2020-yil yanvarida davlatga xoinlik qilishda (Jinoyat kodeksining 157-moddasi) ayblanib, umumiy rejimdagi koloniya asosida 5,5 yilga ozodlikdan mahrum etilgan sobiq diplomat Qodir Yusupov 10-iyun kuni jazoni o‘tab, ozodlikka chiqdi. Bu haqda “Gazeta.uz”ga manbasi xabar berdi. Jazoni o‘tash muddati hibsga olingan kundan — 2018-yil 10-dekabrdan boshlab hisoblangan.
Qodir Yusupov — Tashqi ishlar vazirligining sobiq xodimi. O‘tgan yillar davomida O‘zbekistonning Avstriya, Buyuk Britaniya, Sudan, Yaqin Sharq mamlakatlaridagi elchixonalarida, shuningdek, BMT va YeXHTdagi doimiy vakolatxonasida ishlagan. 2009-yilda u xizmat muddati tugashi munosabati bilan Venadan Toshkentga qaytib kelgan.
2018-yilning 3-dekabr kuni OAV, jumladan, “Gazeta.uz”da Toshkent shahridagi “Pushkin” metro bekati relslariga yiqilib tushgan 67 yoshli erkak haqida xabar berilgan. U Qodir Yusupov edi. Uning oilasi bu og‘ir psixologik holat tufayli o‘z joniga qasd qilishga urinish bo‘lganini ma’lum qilgan.
Sobiq diplomat yoqa suyagi sinishi, yopiq bosh jarohati va miya chayqalishi bilan kasalxonaga yotqizilgan. Shu kuni kasalxonada Qodir Yusupov xorijiy davlatlar foydasiga davlatga xiyonat qilganini tan olgan. 10-dekabr kuni u hibsga olingan, unga nisbatan Jinoyat kodeksining 157-moddasi 1-qismi bilan ayblov e’lon qilingan, 12-dekabr kuni esa qamoqqa olish tarzidagi ehtiyot chorasi qo‘llangan.
Harbiy sud ishni 2019-yil 24-iyun kuni ko‘rishni boshlagan. Jinoyat ishi bo‘yicha sud majlislari yopiq eshiklar ortida o‘tkazilgan. Qodir Yusupov o‘z aybini tan olmagan.
