Հայաստանում առաջին անգամ տեղի կունենա մեր տարածաշրջանի համար բացառիկ իրադարձություն՝ միջազգային ճանաչում ունեցող դիրիժոր «Վասիլի Պետրենկոյի դիրիժորական ակադեմիա»-ի կողմից անցկացվող դասընթացները:
Ակադեմիայի կազմակերպիչներն են Հայաստանի ազգային ֆիլհարմոնիկ նվագախումբը՝ գեղարվեստական ղեկավար եւ գլխավոր դիրիժոր՝ Էդուարդ Թոփչյան եւ Primavera Foundation of Armenia հիմնադրամը՝ գեղարվեստական խորհրդի նախագահ՝ Վասիլի Պետրենկո:
«Վասիլի Պետրենկոյի դիրիժորական ակադեմիա»-ի դասընթացները կանցկացվեն հուլիսի 2-6-ը, որոնք նախատեսված են երիտասարդ դիրիժորների համար, վերջիններս կունենան անհատական փորձեր սիմֆոնիկ նվագախմբի հետ եւ կմասնակցեն «Դիրիժորական աշխատանքի գաղտնիքները՝ բեմից դուրս» սեմինարին: Թե՛ նվագախմբային փորձերը, թե՛ սեմինարը կվարի Վասիլի Պետրենկոն: Դասընթացների ավարտին երիտասարդ դիրիժորները մաեստրո Պետրենկոյի հետ կմասնակցեն գալա-համերգին՝ ղեկավարելով այն ստեղծագործությունները, որոնց վրա աշխատել են նախորդող օրերին: Ակադեմիայի փորձերն ու գալա համերգը տեղի կունենան «Արամ Խաչատրյան» համերգասրահում:
Մաեստրո Պետրենկոն նշում է. «Ակադեմիան երիտասարդ դիրիժորներին հնարավորություն կտա պրակտիկ համատեղ աշխատանք ունենալ ավելի փորձառու եւ ավելի հարուստ ճանապարհ անցած մասնագետի եւ պրոֆեսիոնալ սիմֆոնիկ նվագախմբի հետ: Ինձ համար ակադեմիան հաջորդ սերնդի տաղանդավոր դիրիժորների աճի, կատարելագործման եւ հնարավորությունների ընձեռման միջոց է»:
Ակադեմիայի ակտիվ մասնակիցների հայտերն ամփոփվել են սույն թվականի հունիսի 3-ին, ընտրվել են երիտասարդ դիրիժորներ ԱՄՆ-ից, Չինաստանից, Մեքսիկայից, Ռուսաստանից, ինչպես նաեւ Իրան-Հայաստան եւ Նորվեգիա-Ուկրաինան ներկայացնող մեկական մասնակից:
«Վասիլի Պետրենկոյի դիրիժորական ակադեմիա»-ն տարածաշրջանի համար նախադեպը չունեցող ամենամյա կրթական ծրագիր է, որը մեծ փորձառություն եւ խթան կհանդիսանա երիտասարդ դիրիժորների համար:
«Հայաստանը հրաշալի երկիր է՝ բազմադարյա մշակութային ժառանգությամբ: Դասական երաժշտությունը նույնպես այդ ժառանգության մաս է կազմում. աշխարհին հայտնի են բազում հայազգի կոմպոզիտորներ, սոլիստներ եւ դիրիժորներ: Սակայն հիմա, մի շարք պատճառներով, Հայաստանում բնակվող շատ քիչ երիտասարդ, տաղանդավոր երաժիշտների է հաջողվում ստանալ անհրաժեշտ փորձն ու կրթությունը հետագա կարիերայի համար: Դրա համար ամառային Ակադեմիայի հիմնական խնդիրն է օգնել, կիսվել նրանց հետ իմ փորձով»,-ասել է Պետրենկոն՝ «Երաժշտական կյանք» ամսագրին տված հարցազրույցում («Музыкальная жизнь» 03.05.24):
Պետրենկոն նաեւ հանդես կգա առանձին համերգով՝ հուլիսի 5-ին ղեկավարելով Հայաստանի ազգային ֆիլհարմոնիկ նվագախումբը: Համերգի մենակատարն է ջութակահար Սերգեյ Դոգադինը, ով կկատարի Մենդելսոնի Ջութակի կոնցերտը, կհնչի նաեւ Վեբերի «Էվրիանտե» նախերգանքը եւ Դվորժակի Սիմֆոնիա թիվ 8-ը:
Վասիլի Պետրենկոն հանդիսանում է Լոնդոնի Թագավորական ֆիլհարմոնիկ նվագախմբի երաժշտական ղեկավարը (2021-ից) եւ Եվրոպական միության երիտասարդական նվագախմբի գլխավոր դիրիժորը (2015-ից), 15 տարի լինելով Լիվերպուլի թագավորական ֆիլհարմոնիկի գլխավոր դիրիժորը, այժմ հանդիսանում է վերջինիս Դափնեկիր դիրիժորը: Հանդիսացել է նաեւ Ռուսաստանի պետական ակադեմիական սիմֆոնիկ նվագախմբի գլխավոր դիրիժորն ու գեղարվեստական ղեկավարը (2016-2022), Օսլոյի ֆիլհարմոնիկի, Մեծ Բրիտանիայի ազգային երիտասարդական նվագախմբի գլխավոր դիրիժորը (2013-2020): Ելույթներ է ունեցել Բեռլինի ֆիլհարմոնիկ, Լայպցիգի Գեւանդհաուս, Լոնդոնի սիմֆոնիկ, Լոնդոնի ֆիլհարմոնիկ, Սանտա Չեչիլիայի ակադեմիայի, Ֆրանսիայի ազգային նվագախմբերի հետ, ԱՄՆ-ում՝ Բոստոնի, Չիկագոյի, Լոս Անջելեսի Ֆիլհարմոնիկ եւ այլ նվագախմբերի հետ:
Հանդես է եկել BBC Proms, Էդինբուրգի, Գրաֆենեգգի փառատոներում: Պետրենկոյի երկացանկում կա մոտ 30 օպերային ստեղծագործություն, որոնք նա ղեկավարել է Նյու Յորքի Մետրոպոլիտեն, Փարիզի ազգային, Ցյուրիխի, Բավարիայի եւ Միխաիլովյան օպերային թատրոններում եւ Գլայնդեբուրնի փառատոնում:
Ի դեպ, ճանաչված դիրիժորն ավարտել է Սանկտ Պետերբուրգի կոնսերվատորիան, որտեղ դասեր է վերցրել դիրիժորական արվեստի այնպիսի հսկաներից, ինչպիսիք են Իլյա Մուսինը, Մարիս Յանսոնսը եւ Յուրի Տեմիրկանովը:
ԱՍՏՂԻԿ ԴԱԼԼԱՔՅԱՆ
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
14.06.2024
