შოვში გარემოს ჯერ კიდევ ცხადად ეტყობა დამანგრეველი სტიქიის კვალი. ერთ დროს გამწვანებული კურორტი ახლა ინერტული მასალითაა სავსე. მიტოვებული და დაცარიელებულია სასტუმროები… იმ შენობებში, რომლებიც ღვარცოფს სასწაულებრივად გადაურჩა, დამსვენებლები აღარ არიან. ახლა აქ სიჩუმეა… გარემოს ეროვნულმა სააგენტომ შოვის ტრაგედიის შემდეგ მოამზადა დასკვნა, რომელშიც წერია, რომ არსებული საშიშროების ხარისხის შეფასების მიზნით კომპლექსური კვლევების გაგრძელებაა საჭირო.
„პერიოდულად მონიტორინგს ვახორციელებთ, სიტუაცია პრაქტიკულად უცვლელია, რაც იყო 3 აგვისტოს შემდეგ. ზოგადად, საფრთხის შემცველია კავკასიონის ქედზე არსებული ყველა მყინვარი და იმ მყინვარებიდან გამოსული ხეობები. სექტემბერში ძალიან სერიოზული დასკვნა იქნება დადებული და დაიდება ასევე რეკომენდაციები, სად რა უნდა გავაკეთოთ“, – აცხადებს მერაბ გაფრინდაშვილი, გარემოს ეროვნული სააგენტოს გეოლოგიის დეპარტამენტის უფროსი.
დაახლოებით ერთი წლის წინ მომხდარმა სტიქიამ რეგიონზე და განსაკუთრებით ამ ხეობის სოფლებზე დიდი გავლენა მოახდინა. თუკი ადრე აქ უამრავი ტურისტი დადიოდა, ახლა მათი რაოდენობა მნიშვნელოვნადაა შემცირებული. სოფელი გლოლა ყველაზე ახლოს მდებარე დასახლებაა კურორტ შოვთან… მიუხედავად იმისა, რომ ტრაგედია ამ დასახლებას პირდაპირ არ შეხებია, ადგილობრივი მოსახლეობა უსაფრთხოდ მაინც ვერ გრძნობს თავს. ჯერჯერობით სოფელ გლოლის ქუჩები ცარიელია, თუმცა ადგილობრივები ტურისტების მისაღებად მაინც ემზადებიან.
„ჩვენ გვინდა უსაფრთხოების განცდა, სოფელს. ძალიან ბევრი პატარ-პატარა მდინარეებია, რომლებსაც შეუძლია ღვარცოფის გამოწვევა. ამის გარანტია გვინდა სახელმწიფოსგან, რომ აქ შედარებით უსაფრთხოა აქ ცხოვრება. იმიტომ, რომ აქაურობის დატოვება არავის უნდა“, – ამბობს სოფელ გლოლის მკვიდრი ლელა ზაქარაია.
როგორც გარემოს ეროვნულ სააგენტოში ამბობენ, კონკრეტულად სოფელ გლოლასა და უწერას შესახებ გეოლოგიური დასკვნა, ფაქტობრივად, მზადაა და უახლოეს პერიოდში ადგილობრივ მუნიციპალიტეტს გაეგზავნება. მათი თქმით, ამ ეტაპზე ამ მიდამოში რაიმე განსაკუთრებული საფრთხე არ არსებობს, თუმცა დასკვნა პრევენციის თვალსაზრისით გარკვეულ რეკომენდაციებს გასცემს. უწყება სხვა რეგიონებში მსგავს გეოგრაფიულ არეალში არსებულ დასახლებებსაც იკვლევს. მდინარე ჭანჭახი ნაპირსამაგრი სამუშაოების შედეგად ქვის ლოდებითაა შემოფარგლული. ადგილობრივი მუნიციპალიტეტის ინფორმაციით, მალე შოვში ტრაგედიის გასახსენებლად მონუმენტი დაიდგმება. გარემოს ეროვნული სააგენტოს მიერ მომზადებული დასკვნის მიხედვით, მდინარე ბუბისწყლის ხეობაში, სტიქიის გავრცელების არეალში, დაუშვებელია რაიმე სახის ახალი ინფრასტრუქტურის მოწყობა და არსებული შენობა-ნაგებობების ფუნქციონირება.
