Putsch de Kapp
Lo putsch de Kapp es una temptativa de còp d'Estat dirigit còntra la republica de Weimar per de movements conservators entre lo 13 e lo 17 de març dau 1920. Animat per lo generau Walther von Lüttwitz, cap de la bregada Ehrhardt, e per Wolfgang Kapp, fondator dau Partit de la Patria Alemanda, s'inscriu dins una seria de trebols interiors alemands que durèron fins au 1924.
Lo putsch comencèt lo 13 de març emb lo movement de la bregada Ehrhardt (6 000 òmes) vèrs Berlin e per lo refús de l'armada regulara de tirar sus lu insurgents. Lo govèrn deguèt alora quitar la capitala e s'enfugir a Stuttgart. Wolfgang Kapp formèt un govèrn provisòri a Berlin, mas lu sindicats e lu partits de seneca (Partit Comunista, Partit Sociau-Democrata, Partit Sociau-Democrata Independent e Partit Comunista Obrier) organizèron una grèva de quatre jorns que paralizèt l'economia. De mai, lu foncionaris refusèron d'obeïr ai putschistas. Lo 17, menaçat per de manifestacions mai e mai importanti, Kapp abandonèt lo poder e s'escapèt en Suècia. S'entornèt mai tard en Alemanha e morèt en lo 1922 avant lo sieu procès. Von Lüttwitz fugèt en Ongria e li demorèt fins au vòte d'una amnistia en lo 1924. Pi, fondèt un partit d'extrèma drecha e si raprochèt dei nazis.