Эстэр Пак
Эстэр Пак | |
---|---|
![]() | |
Дата нараджэння | 16 сакавіка 1877, 16 сакавіка 1876 ці 1879 |
Месца нараджэння | |
Дата смерці | 13 красавіка 1910 |
Грамадзянства | |
Род дзейнасці | урач |
Альма-матар | |
![]() |
Эстэр Пак (кар. 에스더 박, Esther Park; імя пры нараджэнні Кім Чомдон) — першая карэянка, якая стала лекарам заходняй медыцыны; надавала шмат сіл дабрачыннасці. Пак скончыла школу Іхва , а затым атрымала ступень доктара медыцыны ў ЗША. Вярнуўшыся ў Карэю, яна навучыла мноства жанчын медыцыне і вылечыла велізарную колькасць пацыентак.
Біяграфія
[правіць | правіць зыходнік]Кім Чомдон нарадзілася 16 сакавіка 1877 года[1] (па іншых дадзеных — 16 сакавіка 1876[2] або ў 1879 годзе) у сеульскім раёне Чунгу , яна была трэцяй у сям’і з чатырох дачок[3]. Бацька Кім некаторы час працаваў з амерыканскімі місіянерамі, яго начальнікам быў Генры Апенцэлер ; гэта паўплывала на яго і ў 1886 годзе ён адправіў дачку вучыцца ў школу Іхва[3]. Кім была адной з першых студэнтак гэтай навучальнай установы, аднак бацькі дазволілі ёй вучыцца, паставіўшы дзве ўмовы: ёй было забаронена ехаць у ЗША і пакідаць школу да шлюбу[4][2]. Кім добра вучылася, асабліва добра ёй давалася англійская мова, і калі школу наведала амерыканская місіянерка Разета Шэрвуд-Хол , Кім папрасілі папрацаваць для яе перакладчыцай[3]. Убачыўшы, як Шэрвуд-Хол аперуе дзяўчынку з заячай губой , якая лічылася ў Карэі таго часу невылечнай хваробай, Кім стала марыць аб медыцынскай кар’еры[3]. Акрамя таго, Шэрвуд-Хол пераканала Кім, што карэянкі вельмі пакутуюць ад канфуцыянскіх забаронаў , якія не дазваляюць як след іх лячыць: строгі падзел палоў у грамадстве не дапускаў агляду жанчыны мужчынам[3][5]. Шэрвуд-Хол сама вучыла сваю перакладчыцу псіхалогіі і асновам догляду пацыентаў[2].
Шэрвуд-Хол пазнаёміла Кім з Пак Юсанам (кар. 박유산), які працаваў з яе мужам, і 24 мая 1893 года Кім Чомдон спалучылася з ім шлюбам на першай у Карэі заходняй вясельнай цырымоніі[3][2]. Пасля вяселля яна ўзяла імя Эстэр Пак, дадаўшы да імя, пад якім была ахрышчаная, прозвішча мужа[1][3]. У 1894 годзе Шэрвуд-Хол вярнулася ў Нью-Ёрк, узяўшы з сабой Эстэр і Юсана[3].
Эстэр Пак скончыла гадавую школу ў Нью-Ёрку, дзе вывучала лацінскую мову, фізіку і матэматыку, а затым паступіла ў Балтымарскі жаночы Медыцынскі каледж (англ.: Women’s Medical College of Baltimore)[1][5]. У 1900 годзе Пак выдатна здала ўсе экзамены і стала доктарам[5]. Яе муж падтрымліваў імкненне Пак зрабіць медыцыну сваёй прафесіяй, аднак ён памёр у Нью-Ёрку ад туберкулёзу, не дажыўшы паўгода да яе выпускнога[3]. У ЗША ён працаваў на ферме, зарабляючы жонцы на адукацыю[5].
Пасля атрымання ступені Пак вярнулася ў Карэю і ўладкавалася ў першую ў краіне жаночую бальніцу " « Погу-еёгван» (кар. 보구여관, 保救女館), якая знаходзілася ў Сеуле каля брамы Тондэмун[1][3]. За 10 месяцаў працы там доктар Пак дапамагла больш чым 3000 пацыенткам, пасля чаго ў 1901 годзе пераехала ў Пхеньян, дзе Шэрвуд-Хол у 1894 годзе адкрыла новую бальніцу[3][5]. Пак шмат падарожнічала па Карэі, у тым ліку падчас эпідэміі халеры, дапамагаючы хворым бясплатна[3][5][4]. Акрамя асноўнай працы яна таксама вяла асветніцкую і выкладчыцкую дзейнасць, навучыўшы першае пакаленне карэйскіх жанчын-лекараў[5]. Пак чытала публічныя лекцыі, у якіх падкрэслівала важнасць санпрасвету і адукацыі для жанчын, а таксама прасоўвала хрысціянства[5].
13 красавіка 1910 года[6] Эстэр Пак памерла ад туберкулёзу ва ўзросце 33 або 34 гадоў[3][7].
Узнагароды
[правіць | правіць зыходнік]28 красавіка 1909 года ў палацы Кёнхігун прайшла вялікая ўрачыстасць, прысвечаная Эстэр Пак і двум іншым карэянкам, якія сталі першымі ў адукацыі: першай выпускніцы амерыканскага ўніверсітэта са ступенню бакалаўр літаратуры, Ха Ранса , і першай карэянцы-выпускніцы японскага ВНУ, Юн Чанвон (кар. 윤정원, 尹貞媛); яе наведала каля 7800 чалавек[7]. Кароль Коджон уручыў Пак сярэбраны медаль[1].
У 2006 годзе Карэйская акадэмія навук ўвяла Эстэр Пак ў Карэйскую залу славы навукі і тэхнікі[3].
У 2008 годзе Камітэт выпускніц універсітэта Іхва заснаваў медаль імя Эстэр Пак, якой адзначае заслугі жанчын, якія скончылі ўніверсітэт і сталі дактарамі[1].
Зноскі
Літаратура
[правіць | правіць зыходнік]- Kim Jeom-dong, the First Female Medical Doctor in Korea (англ.)(недаступная спасылка). KBS World Radio (21 чэрвеня 2012). Архівавана з першакрыніцы 5 лютага 2019. Праверана 29 кастрычніка 2017.
- Jeon So-min. First Korean female doctor and scientist, Esther Park (англ.). Ewha Voice (12 красавіка 2010). Праверана 29 кастрычніка 2017.
- Myung Keun Choi. Changes in Korean society between 1884-1910 as a result of the introduction of Christianity. — Peter Lang, 1997. — С. 161—163. — ISBN 9780820425498.
- Pae-yong Yi. Women in Korean History 한국 역사 속의 여성들 (англ.) / редактор Ted Chan. — 이화여자대학교출판부, 2008. — ISBN 9788973007721.
- Ли Хваёк. EWHA Old and New: 110 Years of History (1886-1996) (англ.). — 이화여자대학교출판부, 2005. — ISBN 9788973006557.