Мафія (востраў)
Мафія | |
---|---|
суахілі Mafia | |
![]() Узбярэжжа | |
Характарыстыкі | |
Плошча | 435 км² |
Насельніцтва | 40 801 чал. |
Шчыльнасць насельніцтва | 93,8 чал./км² |
Размяшчэнне | |
7°51′ пд. ш. 39°47′ у. д.HGЯO | |
Акваторыя | Індыйскі акіян |
Краіна | |
![]() |
Мафі́я (суахілі: Mafia) — каралавы[1] востраў у заходняй частцы Індыйскага акіяна, каля ўзбярэжжа Усходняй Афрыкі. Уваходзіць у склад Танзаніі.
Агульная плошча — 435 (442[1]) км². Насельніцтва (2002 г.) — 40801 чал.
Геаграфія
[правіць | правіць зыходнік]Востраў Мафія знаходзіцца прыкладна ў 18 км ад усходняга ўзбярэжжа Танзаніі, у 125 км на паўднёвы ўсход ад Дар-эс-Салама, 476 км ад Дадомы, 6970 км ад Мінска. Ад мацерыка аддзелены пралівам Мафія[1].
Востраў мае мацерыковае паходжанне і фактычна складаецца з некалькіх самастойных астравоў, якія злучаюцца толькі падчас адліву. Галоўны востраў цягнецца на 49 км у даўжыню, яго найбольшая шырыня — 17,4 км. Усе астравы атачае кола каралавых рыфаў. Найвышэйшы пункт — 53 м. Узбярэжжа пакрыта манграмі і белымі пясчанымі пляжамі. Галоўны населены пункт — Кіліндоні[1].
Гісторыя
[правіць | правіць зыходнік]З X ст. востраў Мафія з'яўляўся адным з прыбежышчаў цывілізацыі суахілі. Яго назва паходзіць ад арабскага слова مجموعة («архіпелаг») або суахілі mahali («месца»). Каля паселішча Кіліндоні знаходзяцца рэшткі будынкаў перыяду Сярэднявечча. Археолагамі знойдзены арабскія манеты і рэчы XIII — XIV стст. Мяркуецца, што да прыходу партугальцаў востраў Мафія быў у залежнасці ад суседняй Кілвы.
У XVI — XVII стст. востраў кантраляваўся партугальцамі, а ў XVIII — XIX стст. — аманскімі і занзібарскімі арабамі. Тут спыняліся гандлёвыя караблі, але істотнай ролі ў эканамічным жыцці Усходняй Афрыкі ён не меў. У паўднёвай частцы вострава арабамі былі створаны плантацыі какосаў. Паводле вусных паданняў, у першай палове XIX ст. на Мафію рабілі напады сакалава, якія не толькі захоплівалі ў рабства мясцовых жыхароў, але таксама практыкавалі канібалізм.
У 1890 г. востраў Мафія быў далучаны да германскіх каланіяльных валоданняў і адміністрацыйна адарваны ад Занзібара. Султан Занзібара атрымаў кампенсацыю ў памеры 4 мільёнаў залатых марак. У 1915 г. востраў захапілі брытанцы. У 1922 г. было адменена рабства.
У 1961 г. востраў Мафія ўвайшоў у склад незалежнай дзяржавы Танганьіка, пераўтворанай у 1964 г. у Танзанію.
Інфраструктура
[правіць | правіць зыходнік]Насельніцтва вострава Мафія прадстаўлена пераважна суахілі, якія жывуць у двух дзясятках паселішчаў. Найбуйнейшае з іх — Кіліндоні. У ім ёсць марскі порт, не далёка размешчаны аэрапорт.
Галоўны занятак мясцовых жыхароў — сельская гаспадарка. На поўдні вырошчваюць какосавую пальму, на поўначы — рыс, фасолю, гародніну і г. д. Для насельнікаў узбярэжжа значную ролю мае рыбалоўства. Існуюць хатнія кустарныя промыслы. Развіваецца турызм.
У праліве паміж востравам Мафія і кантынентам вядуцца пошукі нафты.
-
Аэрапорт
-
Гавань
Зноскі
Спасылкі
[правіць | правіць зыходнік] Mafia Island даведнік на сайце Wikivoyage
- Mafia Island, Tanzania Архівавана 10 жніўня 2019. Змястоўны рэсурс на англійскай мове
- mafiaisland.com Турыстычны рэсурс на англійскай мове