Тошкент шаҳри ҳокимлиги Рақамли ривожланиш департаменти шаҳарнинг 16 та анимацион мозаикасидан иборат янги видеороликни эълон қилди. Биринчи видео 30 апрель куни эълон қилинган ва энг машҳур 13 та панелни ўз ичига олганди.
Иккала видеоролик ҳам «Тошкент мозаикалари» лойиҳасининг бир қисмидир. Унинг яратувчилари — Тошкент шаҳри ҳокимлиги ҳузуридаги Рақамли ривожланиш департаменти ҳамда Маданият ва санъатни ривожлантириш жамғармаси монументал санъат ёдгорликлари сифатида моддий маданий мероснинг кўчмас мулк объектлари рўйхатига киритилган мозаика ва мозаик панноларни муҳофаза қилиш соҳасидаги фаолиятини давом эттирмоқда.
Кампанияни ахборот билан таъминлаш мақсадида Тошкент шаҳри ҳокимлиги mosaic.tashkent.uz онлайн платформасини ишга туширди, унда объектларнинг онлайн каталоги, «Калейдоскоп» функциялари ва смартфон иловаси (iOS, Android, Huawei) ёрдамида мозаикани жонлантириш учун АR-сканер мавжуд.
Бугунги кунга келиб, дастур саккизта мозаикани «жонлантириш» имконини беради. Тез кунларда янгилангандан сўнг яна еттитаси мавжуд бўлади.
«Илова мозаикани кенгайтирилган реаллик учун маркер сифатида кўради. Анимацияда барча панелларни тўғри масофадан ва тўғри бурчакдан ўқиб бўлмайди, шунинг учун „жонлантириш“ учун мавжуд бўлган мозаикалар сони чекланган», — тушунтирди Рақамли ривожланиш департаменти директори Алексей Хен.
Янги видеороликни яратиш учун Тошкент ҳокимлиги саккизта янги объектда қўшимча суратга олиш ишларини олиб борди ва маҳаллий дижей King Macarella`нинг янги саундтрекидан фойдаланди. Биринчи видеода яна саккизта мозаика пайдо бўлди.
Алексей Хеннинг сўзларига кўра, «Тошкент мозаикалари» лойиҳаси жамоаси объектларнинг онлайн каталогини кенгайтиришда давом этмоқда. Платформа ишга туширилганда сайтда 334 та мозаика ҳақида маълумот мавжуд бўлган бўлса, бугунги кунда уларнинг сони 390 тага етган (улардан 15 таси йўқолган). Каталог яна 50 та объект билан тўлдирилиши кутилмоқда.
«Маълумотнома Гиннеснинг рекордлар китоби комиссиясига Тошкентни дунёдаги энг „мозаик“ шаҳар сифатида тан олиш учун ариза топшириш мақсадида кенгайтирилмоқда», — деди Алексей Хен.
Каталог турар жой ва нотурар биноларнинг жабҳаси ва четидаги ҳар иккала ташқи панеллар, шунингдек, ички панеллар, жумладан, Тошкент метросидаги мозаикалар билан тўлдирилган. Бундан ташқари, рўйхатга алоҳида ажратилган объектлар кирган. Масалан, «Ўзэкспомарказ» кўргазма мажмуаси павильонларидан бирининг фасадидаги «Тўй» панноси. Асар 1970 йилда ўзбек рассоми Дилмурод Юсупов томонидан яратилган.
Фото: Кирилл Цибенко. Манба: mosaic.tashkent.uz.
Аввалроқ Тошкент ҳокимлиги турар жой биноларининг фасад ва четидаги барча мозаик паннолар ташқи рекламадан озод этилгани ҳақида хабар берган эди. Рақамли ривожланиш департаменти ходимларининг таъкидлашича, айрим ишлар вентиляция қувурлари билан тўсиб қўйилган ва шикастланган. Мазкур объектларни реставрация қилиш «Тошкент мозаикалари» жамоасининг панноларни ҳимоя қилиш бўйича олиб бораётган ишларининг навбатдаги босқичидир, деб хабар берди «Газета.uz»га Маданият ва санъатни ривожлантириш жамғармаси матбуот хизмати.
«Биз ҳозирда реставрация ишларини олиб бора оладиган мутахассисларни қидирмоқдамиз», — дея қўшимча қилди матбуот хизмати.
