Zientziologiaren Eliza
![]() | |
Ikurra | |
---|---|
Sortzailea | L. Ron Hubbard |
Sorrera | 1954 |
Egoitza | Gold Base |
Webgunea | http://www.scientology.org |
Zientziologiaren Eliza erlijioa da, L. Ron Hubbard zientzia-fikziozko idazleak 1954an Estatu Batuetan sortutakoa. Zientziologia dianetikan oinarritzen da, Hubbardek asmatutako psikoterapia-mota batean. Dianetics: The Modern Science of Mental Health (1950, Dianetika: buru-osasunaren zientzia modernoa) liburuan azaldu zuen lehen aldiz bere teoria.
Zientziologoen helburua engramak (gertaera mingarrien oroitzapen subkontzienteak) desagerraraztea da, jokabide irrazionalak eragiten dituztelako. Auditoreek elizkideei laguntzen diete engrama horiei modu kontziente batean aurre egiten, haien buruak argi daitezen, eta haien buruko osasun-egoera hobe dadin. Zientziologiak munduko erlijio askotako sinesbideak bereganatzen ditu: ariman eta berraragitzean sinesten du, besteak beste. Zientziologiako kideek diru-kopuru handiak ordaindu behar izaten dituzte mintegietan parte hartzeko. Hori da erakundearen alderdi kritikatuenetako bat. Gainera, elizako kideei burua hustea eta haren teorien oinarri zientifikoak frogatu gabe daudela leporatzen zaio. Beste batzuen ustez, Hubbardek teoria horiek plazaratu baditu, elizei onartzen zaizkien zerga-abantailez baliatzeko izan da. Herrialde askotan, baina, ez du horrelako abantailarik lortu, eta zientziologia sektatzat hartzen da.
Erreferentziak
[aldatu | aldatu iturburu kodea]- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.