A casa

EPUB

MOBI

PDF

RTF

TXT

Qualità del testo: sto testo el xe conpleto, ma el gà ancora da vegner rileto.

Luigi Cappello ― Dai rovinassi del campanil

A casa

1905

Edission original:	Luigi Cappello, Dai rovinassi del campanil, 1905
Fonte:	Indice:Luigi Cappello - Dai rovinassi del campanil, 1905.pdf

← Povara umanità

Edission e fonte ▼

Oh sti putei! →

[p. 35 modifica]

A casa

Quando a la sera straco dal lorar
     mi torno a casa e in libartà me meto
     co le putele mie qualche zogheto
     fasso spetando l'ora del çenar.

Co xe quel'ora, po, inveçe che quieto
     e co tranquilità lassarme star,
     una me tol el pan, st'altra el cuciar
     e la più picola me fa de oceto.

Credeu che me invelena? Ma va là!
     In fra un bocon, do ciacole, un baseto,
     capita l'ora che le meto in leto.

Passa un'altr'ora e dopo aver scoltà
     se regolar de tute xe 'l respiro,
     bona note a chi resta e me destiro.