Biukukung

Biukukung
Palinggih Catu
Aran liyanan	Byakukung utawi Ngiseh
Kaodalin olih	Hindu Bali
Jenis	Budaya
Terkait dengan	Subak

Biukukung utawi ngiseh inggih punika pula-pali upacara ring subak sané kalaksanayang ri kala padi sampun mobot. Byukukung wiadin byakukung maasal saking kruna bya lan kukung. Bya maarti 'baya'. Kukung maasal saking basa Jawa Kuno inggih punika mukukung sané maarti 'awak', 'bungkuk', 'ring tengah kaangkat menék'. Mirip tekén bentuk anak sané sedeng mobot. Dadosnyané, biukukung pinaka upacara sané kalaksanayang matatujon anggén ngilangin baya (anggén kaslametan) padi sané nedeng mobot.

Sakancan upakara ring upacara puniki sakadi kaperluan anak sané ngidam wiadin persiapan ngembasang pianak. Sakadi rujak, ubi, lan sakancan ubad-ubadan. Rujak inggih punika ajengan sané banget kasenengin olih anak sané ngidam. Sakancan ubi kaaturang akéh madaging karbohidrat sané kaperluang olih janin ring awak anak istri sané mobot. Kuud sané mawarna kuning pinaka inemannyané, sané taler kaprecayain sida mresihang janin sané lakar embas.

Ring upacara punika taler kaaturang piranti-piranti anggén ngembasang, sakadi tiuk tiing, kulit taluh, kunyit, lan benang. Tiuk anggén ngetep ari-ari, kulit taluh anggén genah ari-ari, kunit pinaka ubad tatu, lan benang anggén negul tali tali puser. Clekontongan madué unteng pinaka genah sakancan ubad kaperluan ngembasang pianak. Tiuk tiing ring basa Bali kabaos ngeed sané maarti 'samah'. Madué unteng mangda buah padi samah. Kronjo inggih punika genah banten sané malakar aji ulat-ulatan slépan sané mabentuk bunder pinaka pinda padi sané lakar mobot. Puniki mabentuk bunder satmaka anak sané mobot. Upacara ngiseh/biukukung madué tatujon nunas kaslametan mangda padi sané nedeng mobot punika nénten keni baya.