Frederico X de Dinamarca
Frederico X de Dinamarca (Frederik André Henrik Christian), nado en Copenhague o 26 de maio de 1968, é o rei de Dinamarca e conde de Monpezat. O 14 de xaneiro de 2024 foi proclamado rei de Dinamarca, logo da abdicación da súa nai, a raíña Margarida II.
Traxectoria
[editar | editar a fonte]Fillo primoxénito de Margarida II de Dinamarca e do príncipe Henrique de Laborde de Monpezat, leva o nome de Frederico cumprindo coa tradición dinamarquesa de que os herdeiros ao trono sexan bautizados polo Frederico ou Cristián.[1]
Cursou a primaria e secundaria en centros privados e públicos de Copenhague, así como un curso en Normandía. Ademais, estudou Ciencias Políticas na Universidade de Aarhus, rematando en 1995, facendo o curso 1992-1993 na Universidade de Harvard.[2]
Traballou como diplomático na delegación dinamarquesa ante as Nacións Unidas en Nova York e na embaixada en París. Tamén recibiu instrución militar nos tres compoñentes da Defensa (exército, armada e aviación).[3]
Casou en 2004 con Mary Donaldson, de orixe australiana, e é pai dos príncipes Cristián, Sabela, Vicente e Xosefina.[4]
O 31 de decembro de 2023, a súa nai, a raíña Margarida II, anunciou a súa intención de abdicar o día 14 de xaneiro de 2024, data do seu 52 aniversario como monarca. Dese xeito, Frederico X chegou o trono dinamarqués. O 14 de xaneiro de 2024, celebrouse ás 14 horas unha reunión do Consello de Estado (o goberno canda a raíña Margarida e Federico X) no Palacio de Christiansborg en Copenhague. Finalizada a xuntanza, Margarida II asinou formalmente a súa renuncia e as 15 horas, a primeira ministra danesa, Mette Frederiksen proclamou o novo rei dende o balcón do palacio, sendo aclamado polo pobo alí presente.[5][6] Dende unha fortaleza militar do porto disparáronse 27 salvas de artillaría logo da proclamación. Despois, o novo rei, a súa dona, a raíña María, e os seus fillos, mantiveron unha recepción con diferentes persoeiros de Dinamarca, as Illas Feroe e Grenlandia. De regreso á súa residencia no Palacio de Amalienborg, fixeron un paseo polas rúas da capital dinamarquesa saudando aos milleiros de persoas congregados. Chegados a Amalienborg, un conxunto de pazos onde reside a familia real de Dinamarca, os estandartes e demais sinais rexios, foron retirados do pazo de Cristián IX, morada de Margarida II, e izados no de Federico VIII, onde reside o novo rei.[7][8]
Notas
[editar | editar a fonte]- ↑ Nast, Condé (2019-10-16). "¿Federico o Christian? La curiosa tradición de la familia real danesa con los nombres de los bebés 'royals'". Vanity Fair (en castelán). Consultado o 2024-01-02.
- ↑ "HRH The Crown Prince". www.kongehuset.dk. Consultado o 2024-01-02.
- ↑ Ferrer, Isabel (2024-01-02). "Federico de Dinamarca, el príncipe informal que promete mantener las tradiciones de la monarquía". El País (en castelán). Consultado o 2024-01-02.
- ↑ "Relive Crown Prince Frederik and Crown Princess Mary's stunning wedding day as it happened". HELLO! (en inglés). 2021-05-14. Consultado o 2024-01-02.
- ↑ "Frederik 10. er nu konge af Danmark". DR (en dinamarqués). 2024-01-14. Consultado o 2024-01-14.
- ↑ "Nu er kong Frederik Danmarks regent - TV 2". nyheder.tv2.dk (en dinamarqués). 2024-01-14. Consultado o 2024-01-14.
- ↑ "Denmark awaits new king, as Queen Margrethe to bow out". 14-1-2024. Consultado o 14-1-2024.
- ↑ "Margarida II de Dinamarca abdica este domingo en favor do seu fillo Federico". G24. Consultado o 2024-01-14.
Véxase tamén
[editar | editar a fonte]- Páxina web da Monarquía Dinamarquesa
Commons ten máis contidos multimedia sobre: Frederico X de Dinamarca Este artigo sobre unha personalidade é, polo de agora, só un bosquexo. Traballa nel para axudar a contribuír a que a Galipedia mellore e medre.
Existen igualmente outros artigos relacionados con este tema nos que tamén podes contribuír.