კალიფორნიის კოლეჯის კამპუსში სტუდენტები ყავის შემსწავლელ ახალ დაწესებულებაში იკრიბებიან.
ყავის ცენტრი აშშ-ში პირველი აკადემიური დაწესებულებაა, რომელიც ყავის მეცნიერებისა და ხელოვნების შესწავლას ეძღვნება.
650 კვადრატული მეტრის ფართობის ცენტრი უახლესი ტექნოლოგიითა აღჭურვილი და იგი მოსავლის აღებამდე და შემდგომი პროცესის შემსწავლელ განყოფილებას, მარცვლების მოხალვისა და ესპრესოს ხარშვის ოთახებს მოიცავს.
,,ბევრი ადამიანი მიიჩნევს, რომ ყავის დამზადება ძალიან ადვილია. უბრალოდ, ყავისფერ ფხვნილს დაასხამ ცხელ წყალს, რა უნდა იყოს ამაზე მარტივი? მე მსურს გადმოვცე, რომ კარგი ფინჯანი ყავის დამზადება უფრო რთულია, ვიდრე ჭიქა ღვინის. ამას, რომ ჩემს კოლეგა მეღვინეებს ვეუბნები, ბრაზდებიან, რადგან იციან, რამდენად ძნელია ღვინის დაყენება. როგორც ირკვევა, ყავის დამზადება ბევრად უფრო რთულია“, – ამბობს, „ყავის ცენტრის” დამფუძნებელი ბილ რისტენპარტი.
ცენტრში არის ბრმა დეგუსტაციის ჯიხურიც, სადაც მეცნიერები აკვირდებიან, თუ როგორ რეაგირებენ მომხმარებლები ყავის სხვადასხვა სახეობაზე.
ისინი იმედოვნებენ, რომ მომავალში ცენტრს სათბურიც დაემატება, რათა ყავის მარცვლების მოყვანა შეძლონ.
„უმეტესობას ჰგონია, რომ უბრალოდ ბარისტა ვარ, ყავის დამზადება ვიცი… მათ არ ესმით, თუ რამხელა მეცნიერება, ინჟინერია და ინოვაცია სჭირდება ყავის ინდუსტრიას, ძალიან ბევრი. ეს ახალი საკვლევი სფეროა. ვფიქრობ, ადამიანებს ეს არ ესმით. იმედი მაქვს, ყავის ცენტრის გახსნით ისინი მეტს შეიტყობენ და ყავის კვლევები უფრო გაფართოვდება“, – ამბობს შრიშტი ჩეჟიანი, სტუდენტი და „ყავის ცენტრის” თანამშრომელი.
ცენტრში რამდენიმე საგანმანათლებლო კურსის გავლაც არის შესაძლებელი, რომლებიც უნივერსიტეტის კვების მეცნიერების, ეკონომიკისა და საინჟინრო პროგრამებთან არიან ინტეგრირებული.
სტუდენტები და პროფესორები იმედოვნებენ, რომ ერთ დღეს, კალიფორნიის კოლეჯი ყავის მეცნიერების ხარისხსაც გასცემს.
„ჩვენ ვცდილობთ, ყავა აკადემიური კვლევების სფეროში აქტუალურ თემად ვაქციოთ, ხელი შევუწყოთ ნიჭიერი კადრების მოზიდვას და მხარი დავუჭიროთ მსოფლიოს ყველაზე მნიშვნელოვანი სასმლის ინდუსტრიას“, – აცხადებს ბილ რისტენპარტი.
მრავალი მილიონი დოლარის ღირებულების დაწესებულებას რამდენიმე წამყვანი ყავის კომპანია აფინანსებს.
გასულ სასწავლო წელს კოლეჯის 2000-ზე მეტმა სტუდენტმა გაიარა კურსი ყავის შესახებ.
