Aċċess għal flus kontanti u aċċettazzjoni tagħhom
Il-flus kontanti għad għandhom rwol importanti fis-soċjetà u huma indispensabbli għal kwalunkwe ekonomija. L-istudji tagħna juru li l-biċċa l-kbira taċ-ċittadini taż-żona tal-euro jqisu li huwa importanti li jkunu jistgħu jħallsu fi flus kontanti, u li l-flus kontanti huma l-aktar metodu ta’ ħlas użat ta’ spiss fil-punt tal-bejgħ fiż-żona tal-euro.
Il-BĊE u l-banek ċentrali nazzjonali taż-żona tal-euro huma impenjati li jiżguraw li l-flus kontanti jibqgħu disponibbli u aċċettati b’mod wiesa’. Għalhekk nilqgħu l-proposta tal-Kummissjoni Ewropea għal Regolament ġdid tal-UE biex jissaħħaħ l-istatus tal-flus kontanti tal-euro bħala valuta legali. Il-proposta għandha l-għan li tiżgura li l-aċċess għall-karti tal-flus u l-muniti tal-euro u l-aċċettazzjoni tagħhom ikunu ggarantiti legalment fiż-żona tal-euro kollha.
Aċċess għall-flus kontanti
L-iżgurar ta’ aċċess faċli u konvenjenti għall-flus kontanti jipproteġi r-rwol tagħhom bħala valuta legali u jiggarantixxi l-użu kontinwu tagħhom bħala metodu ta’ ħlas ta’ kuljum. L-għażla tan-nies dwar kif iħallsu tista’ tiġi influwenzata minn kemm jistgħu faċilment jiġbdu l-flus mill-kontijiet bankarji tagħhom.
Il-pajjiżi taż-żona tal-euro huma responsabbli individwalment biex jiżguraw li n-nies u n-negozji jkollhom aċċess suffiċjenti u effettiv għall-flus kontanti fil-pajjiż kollu, inkluż f’żoni urbani u rurali.
Ir-rwol tal-Eurosistema
Il-flus kontanti maħruġa mill-banek ċentrali nazzjonali jitqassmu lill-banek kummerċjali biex ikunu jistgħu jissodisfaw il-ħtiġijiet ta’ flus kontanti tal-klijenti tagħhom. Il-BĊE u l-banek ċentrali nazzjonali janalizzaw il-livell tas-servizzi tal-flus kontanti fiż-żona tal-euro kollha bil-ħsieb li jidentifikaw nuqqasijiet possibbli fl-aċċess għall-flus kontanti. Pereżempju, żviluppajna metodoloġija komuni biex nanalizzaw l-aċċess taċ-ċittadini taż-żona tal-euro għal servizzi ta’ flus kontanti bħall-ATMs u l-fergħat tal-banek. Jekk ikun meħtieġ, il-pajjiżi taż-żona tal-euro jistgħu jimplimentaw liġijiet li jirrikjedu li l-banek kummerċjali u istituzzjonijiet oħra jiżguraw aċċess suffiċjenti u effettiv għall-flus kontanti.
L-Eurosistema stabbiliet ukoll regoli għall-banek kummerċjali li jippermettulhom li jiċċirkolaw mill-ġdid il-karti tal-flus b’mod effiċjenti u li jkun fihom l-ispejjeż tal-immaniġġjar tal-flus kontanti. Il-banek ċentrali nazzjonali jżommu wkoll biżżejjed riżervi ta’ flus kontanti biex jakkomodaw kwalunkwe żieda f’daqqa u imprevedibbli fid-domanda għall-karti tal-flus, pereżempju fil-każ ta’ kriżi jew qtugħ temporanju ta’ pagamenti elettroniċi.
Niżguraw li d-domanda kontinwa għall-karti tal-flus tal-euro tkun koperta. Hemm madwar 120,000 fergħa ta’ istituzzjonijiet ta’ kreditu u aktar minn 260,000 ATMs fiż-żona tal-euro, li jippermettu lin-nies jaċċessaw flushom b’mod effiċjenti u effettiv.
Modi addizzjonali kif tikseb il-flus kontanti
L-ATMs u l-fergħat tal-banek huma l-mezz ewlieni ta’ ġbid ta’ flus kontanti. Barra minn hekk, f’xi pajjiżi taż-żona tal-euro, il-ħwienet tal-bejgħ bl-imnut jistgħu jippermettu lill-klijenti tagħhom jiġbdu ammonti limitati ta’ flus kontanti.
“Cashback”
Imsejħa wkoll “avvanzi ta’ flus”. Tista’ titlob meta tiġi biex tħallas biex l-ammont li tixtieq tiġbed jiżdied mat-total tiegħek, imbagħad tħallas bil-kard ta’ debitu jew bl-apparat mobbli tiegħek u tirċievi l-ammont mitlub fi flus kontanti.
“Cash-in-shop”
Tista’ tiġbed il-flus kontanti mill-kont tiegħek fil-ħanut, mingħajr ma jkollok tixtri xejn.
Trid tkun taf aktar?
Ara dan il-filmat biex tara kif jaħdmu fil-prattika s-servizzi ta’ cashback u cash-in-shop.
Aċċettazzjoni ta’ flus kontanti
Il-karti tal-flus u l-muniti tal-euro huma valuta legali fiż-żona tal-euro. Dan ifisser li l-ħwienet u n-negozji ma jistgħux jirrifjutaw pagamenti fi flus kontanti sakemm iż-żewġ partijiet ma jkunux qablu minn qabel dwar mezz ieħor ta’ ħlas. B’mod ġenerali, l-awtoritajiet pubbliċi u l-fornituri tas-servizzi għandhom ukoll jaċċettaw il-flus kontanti, sakemm ma jkunx stipulat mod ieħor mil-liġi.
Il-Kummissjoni Ewropea pproponiet Regolament li jiċċara l-istatus tal-valuta legali tal-karti tal-flus u l-muniti tal-euro fil-liġi tal-UE. Il-proposta tiddefinixxi wkoll il-ftit każijiet fejn il-pagamenti fi flus kontanti jistgħu jiġu rrifjutati, pereżempju jekk in-negozju ma jkollux biżżejjed bqija, jew jekk iż-żewġ partijiet ikunu qablu dwar mezz ta’ ħlas differenti.
Il-BĊE jilqa’ l-proposta tal-Kummissjoni għal Regolament fiż-żona tal-euro u, f’opinjoni, jesprimi t-tħassib tiegħu li l-istatus tal-flus kontanti taż-żona tal-euro bħala valuta legali jista’ jiddgħajjef jekk jiżdiedu l-bejjiegħa bl-imnut li jirrifjutaw li jaċċettaw pagamenti fi flus kontanti. L-Eurosistema tanalizza l-livell ta’ aċċettazzjoni ta’ flus kontanti fiż-żona tal-euro u twissi lill-awtoritajiet u l-korpi kompetenti dwar kwalunkwe kwistjoni li tista’ tinqala’.