బరువు పెరగడం అనేది చాలా మందిని కంగారు పెట్టే విషయం. దీనికి ఎన్నో కారణాలు ఉంటాయి. ముఖ్యంగా కొన్ని సమస్యలు కూడా బరువు పెరగడానికి కారణమవుతాయి. మనం బరువు పెరిగిన వెంటనే వచ్చిన ఆలోచన ఏంటంటే.. మనం ఎక్కువగా ఫుడ్ తీసుకుంటున్నామా లేదా.. ఏదైనా తప్పుగా తింటున్నామా అని అనుకుంటాం. కానీ, కేవలం తినడం వల్లే ఈ సమస్య రాదు. దీనికి చాలా కారణాలు కారణమవుతాయి. అవేంటో తెలుసుకోండి..
నిద్ర సరిగా లేకపోవడం..
బరువు పెరగడానికి నిద్రపోకపోవడం కూడా ఓ కారణమని చెప్పొచ్చు. ఎందుకంటే నిద్ర సరిగ్గా ఉండకపోతే మానసిక పరిస్థితి దెబ్బతింటుంది. ఇది ఫుడ్ తీసుకోవడంపై కూడా ఎఫెక్ట్ చూపిస్తుంది. దీని వల్ల ఎక్కువ ఆకలి పెరిగి ఎక్కువగా తిని బరువు పెరుగుతారు.
మోనోపాజ్..
ఇక మోనోపాజ్ దశకి దగ్గర ఉన్న ఆడవారు కూడా బరువు ఈజీగా పెరుగుతారు. ఆడవారిలో రుతుచక్రం, పునరుత్పత్తి వ్యవస్థలో ఈస్ట్రోజెన్ కీలక పాత్ర పోషిస్తుంది. ఈ ఈస్ట్రోజెన్ స్థాయిలో పలు మార్పులకి కారణమవుతుంది. కాబట్టి, మీ బాడీలో తక్కువ, ఎక్కువ ఈస్ట్రోజెన్ స్థాయిలు ఉన్నా బరువు పెరుగుతారు.
కిడ్నీ సమస్యలు..
సడెన్గా బరువు పెరగడం అనేది కిడ్నీ ఆరోగ్యాన్ని కూడా సూచిస్తుంది. కిడ్నీ ఫెయిల్యూర్, నెఫ్రోటిక్ సిండ్రోమ్ వల్ల కిడ్నీలు దెబ్బతినే అవకాశం ఉంటుంది. దీని వల్ల బాడీలోనే ద్రవాలు నిలిచిపోయి బరువు పెరుగుతారు.
థైరాయిడ్ సమస్యలు..
ఒకవేళ థైరాయిడ్ గ్రంథి తగ్గి సరిగ్గా హార్మోన్స్ని రిలీజ్ చేయకపోతే బరువు పెరుగుతారు. హైపోథైరాయిడిజం జీవక్రియని నెమ్మదిస్తుంది. దీని వల్ల సడెన్గా బరువు పెరుగుతారు. కాబట్టి, బరువు పెరిగితే థైరాయిడ్ నెమ్మదిగా పనిచేస్తుందని అర్థం.
ఒత్తిడి..
ఒత్తిడి, ఆందోళన ఎక్కువగా ఉండి మూడ్ సరిగ్గా లేకపోయినా బరువు పెరుగుతారు. ఒత్తిడి ఎక్కువగా ఉన్నపపుడు జంక్ ఫుడ్ తినాలనిపిస్తుంది. దీనివల్ల జీవక్రియ మందగించి బరువు పెరుగుతారు.
అదే విధంగా..
వర్కౌట్ చేయకపోవడం..
రోజులో కచ్చితంగా 30 నిమిషాలైనా ఏదైనా ఓ పని చేయాలి. శరీరానికి చెమట పట్టే విధంగా ఉండాలి. వాకింగ్, రన్నింగ్, స్విమ్మింగ్, సైక్లింగ్, ఇలా మీకు ఇష్టమైనది ఏదైనా కూడా చేయొచ్చు. దీని వల్ల మీ బాడీలోని అవయవాలన్నీ సక్రమంగా పనిచేసి ఈజీగా బరువు తగ్గుతారు.
జంక్ వద్దు..
దీంతో పాటు చాలా మంది నేటి కాలంలో జంక్ ఫుడ్ తినడం, ఆయిలీ ఫుడ్ తినడానికి అలవాటు పడ్డారు. ఇవన్నీ కూడా ఆరోగ్యానికి మంచిది కాదు. బరువుని పెరిగేలా చేస్తాయి. కాబట్టి, వీటిని తినడం తగ్గించి ఆరోగ్యానికి మేలు చేసే పోషకాహారం తినాలి. బరువుని ఎప్పటికప్పుడు పర్యవేక్షించుకోవాలి.
ఇన్ని పాటించాక.. ఇవన్నీ పాటించినా కూడా బరువు పెరుగుతూనే ఉన్నారంటే ముందు చెప్పిన ఆరోగ్య సమస్యలు కాకుండా మరికొన్ని ఉండొచ్చు. వీటన్నింటికి చెక్ పెట్టేందుకు కచ్చితంగా నిపుణుల సలహా తీసుకోవాలి. బాడీలో ఏమైనా సమస్యలున్నాయో చెక్ చేసుకోవాలి. వారి సలహా ప్రకారం జాగ్రత్తలు పాటించాలి. వీలైతే డైటీషియన్ సూచించే డైట్ ఫాలో అవ్వాలి. వీటి వల్ల బరువు అనేది మన కంట్రోల్లోనే ఉంటుంది.
చివరిగా..
కొన్నిసార్లు మనకి ఉన్న ఆరోగ్య సమస్యల కారణంగా బరువు పెరిగితే మరికొన్నిసార్లు బరువు పెరిగిన కారణంగా ఆరోగ్య సమస్యలొస్తాయి. కాబట్టి, ఎప్పుడు కూడా ఉండాల్సిన బరువు మాత్రమే ఉండాలి. అధిక బరువు అనేది అనర్థమని గుర్తించాలి.