Amerika Qrim turklari jamiyatining 1977-yildan buyon Bruklinda joylashgan markazi va masjidi, uch yildirki, ta'mirlanmoqda. Jamiyat tadbirlarida yig’iladigan mablag’ faoliyat va bino xarajatlari uchun sarflanadi.
“Bugun biz Otalar kunini nishonlayapmiz. Biz har yili Otalar kunida parkka chiqib sayl o’tkazamiz. Bruklinda bizning Amerika Qrim turklari jamiyati bor. U 200-300 oilalarni birlashtirgan. Saylda cheburek qovuramiz, osh damlaymiz. Yig’ilishib musiqa eshitamiz, raqsga tushamiz. Bolalar o’ynashadi. Bir-birmiz bilan suhbatlashamiz. Biz [chebureklarni] saylda ham, jamiyatimiz binosida ham qovuramiz. Yilda bir-ikki marta “Cheburek kunlari” o’tkazamiz. Cheburek kunlariga istagan kishi keladi. Bolalar konsert beradi, biz cheburek qovuramiz. Kelganlar ularni sotib olib tanavvul qiladi, o’tirib suhbatlashadi, konsertni ko’radi. Cheburek kunlari yilda bir-ikki marta mana shunday o’tadi”, - deydi Esma Resutova, tadbir tashkilotchilaridan biri.
"Otalar kuni saylimiz an’anaga ko’ra har yili o’tadi. Bu saylda xalqimiz bir joyda to’planadi. Unda Nyu-Yorkning turli burchaklaridan, Nyu-Jersi, Konnektikutdan ham vatandoshlarimiz qatnashadi, do’stlar davrasida Otalar kunini nishonlaydi. Cheburek pishiradi. Bizning mashhur taomimiz - cheburek. Qrim tatarlari madaniyatini davom ettirish bizning bu saylimizning bosh g’oyasi”,- deydi Mubeyin Altay.
“Buning [cheburek] qiymasining go’shtini jamiyat a’zolaridan biri, unini boshqa biri keltiradi. Jamiyatga yordam bo’lsin deb bu yerda barcha ko’ngillik qiladi. Yosh bolalar bir-birlari bilan tanishadi. Amerikada ko’pgina bolalar bir-biridan uzoqlashib, ayrilib ketadi, bu yerda ular bir joyda yig’ilarkan jamiyatimiz ham birdamlashadi”,- deydi Dilek Mergin.
“Bugun bu yerda biz rang-barang bo’lgan jamiyatimiz bilan birga Otalar kunini nishonlayapmiz. Biroq, hozir biz uchun qayg’uli bir davr. 2014-yil Ukraina birinchi, 2022-yil to’laqonli bosqinga uchradi. Biz g’amginmiz, ammo qat’iyatimiz kuchli, biz Qrimni ozod qilish, xalqaro qonun va me'yorlarga muvofiq Ukraina bilan aloqalarni qayta tiklashda qat’iymiz”,- deydi suhbatdosh
Saylga jamiyatga a’zo 45-50 oila to’plandi.
“Bizni bu yerda Qrim tatarlarining da’vosi birlashtiradi - Qrim tatari bo’ib yashay olishlik. O’z tilimizni, dinimizni saqlab qolish, Qrim tatari sifatida yashay olish uchun biz bu yerda bir joyga keldik. 1944-yildan bugunga qadar Qrim tatarlarning g’oyasi - ona vatanlari Qrimga ko’chib, Qrimga qaytib u yerda bir millat bo’lib yashay olish. Qrimda Qrim tatari bo’lib yashay olish - ularning bosh g’oyasi. Butun diasporadagi Qrim tatarlarning g’oyasi bu da’voga yordamlashish”, - deydi Altan.
“Bugun uchta cheburekni 10 dollardan sotyapmiz. Hozirgacha 500 ta atrofida sotdik. Matematik hisob-kitob qilsangiz, qancha mablag’ to’plaganimiz chiqadi. Bugungi mablag’ni jamiyatimizning qayta qurilishiga sarflaymiz. Bunga bizda moddiy ehtiyoj bor”, - tushuntiradi Mergin.
Facebook Forum