გაეროში მიღებული რეზოლუციის შემდეგ მონტენეგროში, პარლამენტის შენობის წინ, სერბეთის მხარდასაჭერად უკვე მეორედ შეიკრიბა რამდენიმე ათეული მომიტინგე.
დემონსტრანტებს თან ჰქონდათ სერბეთის, რუსეთისა და მონტენეგროს დროშები, თუმცა ძლიერი ჭექა-ქუხილის შედეგად საპროტესტო აქცია მალევე დაიშალა.
სერბეთის პრეზიდენტმა ალექსანდარ ვუჩიჩმა მადლობა გადაუხდა იმ ქვეყნებს, რომლებმაც გაეროს რეზოლუციის წინააღმდეგ მისცეს ხმა ან თავი შეიკავეს კენჭისყრაში მონაწილეობისგან.
სრებრენიცის შესახებ მიღებული რეზოლუციის შემდეგ საფრანგეთი ბოსნია-ჰერცეგოვინასა და დასავლეთ ბალკანეთში მხარეებს შერიგებისკენ მოუწოდებს.
გაეროში საფრანგეთის ელჩის ნიკოლა დე რივიერის თქმით, ამ რეგიონის ქვეყნების პოლიტიკურმა ლიდერებმა უნდა შეასრულონ ეს მოთხოვნა. მისი აზრით, სრებრენიცის გენოციდის საერთაშორისო დღის დაარსებით შეიქმნება ერთგვარი შესაძლებლობა, იმუშაონ შერიგებისა და მსხვერპლთა ხსოვნის პატივსაცემად.
ამავდროულად, ბოსნიელი სერბების ლიდერმა, ბოსნიის ავტონომიური სერბული რესპუბლიკის პრეზიდენტმა, მილორად დოდიკმა გაეროში რეზოლუციის კენჭისყრამდე განაცხადა, რომ ავტონომიური რესპუბლიკა ბოსნია-ჰერცეგოვინას ტოვებს. მისი თქმით, ეს პროცესი მშვიდობიანი იქნება. დოდიკი ამბობს, რომ ბოსნიელი სერბები არ დაეთანხმებიან არც რეზოლუციას და არც იმას, რაც მასში წერია.
