8 არასამთავრობო ორგანიზაცია, რომლებიც ე.წ. „გამჭვირვალობის“ კანონპროექტის საწინააღმდეგო აქციებზე დაკავებული პირების უფლებებს იცავენ, ერთობლივ განცხადებას ავრცელებენ და დაკავებულთა მდგომარეობის/უფლებების შესახებ საუბრობენ. მათი განცხადებით, 15 აპრილიდან 9 მაისის ჩათვლით NGO-ების ერთიან ცხელ ხაზზე ინფორმაცია შევიდა 134 დაკავებული პირის შესახებ.
განცხადებაში ორგანიზაციები აღნიშნავენ, რომ შეტყობინების მიღებისთანავე ეძებდნენ დაკავებულებს იზოლატორებში და ხვდებოდნენ მათ, აღწერდნენ მათი უფლებების დარღვევის ფაქტებს და განუმარტავდნენ უფლებებს.
მათ აქვთ დაკავებულების ადგილსამყოფების შესახებ ინფორმაციის დროულად მიღების პრობლემა, დაკავების ვადის დაუსაბუთებელი გახანგრძლივება, დაკავებისას სამართალდამცავების მხრიდან ძალის გადამეტება, საქმეების განხილვა სასამართლოში. არასამთავრობები აცხადებენ, რომ მოსამართლეები, ძირითადად, ყოველგვარი ობიექტური მტკიცებულების გარეშე იღებდნენ მშვიდობიანი აქციის მონაწილეების სამართალდამრღვევად ცნობის გადაწყვეტილბებეს. უფრო მეტიც, გარკვეულ საქმეებში თავად დაკავებულებმა წარადგინეს ვიდეოჩანაწერები, რომლებშიც ნათლად ჩანდა, რომ დაკავების დროს მათ ადმინისტრაციული სამართალდარღვევა არ ჩაუდენიათ.
ბრიტანეთის საელჩო მოუწოდებს საქართველოს მთავრობას, დაუყოვნებლივ აღკვეთოს პროტესტის მონაწილეთა უკანონო დაშინება და გამოიძიონ ყველანაირი უფლებადარღვევა.
„მუქარის შემცველ სატელეფონო ზარებს, უკანონო დაკავებას, ცემასა და პოსტერებს, რომლებიც სამოქალაქო საზოგადოების წევრებს მოღალატეებად შერაცხავს, ადგილი არ აქვს დემოკრატიულ საზოგადოებაში. გაერთიანებული სამეფო განაგრძობს საქართველოს გვერდით დგომას მისი დემოკრატიისა და ევროატლანტიკური მისწრაფებების მხარდასაჭერად“- ვკითხულობთ განცხადებაში.
