მმართველი გუნდის წევრებმა უკრაინასა და მოლდოვას სტატუსის მინიჭებასთან დაკავშირებით დღეს გამოცხადებული პოზიტიური დასკვნა მიულოცეს. ამასთან, როგორც დღეს "ქართული ოცნების" ოფისში გამართულ ბრიფინგზე აღნიშნეს, საქართველო ბევრად უფრო წინაა გატარებული რეფორმებით, თუმცა უკრაინაში მიმდინარე ომის დროს, პოლიტიკური გადაწყვეტილების მიღება საჭირო იყო.

"ჩამოთვლილია უკვე დამტკიცებულ დოკუმენტში ის ნაბიჯები, რომლებიც უნდა გადაიდგას სხვადასხვა მიმართულებით და ის პირობები, რომელიც არის წაყენებული კანდიდატის სტატუსის მისაღებად, ზუსტად, ყველა პუნქტში ემთხვევა ასოცირების დღის წესრიგს, ანუ აქ ახალი არაფერი წერია, ზუსტად იგივე პუნქტებზეა საუბარი, რაც იყო წარმოდგენილი და ისედაც შეთანხმებული ჩვენს მიერ ევროკავშირთან ასოცირების დღის წესრიგში. რა თქმა უნდა, ჩვენ ისედაც გვქონდა ეს ვალდებულება აღებული და თითოეული ამ პუნქტის მიხედვით განხორციელდება შესაბამისი რეფორმები. 

ჩვენ გვყავს ძალიან ცნობილი ოლიგარქები საქართველოში და ესენი არიან ადამიანები, რომლებიც 9 წელი ძარცვავდნენ ხალხს და ქართულ სახელმწიფოს, მაგალითად სააკაშვილი არის ერთ-ერთი ცნობილი ოლიგარქი და შეგახსენებთ, რომ დღეს ის ზის ციხეში და დეოლიგარქიზაციისკენ კონკრეტული ნაბიჯი უკვე გადაიდგა, მან თავისი ნებით გააკეთა ეს ყველაფერი და თავისი ნებით ჩაჯდა ციხეში. ასევე, კეზერაშვილი მეორე ოლიგარქი, მასზე აღძრულია სისხლის სამართლის საქმე და დეოლიგარქიზაციისთვის მნიშვნელოვანია ეს საქმე იყოს ბოლომდე მიყვანილი. ოლიგარქების დასრულება, ბუნებრივია, არის ქართული სახელმწიფოს ერთ-ერთი უმთავრესი ამოცანა. 

ივანიშვილი არის ბიზნესმენი, თავის კონკრეტული წარსულით, გარდა ბიზნესმენისა, ის არის ფილანთროპი და ქველმოქმედი, გარდა ამისა, 2012 წელს მან დაასრულა სისხლიანი რეჟიმი საქართველოში, აქედან გამომდინარე, აქ საუბარი ვერავითარ შემთხვევაში ვერ იქნება ბიძინა ივანიშვილზე, თუმცა იმ ადამიანებზე, რომლებმაც ძარცვეს ქვეყანა 9 წელი, რა თქმა უნდა, იქნება საუბარი ამ დოკუმენტში და არა მარტო ამ დოკუმენტში. ჩვენ ყველაფერს გავაკეთებთ იმისთვის, რომ ამ ოლიგარქებისგან ქვეყანა გავათავისუფლოთ," - აცხადებს ირაკლი კობახიძე.