Under oppkøyringa til VM i Bogotá i Colombia fekk Koanda eit trøyttleiksbrot i eit handledd, og det var lenge usikkert om ho kunne delta i meisterskapet. Ho rakk likevel å bli skadefri i tide, og i desember 2022 vart Koanda den første kvinnelege vektløftaren frå Noreg til å ta VM-gull samanlagt.
Koanda greidde 113 kilo i rykk og 147 kilo i støt, totalt 260 kilo. Dermed vann ho 87-kilosklassen med ein margin på 11 kilo til sølvvinnar Eileen Cikamatana frå Australia. Koanda tok samstundes gull i både rykk og støt.
I januar 2023 var Solfrid Koanda nominert i kategorien Årets kvinnelege utøvar under Idrettsgallaen, men det var langrennsløparen Therese Johaug som fekk prisen. To månadar seinare blei ho tildelt sin andre kongepokal under NM.
Solfrid Koanda vart i april 2023 kåra til den beste kvinnelege vektløftaren i Europa for idrettsåret 2022. Det var det europeiske vektløftarforbundet (EWF) som stod bak kåringa.
Seinare den same månaden var Koanda igjen suveren i EM. Ho klinka til med 117 kilo i rykk og 155 kilo i støt, og dermed tok ho EM-gull i både rykk, støt og samanlagt for andre året på rad. Samanlagtresultatet på 272 kilo var heile 34 kilo betre enn neste utøvar i 87-kilosklassen. Det heldt òg til tre nye norske rekordar.
Ho tok eit nytt VM-gull i støt i september 2023. Med 156 kilo var ho 18 kilo framfor andreplassen. Ho var favoritt også i rykk og samanlagt, men vart ståande utan teljande resultat i rykkøvinga. Dermed vart det heller inga plassering samanlagt.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.