21-ci Beynəlxalq Antikorrupsiya Konfransı Qubad İbadoğlunu dəstəkləyən qətnamə qəbul edib

İyunun 19-da Vilnüsdə keçirilmiş 21-ci Beynəlxalq Antikorrupsiya konfransı azərbaycanlı iqtisadçı və siyasi fəal doktor Qubad İbadoğlunu dəstəkləyərək, bütün dünyada korrupsiyaya qarşı mübarizə tərəfdarlarının narahatedici kriminallaşdırılmasını pisləyib.

Konfransın qətnaməsi korrupsiyanı ifşa edənlərin üzləşdiyi təqibləri pisləyib, jurnalistlərin, hüquq müdafiəçilərinin və fəalların hədəfə alınması hallarının cəzasız qaldığını qeyd edib. Sənəddə  bütün dünyada hökumətlər şəffaflıq və ədalətə tərəfdar olanların təhlükəsizliyini və azadlığını təmin etmək üçün dərhal addımlar atmağa çağırılıb.

İnsan hüquqları və ətraf mühitin mühafizəsi sahəsində aktiv fəaliyyətilə tanınan doktor Qubad İbadoğlu təxminən bir il əvvəl Azərbaycanın neft-qaz siyasətilə bağlı tənqidi nəşrindən sonra həbs edilib. Ehtimal edilən maliyyə cinayətləri ittihamı ilə onu 17 ilə qədər həbs təhlükəsi gözləyir.

"Biz bütün ittihamların dərhal onun üzərindən götürülməsini tələb edirik", - Qlobal Antikorrupsiya Hərəkatının İbadoğlu və onun ailəsilə həmrəyliyini ifadə edən bəyanatında deyilir.

Qətnamə həmçinin demokratik və inklüziv cəmiyyətlərin yaradılmasının zəruriliyini vurğulayaraq hakimiyyəti İbadoğlu kimi fəalların təqibinə son qoymağa çağırıb. Sənəddə ədalət və şəffaflığı müdafiə edənlərin qorunmasında hökumətin hərəkətsizliyi qınanılıb.

2023-cü ilin iyulundan həbsdə olan İbadoğluna qarşı Azərbaycan Cinayət Məcəlləsinə uyğun olaraq ittihamlar, o cümlədən  saxta fəaliyyətə, daha sonra isə dini ekstremizmə bağlılıq ittihamı irəli sürülüb. 2024-cü ilin aprelində Bakıda məhkəmənin qərarı ilə o, səhhətinə görə azad edilib, lakin  tam bəraət alması üçün çağırışlar davam edir.

"Biz bütün dünyada bu cür təqiblərlə üzləşən adamlarla həmrəyik", - dünya liderlərini əsas azadlıqları müdafiə etməyə, hesabatlılıq və ədalət naminə öz həyatını riskə atanları qorumağa çağıran qətnamənin sonunda deyilir.