«Газета.uz» Ўзбекистон футбол ассоциацияси (ЎФА) ва Миллий олимпия қўмитаси билан ҳамкорликда футбол бўйича Ўзбекистон олимпия терма жамоасининг Париж ўйинларигача бўлган йўли тўғрисида ҳужжатли фильм суратга олинаётгани ҳақида хабар берди. Бу Олимпиадада Марказий Осиё футбол жамоаси иштирок этаётган биринчи ҳолатдир.
«Ўзбекистон олимпия терма жамоаси Парижга йўлланма олгани — бу тарихий воқеа. Ушбу ҳужжатли фильм орқали бир неча йиллик орзуга эришиш учун қандай йўлдан ўтилгани ва бу натижанинг ортида кимларнинг меҳнати ётгани ҳақида ҳикоя қилинади. Тарихий воқеликни хотирага муҳрлаш ва биз олган сабоқларни келажак авлодга етказиш ғояси билан бизга мурожаат қилган „Газета.uz“ жамоасини қўллаб-қувватладик ва улар билан биргаликда ушбу ҳужжатли фильм устида ишламоқдамиз», — деди ЎФА биринчи вице-президенти Равшан Эрматов.
Фильмни тасвирга олиш ишлари июнь ойида бошланган. Дастлабки босқичда бош мураббий Тимур Кападзе бошчилигидаги футболчиларнинг Тошкентдаги йиғини тасвирга олинди ва бир қатор интервьюлар ўтказилди. Тўлиқ метражли фильмда ўйинлар хроникаси, архив лавҳалар, шунингдек, терма жамоанинг тайёргарлик жараёни, футболчилар, бош мураббий ва мухлислар билан интервьюлар ёритилади. Лойиҳа жамоаси минтақа футболи учун тарихий бўлган воқеликни ҳужжатлаштириш, ўзбек халқи севадиган спорт турининг «саҳна орти»ни кўрсатиш ҳамда ёшларни янги спорт ютуқлари ва соғлом турмуш тарзига руҳлантиришни мақсад қилган.
«Бу ўзбек ва Марказий Осиё футболи оламида олимпия терма жамоаси минтақадаги барча мухлисларга орзуларини — Олимпиадада ўз юртини қўллаб-қувватлаш имкониятини тақдим этаётган биринчи прецедент ҳисобланади. Жамоамиз футболчиларни ўйинга тайёрлашнинг барча босқичлари, Парижга жўнаб кетиш арафасидаги ўртоқлик ўйинлари, бэкстейжни ёритиш учун аккредитациядан ўтган. Умид қиламизки, ҳамкорларимиз кўмагида биз ҳам жамоамизнинг турнир давомидаги ҳар бир ўйинини ёритиб борамиз. „Газета.uz“ жамоаси учун бу ҳужжатли фильм ўзига хос тадқиқотдир. Ўйинчилар, мураббийлар, ходимлар ва бутун ЎФА тизими учун бу ютуқнинг асосий омили нима бўлди, деган саволга жавоб топмоқчимиз» — деди «Газета.uz» директори Давлат Умаров.
Ҳужжатли фильм ўйинчилар, мураббийлар, ходимлар, мухлислар ва оила аъзоларининг кўпинча кадр ортида қолиб кетадиган, аммо спортчининг муваффақиятида ҳал қилувчи роль ўйнайдиган ҳикоялари орқали муҳим омилларни очишга ҳаракат қилади.
Фильм премьераси 2024 йилнинг кузига мўлжалланган.
