Джонатан Свифт
Джонатан Свифт | |
---|---|
Jonathan Swift | |
Jonathan Swift by Charles Jervas detail.jpg | |
![]() | |
Портрет од Чарлза Джервеса, 1710 | |
Уроджѣня | Jonathan Swift новембра 30., 1667 Даблин, Ирландия |
Умертя | октобра 19., 1745 (77 р.) Даблин, Ирландия |
Погреб | Катедрала Св. Патрика, Даблин |
Псевдоним | Isaac Bickerstaff, M. B. Drapier, Lemuel Gulliver, Simon Wagstaff, Esq. |
Занятя | прозаик |
Язык творох | анґліцькый |
Горожанство | Ірландське королівство |
Едукация | доктор теологии, 1702 |
Alma mater | Коледж Св. Тройцѣ, Даблин |
Партія | |
Реліґія | англіканство |
Час творбы | 1701 - 1740 |
Жанры | сатира, есей, памфлет |
Батько | Джонатан Свифт |
Матір | Эбигейл Эрик |
Брат, сестра | Джейн Свифт |
Вызначны роботы | Гулливеровы вандровкы, 1726; Скромна понука, 1729 |
![]() | |
VIAF:14777110; GND:118620193; LCCN:n78096912; FAST:29322; BNF:119258220; NLKR/NLC:jn20000605232; OL:OL24522A;
|
Джонатан Свифт, англ. Jonathan Swift, (*30. новембер 1667, Даблин — †19. октобер 1745, Даблин) — англоязычный ирскый писатель, сатирик, автор Гулливеровых вандровок, декан катедралного собора Св. Патрика в Даблину, бойовник за социалну справедливость и здорове сполоченство.
„ | Кедь бы на небесах богатство ся поважовало за вартость, не давали бы го такым подлякам. | ” |
Джонатан Свифт |
Ранны рокы
[едітовати | едітовати жрідло]Отець му, Джонатан Свифт ст., въедно зо своим старшым братом Годвином пришов з Англии до Даблина по тому, як их родинный маеток быв спустошеный в домовой войнѣ (1660). Обое были правникы. В року 1664 побрав ся з Абигейл Ериковов, дѣвков англицкого священника, таксамо утѣченця з Англии.[1] Але в яри 1667 нечекано умер, еще лем 27-рочный, за сѣм мѣсяцѣ[2] до того, як сын му пришов на свѣт. Мати зостала без гроши, з еднорочнов дѣвочков Джейн, а ку тому новородженый дѣтвак быв хворяковатый, а по роках пришов на проблемы зоз менталнов хворотов, днесь познатов як хворота Менье, котра ся выказуе в нападах обертаня в головѣ и утраты думкы.[3] Скоро по породѣ мати з дѣвков вернули ся домов до Англии, лишивши новородженого Джонатана на стрыя Годвина. Джонатанови наяли плекачку котра го плекала до трирочного вѣку. Хлопчик выростав без родичовской ласкы, одказаный на стрыя и благодѣйникох. Учив ся в середной школѣ з интернатом в Килкенни, англ. Kilkenny, (1674–1682), котра была ачей найлѣпшов школов Ирландии в тых часох.[3] В роках 1682–1686 учив ся в коледжу Св. Тройцѣ, англ. Trinity College, Даблин, и зыскав ступѣнь бакалавра умѣлств. Далшым штудиям завадила револуция в Англии (1688–1689), в Даблину зачали ся непокои, и одышов до Англии.
В Мур Парку
[едітовати | едітовати жрідло]Мати помогла му достати службу секретаря у ей далекого сородника, честованого дипломата во выслужбѣ сера Виллиама Темпла, англ. Sir William Temple, в его маетку Мур Парк, англ. Moor Park, в грофствѣ Саррей, англ. Surrey. Ту ся запознав з широкым кругом интелигенции, писателями, поетами, росширив свои зналости, хоснуючи богату библиотеку свого добродѣтеля. В третьом року службы Темпл представив свого секретаря самому кралю Виллиаму ІІІ. Ту зачав литературну творчость яко сатирик и памфлетиста, свои первы творы написав на понуку Темпла, меджи нима Битву книг, англ. The Battle of the Books, сатиру, одповѣдаючу критикам Темплового Есея о давной и модерной науцѣ (1690).[4] На службѣ в Мур Парку быв за 10 рокы, аж до Темпловой смерти (1699). По тому еще закончив споряданя его мемуарох и опустив маеток.
За 10 рокы своей секретарьской службы Джонатан Свифт два раз одходив до Ирландии, раз в року 1690 з причины нападу хвороты Менье, котра го не лишала до самой смерти. Другый раз, в року 1695 на пораду Темпла дав ся высвятити за англиканского священника, жебы мав застачене живобытя. За даколько мѣсяци ай служив на едной вѣдицькой плебании, але не годен быв там выдержати, в одорваню од активного културного живота, и вернув ся до Мур Парку.
Священник и памфлетиста
[едітовати | едітовати жрідло]Коли мусѣв опустити маеток Темпла, быв му понукнутый менше проминентный пост секретаря и каплана в маетку грофа Беркли. Бездячно, але приняв тоту понуку и побрав ся там, але онь на маетку дознав ся, же мѣсто уж обсаджене. Росчарованый тогды опер ся на свою священничу квалификацию и зыскав мѣсто в миниатурной плебании, о 20 миль оддаленой од Даблина. Ту прожив далшы 10 рокы живота, поза священничыма повинностями, маючи доста часу обходити свой сад, занимати ся выставбов «данского» канала, якый видѣв в Мур Парку, и порядкованьом свого дома, котрый достав од Церкви.[3] Во фебруарѣ року 1702 зыскав ступень доктора теологии в коледжу Св. Тройцѣ в Даблину.
Але тыж занимав ся активно литературнов роботов и року 1701 опубликовав анонимно свой первый памфлет (A Discourse on the Contests and Dissentions between the Nobles and the Commons in Athens and Rome — О спорах и роспорах меджи ноблесов и прощавов в Атенах и Римѣ). В Лондонѣ быв веце раз: 1701, 1702, 1703, 1707–1709 — и зыскав собѣ широкой знамости.[1] В своих памфлетах стояв на твердых моралных принципах, остро высмѣюючи недостаткы сполочности, социалну несправедливость.
„ | Законы — павучина, до котрой ся влапить дробна мушкарня, але кроз котру ся прорвуть шершнѣ и осы. | ” |
Джонатан Свифт |
В року 1710 векшину в парламентѣ добыли ториовцѣ, и хоть сам Свифт быв виговець подля свого статуса и поглядох, але многое з тогочасной политикы вигох поважовав за несправне и дав ся нагварити перейти зоз своим острым пером на службу ториовцям. Достав пост главного редактора тыжденника «The Examiner» (Ревизор), де публиковав свои сатиры в наступных роках.
В року 1713 за свою службу ториовцям доставать проминентный пост декана катедралного собора Св. Патрика в Даблину.
Деканом
[едітовати | едітовати жрідло]Зо смертьов кральовой Анны и наступлѣньом Георг І. ториовцѣ утратили позиции, а з тым пришов конець Свифтовой карьеры в Лондонѣ. Одышов до Даблина и надовго од писаня сатир. В тоты рокы писав лем поезии. Яко вплывна особа Англиканской Церкви, справедливо и толерантно односив ся до католикох и иншых вѣрникох.
„ | Мы дость религийны, жебы ся ненавидѣти, але недость, жебы ся любити. | ” |
Джонатан Свифт |
Од середины 1720-х вертать ся ку памфлетам. Тым разом его сатиры направлены против Англии и выносять на свѣтло социалны и економичны проблемы Ирландии. Найвеце знамый его шкандалный памфлет Скромна понука (A Modest Proposal), в котром з шибеничным гумором радить продавати новороженцьох з перелюдненой Ирландии до богатой Англии яко кулинарный деликатес. Памфлет опубликованый анонимно. Наконець своима памфлетами Свифт добив ся того, же Англия змягчила колониалный режим.
В року 1726 закончив и анонимно опубликовав свой главный твор, Гулливеровы вандровкы. Книга мала неслыханый успѣх и в наступных даколькых мѣсяцьох перевыдавала ся три раз, появила ся в перекладах. Свифт зо своих гроши створив фонд помочи схудобнѣлым варощанам Даблина. Свифтова слава яко бойовника за интересы Ирландии и прощавы гримѣла широко-далеко. Быв вызнаменаный яко честный варощанин Даблина. Свѣдок того часу пише: «Его портреты были выставлены на всѣх улицях Даблина… Поздравы и пожегнаня спроводжали го, де бы ся ни появив.»[5]
Приватный живот
[едітовати | едітовати жрідло]Джонатан Свифт не быв женатый. Еще в Мур Парку ся спознав з Естер Джонсоновов, дѣвков шафарькы маетку, вдовицѣ, о 15 рокы молодшов. Коли ся спознали, была 8-рочнов дѣтинов, и выступовав тогды як ей наставник и учитель. В яри 1702 покликав до свого священничого маетку под Даблином на бываня Естер Джонсонову, натогды уж 20-рочну, из ей приятельков Ребекков Динглейовов, яко сирот и своих воспитанниць. З Естер Джонсоновов мав сердечне приятельство, котре нашло выраз в его творчости, де она выступуе яко Стелла — псевдоним котрый достала од него еще в Мур Парку. О том свѣдчать его поезии и писма, котры ей писав в часѣ побыту в Лондонѣ и котры были опубликованы уж по его смерти.[1]
Друга жена, котра достала вызначне мѣсто в его поемѣ Cadenus and Vanessa (1713) яко Ванесса, была его поклонниця, Естер Вангомриова, 19-рочна дѣвка данского торговця, з котров ся спознав в часѣ побыту в Лондонѣ в роках 1707–1709. Псевдоним Ванесса сформованый з деминутива Есса од Естер и префикса Ван од зачатку ей призвиска. Из поемы и перепискы видко, же поет добродячно одповѣв на ей чутя, але пак пошкодовав и усиловав ся тримати дистанцию.[6]
По опубликованю поемы Естер Вангомриова в року 1714 повезла ся з Лондона въедно зо Свифтом до Ирландии, де Вангомриовы мали маеток, жебы быти ближе, хоть сам Свифт на то реаговав з великов резервов. Свифтовы биографы еще все мають неясно дотычно односин межи фигурантами того триуголника и будують розличны мелодраматичны одгады, котры не мають под собов твердой основы.[1]
Послѣдны рокы
[едітовати | едітовати жрідло]Од малости Свифт терпѣв на Меньерову хвороту, котра запричиняла мдлость и обертаня головы, але его ментална кондиция была неошкоджена. В року 1728, коли в Лондону достав вѣсть, же Естер Джонсонова при смерти, понагляв ся домов и быв при постели умераючой, обы ей облегчив одход. Але уж чув ся слабый, обы быти на ей погребѣ.[7]
Уже в зачатку 1730 в его творбѣ звучить тема смерти, в року 1731 написав верш На смерть доктора Свифта, де зосумаризовав планы и резултаты свого живота.
Восени року 1739 держали велику святочность на его честь. Але он сам не мог быти притомный, бо заслаб, а пак ся выказало, же достав паралитичный захват и утратив речь. В року 1742 было вызнане, же уж не годен сам ся обслужити, и была му придѣлена обслуга.[1] Свифт одказав векшу часть свого маетку на психиатричну болницю. Некомерчна болниця Св. Патрика была отворена в року 1757[8] и фунгуе донынѣ.
Умер в року 1745 и быв погребеный в катедралѣ Св. Патрика. Епитаф написав собѣ сам наперед. Суть там слова, же уж теперь его сердце не мучить велика розгорченость над тым свѣтом.
Жерела и одказы
[едітовати | едітовати жрідло]- Jonathan Swift, Anglo-Irish author and clergyman. //Encyclopaedia Britannica англ.
- Révai nagy lexikona. 1-21. köt. Révai Testvérek Irodalmi Intézet Részvénytársaság, Budapest. 1911–1935. Т. 17, с. 247. мад.
- Jonathan Swift. //The Biography.com website англ.
Референции
[едітовати | едітовати жрідло]- ↑ 1,0 1,1 1,2 1,3 1,4 Encyclopaedia Britannica
- ↑ Paul J. DeGategno, R. Jay Stubblefield. Critical Companion to Jonathan Swift: A Literary Reference to His Life and Work — 2009. С. 412.
- ↑ 3,0 3,1 3,2 The Biography.com website
- ↑ Révai nagy lexikona, т. 17, с. 247.
- ↑ Dennis N. Jonathan Swift. New York, 1965. 134 р.
- ↑ Stephen, Leslie (1898). "Jonathan Swift". In Smith, George. Dictionary of National Biography. 55:Stow – Taylor. London: Smith, Elder, & Co. Рp. 215–216. OL 7215056M
- ↑ Stephen, Leslie (1898). "Jonathan Swift". In Smith, George. Dictionary of National Biography. 55:Stow – Taylor. London: Smith, Elder, & Co. Р. 219. OL 7215056M
- ↑ Stephen, Leslie (1898). "Jonathan Swift". In Smith, George. Dictionary of National Biography. 55:Stow – Taylor. London: Smith, Elder, & Co. Р. 222. OL 7215056M