Karsten Isachsen
Faktaboks
- Fødd
- 22. februar 1944, Oslo
- Død
- 18. januar 2016, Ål, Buskerud
- Verke
- Teolog og forfattar
- Familie
-
Foreldre: Direktør Knut Isachsen (1906–1993) og Margit Lolloe Gjertsen (1907–1988). Ugift.
Bakgrunn
Karsten Isachsen tok examen artium ved Kristelig Gymnasium i 1962. Han studerte ved Menighetsfakultetet, blei cand. theol. frå Det teologiske kyrkjelydsfakultetet i 1969, og avla praktisk-teologisk eksamen ved Det praktisk-teologiske seminar ved Universitetet i Oslo i 1970.
I perioden 1962–1972 arbeidde han som frilansar i NRKs Barne- og ungdomsavdeling og var i samme tidsrom timelærar i norsk, etikk og kristendom ved ulike skolar i Oslo. Han vart ordinert til prest i Den norske kyrkja i 1970 og var hjelpeprest i Ullern menighet fram til utgangen av 1974. I 1975 kjøpte Isachsen fjellgarden Eivindsplass i Skurdalen ved Geilo, som etter kvart blitt utbygd til konferansesenter. Etter dette var han prest i Hol i Hallingdal frå 1975 og stiftskapellan i Tunsberg med virke i Hol kommune frå 1977–1985. Frå 1985 var han forfattar og foredragshaldar på heiltid. Han opptredde også som kabaretartist.
Forfattarskap
Frå debuten med Gjester som ikke vil gå i 1978 utga Isachsen eit mangfald av bøker, alle samlingar av relativt korte tekstar. Tekstane reflekterer i seg sjølv forfattarens ulike offentlege roller som prest, førelesar og komikar: Dei er kristen forkynning, hjelp til livsmeistring og humoristiske korttekstar. Den kristne forkynnaren er mest tydeleg i dei tidlege bøkene, medan dei seinare bøkene er meir allment orienterte.
Som kristen forkynnar var Isachsen heile tida opptatt av tilhøyrarar og lesarar i utkanten av den synlege kyrkja. Ein av tekstane i debutboka har talande nok tittelen Preken til deg som aldri går i kirken. Isachsens forkynning var kjenneteikna ved personlege eksempel, relativt enkle setningar og av ein sjelesørgjar-tone. Samanlikna med andre norske predikantar spelte sjølve preiketeksten og kyrkjeåret ei mindre rolle i preikene hans.
Sjølv om forma vart opplevd som forfriskande ny i dei første preikebøkene, var ikkje den intenderte bodskapen radikalt ulik tradisjonell luthersk forkynning. Tittelpreika i debutboka er til dømes ei påskepreike som nesten utelukkande handlar om synd. Isachsen naut stor respekt i store delar av det kyrkjelege landskapet. Solidaritetserklæringane han kom med til dei kristne homofile i løpet av 1990-åra vart difor verkekraftige.
Hjå Isachsen gjekk det personlege preget hand i hand med omfattande gjenbruk av forteljingar og eksempel henta frå eigne og andre sine tekstar. Isachsen skriv sjølv i innleiinga til ei av samlingane av fyndord, som han kalla «lyspunkter», at han har samla på «one-linere» og «kjappe replikker» frå gutedagane av. Desse fortetta setningane utgjorde eit viktig forråd for han som talar.
Isachsen debuterte som lærebokforfattar i 1997 med På leit: Kristendomsverk for 8. klasse, og i 1998 med eit tilsvarande verk for 9. klasse.
Utmerkingar
Isachsen blei utnemnd til riddar av første klasse av St. Olavs Orden i 2014.
Utgjevingar
- Gjester som ikke vil gå. Essays og prekener, 1978
- Fjellet som flyttet seg. Essays og prekener, 1979
- Som når et barn kommer hjem. Essays og prekener, 1981
- Vis meg ditt ansikt. Essays og prekener, 1982
- Det handler om å leve, 1986
- Ut av ensomheten, 1986
- Før vi går fra hverandre. Essays og prekener, 1987
- Sint, sant, sunt, 1991
- En slitesterk livsstil, 1994
- Et stort indre landskap, 1996
- Ro med gyldne årer, 1996
- 365 små lyspunkter, 1996
- Såkorn fra himmelen, 1997
- 365 nye lyspunkter, 1998
- Høydepunkter, 1999
- 366 funklende lyspunkter, 1999
- 365 glitrende lyspunkter, 2000
- Lyspunkter, 2003
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.