ລັດຖະມົນຕີການຕ່າງປະເທດສະຫະລັດ ທ່ານ ແອນໂທນີ ບລິງເກັນ ກ່າວໃນວັນພຸດວານນີ້ວ່າ ອິສຣາແອລ ຕ້ອງເຮັດໃຫ້ສະຫວັດດີການຂອງພົນລະເຮືອນ ປາແລັດສະໄຕນ໌ ເປັນ “ວຽກງານອັນດັບນຶ່ງ” ໃນການເຮັດສົງຄາມກັບກຸ່ມຮາມາສ ໃນເຂດ ກາຊາ.
ທ່ານກ່າວຕໍ່ບັນດານັກຂ່າວຫລັງຈາກກອງປະຊຸມທາງອອນລາຍນ໌ ກັບບັນດາຄູ່ຮ່ວມມືສາກົນວ່າ "ພວກເຮົາເບິ່ງໄປທີ່ລັດຖະບານອິດສຣາແອລ ເພື່ອໃຫ້ແນ່ໃຈວ່າ ນີ້ແມ່ນບູລິມະສິດ. ການປົກປ້ອງພົນລະເຮືອນ, ການໃຫ້ການຊ່ວຍເຫຼືອທີ່ປະຊາຊົນ ມີຄວາມຕ້ອງການ."
"ນັ້ນ ຈະຕ້ອງເປັນວຽກອັນດັບນຶ່ງ, ເຖິງແມ່ນວ່າພວກເຂົາຈະເຮັດໃນສິ່ງທີ່ຈຳເປັນເພື່ອປົກປ້ອງປະເທດ ແລະຮັບມືກັບໄພຂົ່ມຂູ່ຈາກກຸ່ມ ຮາມາສ ກໍຕາມ."
ນັກການທູດລະດັບສູງຂອງສະຫະລັດ ໄດ້ພົບປະຜ່ານການປະຊຸມທາງວິດີໂອກັບລັດຖະມົນຕີຈາກ ປະເທດເກາະໄຊປັຣສ (Cyprus), ສະຫະຣາດຊະອານາຈັກ ອັງກິດ, ສະຫະລັດອາຣັບເອເມີເຣັສ, ກາຕາ, ສະຫະພາບຢູໂຣບ ແລະອົງການສະຫະປະຊາຊາດ ເພື່ອປຶກສາຫາລືກ່ຽວກັບແລວທາງການເດີນທະເລໃໝ່ເພື່ອນຳເອົາການຊ່ວຍເຫຼືອເຂົ້າໄປໃນເຂດກາຊາ.
"ເມື່ອຖືກສ້າງຕັ້ງຂຶ້ນ, ແລວທາງດັ່ງກ່າວ ຈະຊ່ວຍໃຫ້ສາມາດແຈກຢາຍອາຫານໄດ້ຫຼາຍເຖິງ 2 ລ້ານຄາບ ໃນແຕ່ລະມື້, ເຊັ່ນດຽວກັນກັບຢາ, ນ້ໍາ ແລະການສະໜອງດ້ານມະນຸດສະທໍາທີ່ສໍາຄັນອື່ນໆ," ທ່ານບລິງເກັນ ກ່າວ.
ກອງທັບສະຫະລັດ ໄດ້ສົ່ງກຳປັ່ນລຳນຶ່ງໄປທະເລ ເມດີເຕີເຣນຽນ (Mediterranean) ເພື່ອສ້າງທ່າເຮືອຊົ່ວຄາວ ຢູ່ແຄມຝັ່ງເຂດກາຊາ ເພື່ອເປັນຊ່ອງທາງໃນການຂົນສົ່ງການຊ່ວຍເຫຼືອດ້ານມະນຸດສະທຳທີ່ຫຼາຍຂຶ້ນ ແຕ່ກ່າວວ່າ ທ່າເຮືອດັ່ງກ່າວ ອາດຈະໃຊ້ເວລາສອງເດືອນຈຶ່ງຈະສຳເລັດ.
ໃນວັນພຸດວານນີ້ ອົງການບັນເທົາທຸກ ແລະ ວຽກງານຂອງສະຫະປະຊາຊາດ ສຳລັບຊາວປາແລສໄຕນ໌ ຫລື UNRWA ກ່າວວ່າ ພະນັກງານຂອງຕົນຢ່າງໜ້ອຍຄົນນຶ່ງ ໄດ້ຖືກສັງຫານ ແລະອີກ 22 ຄົນໄດ້ຮັບບາດເຈັບ ໃນເວລາທີ່ກອງກຳລັງອິສຣາແອລ ໂຈມຕີສູນແຈກຢາຍອາຫານ ໃນພາກຕາເວັນອອກຂອງເມືອງ ຣາຟາ ໃນເຂດ ກາຊາ.
ຟໍຣັມສະແດງຄວາມຄິດເຫັນ