Shining
C'l artìcul chè 'l è scrit in
Miranduléś |
![]() | ||
Shining | ||
![]() La Duvall, Lloyd e Nicholson in na figùra dal film | ||
Al luśōr 1980 | ||
---|---|---|
Regìa: Stanley Kubrick | ||
Scritōr: Stephen King Diane Johnson • Stanley Kubrick | ||
Atōr: Jack Nicholson • Shelley Duvall • Joe Turkel Danny Lloyd • Scatman Crothers • Barry Nelson Philip Stone • Anne Jackson • Tony Burton Barry Dennen • David Baxt • Manning Redwood | ||
Müsica: Wendy Carlos | ||
Léngua: Ingléś | ||
Dürä dal film: 146 minüt | ||
Nasiōṅ: Stat Unî • Régn Unî |
The Shining (Al luśōr) 'l è 'n film ad scarésa americàṅ dal 1980 ad Stanley Kubrick trat da 'n rumànś ad Stephen King. Ad cal film chè a gh 'n è tri versiòṅ: qvéla uriginàla la dura 146 minùt, qvéla tajàda 143 e qvéla européa 119.
Custâ daśnóṿ migliòṅ ad dòlar a 'l incìrca, la pelìcula la 'n à pò purtâ a cà quarànta-quàtar.
Sunt
Jack Torrance (Jack Nicholson), scritōr falî, insgnànt diśucupâ e cun di prubléma 'd alculìśum, al decìd 'd andàr a far al custòdi par 'l invèran in 'n hutèl grand dal Culuràdo, 'l Overlook, ch'al s cata in mèś a dal muntàggni luntàṅ di óri ad viàś da tut i sènt'r abitâ. Dascurénd cun al diretōr d'l albèrg ch'al gh śibìs 'l incàrag, al sgnór Stuart Ullman (Barry Nelson), chi lò al gh diś ch'a s trata 'd un mistēr minga fadigóś, piutòst 'l è difìcil adatàr-as là parchè star da par lò par sinc méś a 'l incìrca, a càuśa dla néṿ, a n è minga un quèl fàcil. Déś an prima, difàti, 'n àtar tisi ciamâ Delbert Grady (Philip Stone), mandâ là cun sò mujér e al dū fiōli śmèli, 'l iva patî 'n eśaurimènt narvóś, finénd pò cun al cupàr la sò famìja a cólp ad manàra. Jack dagnóra 'l s la rid, dgénd ch'a lò un quèl dal gènar a n pōl briśa sucèdar. Al druarà al tèmp lìbar par finìr al lìbar ch'l è drē a scrìvar.
Torrance al partìs acsè p'r al Colorado, cun sèg sò mujér Wendy (Shelley Duvall) e al fiōl Danny (Danny Lloyd). Chi lò al gh'à di putēr extrasensurâl e al cōg ad culōr Dick Halloran (Scatman Crothers) al gh fà subìt a mènt. Anc lò al gh'à qvél che lò al ciàma "luśōr" (shining) ch'al gh parmét ad viv'r incóra di quèi sucès in di tèmp pasâ o ad védar di fat ch'i gh'aṅ incóra da capitàr. 'L óm al cònta a 'l putèṅ che 'l albrèrg 'l è stâ tirâ sù in dua a gh'éra 'n simitèri indiàṅ e ch'l è fàcil ch'al vadrà anc lò di fat ad sangṿ sucès lè dèntar ma ch'al n gh'à minga 'd avér paùra parchè i èṅ sōl dal figùri. 'L ùnic quèl ch'al s arcmànda 'l è quèl 'd a n vśinàr-as minga a la cambra 237, sénsa però spiegàr al parchè.
Edisiòṅ par 'l èstar
Kubrick 'l à tgnû a drē anc a gl'edisiòṅ furastéri dal film. In particulàr, al regìsta ad New York 'l à decìś and cambiàr in soquànt paéś la fraś che Jack al scriv ad cuntìnuv cun la màchina par scrìvar.
Ingléś | Itagliàn | Tedèsch | Spagnōl | Francéś | |
---|---|---|---|---|---|
Fraś druàda in dal film | All work and no play makes Jack a dull boy | Il mattino ha l'oro in bocca | Was Du heute kannst besorgen, das verschiebe nicht auf Morgen | No por mucho madrugar amanece más temprano | Un «Tiens» vaut mieux que deux «Tu l'auras» |
Tradusiòn in Emigliàn | Lauràr e basta sénsa divertimènt al fà dvintàr Jack un baghét nujóś | La matìna la gh'à 'l òr in dla bóca | Minga spustàr a dmaṅ qvél ch'at pó far incō | Anc s'ta t lēv più prèst, al giōran al n tacarà minga prima | Un «Tó» al vâl da piò che dū «At gh 'l arà» |