Dagne Groven Myhren

I 1988 blei Groven Myhren dr.philos. ved Universitetet i Oslo med avhandlinga Kjærlighet og logos, som er ein studie av Henrik Wergelands «verdensdikt» («Skabelsen, Mennesket og Messias» og «Mennesket»). Avhandlinga blei gitt ut som bok i 1991.

Utanom Wergeland var ho i forsking og formidling sterkt oppteken av Ingeborg Refling Hagen, som var tanta hennar på morssida. Ho var engasjert i Suttungrørsla, stifta av Refling Hagen, og var ellers ein aktiv debattant i dagspressa og andre fora. Andre forskingsinteresser innanfor norsk litteratur omfatta Hans E. Kinck, Tarjei Vesaas og folkedikting som «Draumkvedet».

Som songar tileigna Groven Myhren seg songtradisjonar frå Telemark, og fleire har framheva den stilistiske spennvidda og sensitiviteten i songen hennar. Ho fekk viktige impulsar frå faren sin, Eivind Groven, frå Talleiv Røysland og frå Aslak Brekke. NRK byrja å gjere opptak av henne i 1964, og same året tok ho til å lage folkemusikkprogram for NRK Radio. Ho var mellom initiativtakarane til kvedarkursa på Club 7 i Oslo, der ho underviste frå 1975 av, og ho var medredaktør for antologien Ei vise vil eg kveda (1978).

Ho var dagleg leiar for Eivind Grovens institutt for reinstemming frå 1977, og ho var med på platene Eivind Groven med hardingfele og seljefløyte på nye og gamle vegar (1981) og Som symra rein og blå. Eivind Grovens reinstemde orgel (1985). Ho sette òg tone til fleire tekstar av Henrik Wergeland, Ingeborg Refling Hagen, Bjørnstjerne Bjørnson og andre. Fleire av dei er med i Suttung forlags songbok, Der bruser toneelver, der blinker folkesang (1984) og kom som album med same namn i 2008.

• norsk folkemusikk
• kveding
• Eivind Groven
• folkedikting

• Andreas Bjørkum, Magne Myhren, Bjørn Aasland (red.): Folkemusikk og folkemusikkutøvarar i Noreg, bd. 2. Oslo 2006
• Dagne Groven Myhren: «Vokal folkemusikk. En tradisjon og en revolusjon», Årbok for norsk folkemusikk. Oslo 1994
• Rolf Myklebust: 50 år med folkemusikk. Oslo 1982