Isaac Asimov
Isaac Asimov (2 de xineru de 1920, Petróvichi – 6 d'abril de 1992, Manhattan) foi un escritor y bioquímicu ñacíu en Petrovichi (Rusia), fíu de Judah Asimov y Anna Rachel Berman Asimov, ye de rescamplar que la so má camudó la so data de nacencia a 4 d'ochobre de 1919, pa qu'entrare un añu enantes nel colexu. Asimov foi'l mayor de trés hermanos, tenía una hermana, Marcia, y un hermanu, Stanley.
Cuando namás que tenía trés años, la so familia decidió'l treslláu a los Estaos Xuníos, partiendo de Rusia'l 11 de xineru de 1923 rumbu Nueva York, aportando'l día 3 de febreru. Ellí afincáronse nel barriu de Brooklyn demientres una dómina, de magar 1926, na que tou xiraba al rodiu d'un negociu de venta de duces propiedá del pá d'Asimov que foi camudando d'asitiamientu. Foi xustamente gracies a la tienda polo qu'un mozu Asimov emtamó a acceder a revistes de ciencia-ficción que'l so pá vendía y qu'él lleía de tapecío, revistes qu'años más llueu llevaríen el so nome na portada.
Asimov empecipió los estudios en 1925 na escuela pública de Nueva York, siguió n'East New York Junior High School onde yá amosaba bones traces y gradúase en xunu de 1930, entrando con diez años na Boys High School, onde se gradúa en 1935. Foi daquella cuando escribió la so primer historia entitulada "Hermanos Menores" que ye un simple comentariu onde nun se pue apreciar entá la so calidá lliteraria anque sí un ciertu sentíu del humor y una referencia al so hermanu Stanley. Algamó'l graduáu en Química na Universidá de Columbia nel añu 1939.
La obra más famosa d'Asimov ye la serie de la Fundación, que forma parte de la serie del Imperiu Galáuticu y que llueu combinó cola so otra gran serie de los Robots. Tamién escribió obres de misteriu y fantasía, asina como una bayura de non ficción. En total, escribió o editó más de 500 volúmenes y unes 90.000 cartes o postales, y tien obres en cada categoría importante nel sistema decimal Dewey esceutu en filosofía.
Asimov foi reconocíu como un mayestru del xéneru de ciencia ficción y, xunto con Robert A. Heinlein y Arthur C. Clarke, foi consideráu ún de los "Trés Grandes" escritores de ciencia ficción demientres la so vida.
La más de los sos llibros de divulgación esplica los conceutos científicos siguiendo una llinia histórica, retrotrayéndose lo más posible a tiempos en que la ciencia en cuestión alcontrábase nuna etapa elemental. Davezu brinda la nacionalidá, les dates de nacencia y muerte de los científicos que menta, asina como les etimoloxíes de les pallabres téuniques.
Asimov foi miembru por munchu tiempu de Mensa, anque con galbana: describíalos como "intelectualmente combativos". Esfrutaba más de la presidencia de l'American Humanist Association.
En 1981 nomóse a un asteroide,el 5020 Asimov nel so honor.
Referencies
[editar | editar la fonte]- ↑ Afirmao en: Enciclopedia Literaria Concisa. Editorial: Большая Российская энциклопедия. Llingua de la obra o nome: rusu. Data d'espublización: 1962.
- ↑ Afirmao en: En la memoria todavía verde. Cita: The date of my birth, as I celebrate it, was January 2, 1920. It could not have been later than that. It might, however, have been earlier. Allowing for the uncertainties of the times, of the lack of records, of the Jewish and Julian calendars, it might have been as early as October 4, 1919.. Autor: Isaac Asimov. Llingua de la obra o nome: inglés. Data d'espublización: 1979.
- ↑ «NNDB» (inglés).
- ↑ Afirmao en: Gemeinsame Normdatei. Data de consulta: 9 abril 2012. Llingua de la obra o nome: alemán. Autor: Biblioteca Nacional d'Alemaña.
- ↑ «San Francisco Chronicle» (inglés). Hearst Corporation. Consultáu'l 28 xunetu 2021.
- ↑ Biblioteca Nacional de Francia. «autoridaes BNF» (francés). Consultáu'l 10 ochobre 2015.
- ↑ URL de la referencia: https://www.carnegie.org/awards/search/great-immigrants-search/.
- ↑ URL de la referencia: https://id.loc.gov/authorities/names/nb90003414.html. Cita: Sources: found: BL auth. file, 10th June 2003(Paul French is a pseud. of Isaac Asimov) (English).
Enllaces esternos
[editar | editar la fonte]- Páxina web oficial (n'inglés)
- Isaac Asimov na Internet Movie Database (n'inglés)
- «Isaac Asimov». en Find a Grave. (n'inglés)
- Obres d'Isaac Asimov nel Proyeutu Gutenberg