O‘zbekistonning Seuldagi diplomatik missiyasini 25 yil davomida boshqargan Vitaliy Vasilevich Fen 76 yoshida vafot etdi. Bu haqda O‘zbekiston Tashqi ishlar vazirligi xabar berdi.
“Vitaliy Fen butun umrini vatanimizga xizmat qilishga bag‘ishlagan atoqli davlat arbobi, sport ustasi va professional diplomat edi”, — deyiladi xabarda.
TIV diplomatning O‘zbekiston va Koreya Respublikasi o‘rtasidagi hamkorlikni rivojlantirishga qo‘shgan ulkan hissasini qayd etdi: “Uning ko‘p yillik faoliyati O‘zbekiston-Janubiy Koreya aloqalarini mustahkamlashda o‘chmas iz qoldirdi”.
Vitaliy Fen “Fidokorona xizmatlari uchun” va “Mehnat shuhrati”, shuningdek, Janubiy Koreyaning “Gvangxva” ordenlari bilan taqdirlangan. 2005-yilda u Seulning faxriy fuqarosi unvoni bilan taqdirlangan.
Yaqinda Janubiy Koreya prezidenti Yun Sok Yol davlat tashrifi bilan O‘zbekistonda bo‘ldi. Vitaliy Fen tashrifga tayyorgarlikda faol ishtirok etdi va tashrif davomida O‘zbekistonda bo‘lgandi.
Biografiya
Vitaliy Fen 1947-yilda Toshkent viloyatida tug‘ilgan. Marg‘ilondagi rejalashtirish va iqtisod texnikumini (1966) va Farg‘ona davlat pedagogika institutini (1973) tugatgan. 1966−1967-yillarda harbiy xizmatni o‘tagan.
1975−1981-yillarda Farg‘ona shahridagi oliy sport maktabi direktori, 1981−1983-yillarda Farg‘ona viloyati jismoniy tarbiya va sport qo‘mitasi raisi lavozimida ishlagan. 1983−1989-yillarda O‘zbekiston Jismoniy tarbiya va sport davlat qo‘mitasi raisi o‘rinbosari, 1989−1995-yillarda Farg‘ona viloyati hokimi o‘rinbosari lavozimida faoliyat yuritgan.
1995−1999-yillarda O‘zbekistonning Koreya Respublikasidagi Muvaqqat ishlar vakili lavozimida ishlagan. 1999−2013-yillarda O‘zbekistonning Koreya Respublikasidagi elchisi bo‘lgan. 2017-yilda u yana Seuldagi elchi lavozimini egallagandi.
