipu espectral A9IV/V.[8] Con una temperatura de 7960 K, ye 22 vegaes más lluminosa que'l Sol, siendo'l so radiu 2,5 vegaes mayor que'l radiu solar. Descubierta en 1931 por Ejnar Hertzsprung, primeramente foi catalogada como variable RR Lyrae, pero llueu se repararon peculiaridaes decididamente insólites que la estremaben d'esti grupu de variables. M. S. Bessell en 1969 introdució la denominación d'estrelles variables AI Velorum p'aquelles variables Delta Scuti que la so amplitú de variación yera cimera a 0,3 magnitúes. Anguaño ye'l prototipu d'esta clase de variables.
El rellumu d'AI Velorum bazcuya ente magnitú +6,15 y +6,76 a lo llargo d'un periodu de 0,11157 díes.[9] Sicasí, les sos curves de lluz amuesen ciertes traces inusuales y daqué esconcertantes; dellos máximos son el doble d'alto qu'otros, y un máximu bien eleváu puede dir siguíu d'otru bien pequeñu. Coles mesmes, la so velocidá radial ye variable ente 0 y 40 km/s. Tou ello evidencia un casu de pulsaciones con dellos periodos superpuestos. Asina, xunto al periodu principal esisten periodos secundarios de 46, 64 y 124 minutos, de manera que cuando la interferencia ente los múltiples periodos ye constructiva'l rellumu de la estrella aumenta en cuasi 1 magnitú, y cuando ésta ye destructiva l'aumentu supón namái una pequeña fracción de magnitú.[10]
Referencies
[editar | editar la fonte]- ↑ Afirmao en: SIMBAD.
- ↑ 2,0 2,1 2,2 2,3 Afirmao en: Gaia DR2. Llingua de la obra o nome: inglés. Data d'espublización: 25 abril 2018.
- ↑ Afirmao en: Catalogue of Stellar Photometry in Johnson's 11-color system. Llingua de la obra o nome: inglés. Data d'espublización: 2002.
- ↑ Afirmao en: VizieR. Llingua de la obra o nome: inglés.
- ↑ «A revised catalogue of δ Sct stars» (n'inglés). Astronomy and Astrophysics (3): páxs. 469-474. xunu 2000. doi: .
- ↑ «Pulkovo Compilation of Radial Velocities for 35 495 Hipparcos stars in a common system» (n'inglés). Astronomy Letters (11): páxs. 759–771. payares 2006. doi: .
- ↑ Afirmao en: Catalogue of two dimentional spectral types for the HD stars, Vol. 2. Data d'espublización: 1978.
- ↑ 8,0 8,1 AI Velorum (SIMBAD)
- ↑ AI Velorum (General Catalogue of Variable Stars)
- ↑ AI Velorum. Ottica di Maria