Андижон вилоятининг Асака шаҳрида 17 июль оқшомида 28 ёшли аёл ўз жонига қасд қилган.

Уч фарзанднинг онаси бўлган аёл ўлими олдидан қолдирган овозли хабарида онлайн қиморда қарз бўлиб қолгани, 15 миллион сўмлик қарзни тўлай олмаслиги, қарзни тўлаган тақдирда ҳам бунинг ортидан келадиган таъна-дашномларга чидай олмаслиги, шу сабабдан ўзини уйи яқинидан оқиб ўтувчи сойга ташлашга қарор қилганини айтиб, яқинларидан рози-ризолик сўраган.

Ўзбекистонда йирик миқдордаги пулни қиморга бой бергани ортидан эркакларнинг ўз жонига қасд қилгани билан боғлиқ бир неча ҳолат маълум, бироқ аёл кишининг бу сабабдан ўз жонига қасд қилиши илк маротаба кузатилмоқда.

Ўзбекистонда Youtube “нормал тартиб”да ишлаяпти, видеохостинг ишида узилишлар кузатилаётгани йўқ. Бу ҳақда Spot нашрига Рақамли технологиялар вазирлиги матбуот котиби Шерзод Аҳматов маълум қилган.

Вазирлик мулозими Россияда видеохостинг секинлагани билан боғлиқ вазият Ўзбекистонда “мутлақо акс этмаслиги”ни билдирган.

“Агар Youtube бир мамлакатда секинлашса, бу унинг Ўзбекистонда ҳам секинлашишини англатмайди, яъни у битта мамлакатга боғланган эмас”, деган Шерзод Аҳматов.

Аввалроқ ижтимоий тармоқларда фойдаланувчилар сўнгги кунларда Ўзбекистонда Youtube видеохостинги ишида секинлашув кузатилаётгани ҳақида шикоят қила бошлашган. Бунинг ортидан бошланган муҳокамаларда Youtube’дан видеоролик юклаб олишда секинлашув десктоп версияларда кузатилаётгани, мобил версияларда муаммо йўқлиги ҳақида ёзишган.

Ўзбекистонда YouTube видеохостинги секинлашганига оид иддаони “Ўзбектелеком” матбуот котиби Тимур Мамажонов ҳам рад этган.

“Ҳозирги пайтда “Ўзбектелеком” акциядорлик ширкати (UZTELECOM бренди) томонидан кўрсатилаётган телекоммуникацион хизматларнинг барчаси одатдаги тартибда кўрсатилмоқда. Ҳеч қандай чеклов йўқ”, деган мулозим Kun.uz нашрига.

Ўзбекистонда YouTube секинлашиб қолганига оид иддао аввалроқ Россия Давлат думаси депутати Александр Хинштейн кейинги ҳафта охирига бориб мамлакат ҳудудида YouTube видеохостингида видео юклаш тезлиги 70 фоизга пасайишини эълон қилгани ортидан пайдо бўлди. Хинштейн бу қадамни видеохостингнинг “аксилроссия сиёсати” сабаб бўлганини билдирган. Депутатга кўра, чеклов чоралари видеохостингнинг десктоп версиясигагина тааллуқли бўлади, мобил версияга дахл қилинмайди.

Россия ҳудудида видеохостинг ишидаги илк узилишлар ҳақида илк бор 11 июль куни хабар берилган эди. Ўшанда “Ростелеком” ширкати “Google ширкатига тегишли бўлган жиҳозлар ишида техник муаммолар” мавжудлигига оид хабарнома ёйинлаган. Бунинг ортидан “Медуза” нашрининг телекоммуникация соҳасидаги манбаси Россияда расмийлар YouTube ишини чеклашни бошлаган бўлиши мумкинлигини билдирган.

Осиё тараққиёт банки (ОТБ) Ўзбекистон Ҳукуматининг мамлакат молия бозорларини мустаҳкамлаш ва барқарор бозорга йўналтирилган энергетика секторини ривожлантириш бўйича ташаббусларини қўллаб-қувватлаш учун умумий қиймати 400 миллион АҚШ доллари бўлган иккита қарзни маъқуллаган. Бу ҳақда ОТБ матбуот хизмати маълумот тарқатди.

Банк қайдича, ОТБнинг Марказий ва Ғарбий Осиё бўйича бош директори Евгений Жуков хусусий секторнинг фаол иштироки Ўзбекистоннинг иқтисодий ўсиши ва трансформацияси учун жуда муҳим аҳамиятга эгалигини урғулаган.

“Ушбу дастурлар қўллаб-қувватлайдиган ислоҳотлар тартибга солувчи органлар ва компаниялар учун барқарор ички молиявий бозорларни яратиш ва иқлим ўзгариши масалаларини ҳал қилган ҳолда энергияга бўлган эҳтиёжларини қондириш орқали ривожланишни рағбатлантиришда ўз ролини ўйнаши учун қулай муҳит яратишга ёрдам беради”, деган ОТБ масъули.

Хабарномада "Энергетика секторини ислоҳ қилиш дастури"нинг 2-кичик дастури учун ажратиладиган 300 миллион АҚШ доллари миқдоридаги қарз хусусий сектор инвестицияларини рағбатлантириш ва молиявий барқарорликни ошириш мақсадида энергетика секторининг тузилиши, ҳуқуқий-меъёрий базаси ва бошқарувини такомиллаштиришга қаратилган сиёсат чораларини амалга ошириш учун бюджет ёрдамини тақдим этиши айтилган.

"Молия бозорларини ривожлантириш дастури"нинг 2-кичик дастури учун ажратиладиган 100 миллион АҚШ доллар миқдоридаги қарз эса, ОТБ вакилларига кўра, молиявий операциялар ва хизматларни оптималлаштириш учун бозор шароитларини яхшилашга, шунингдек, Ўзбекистоннинг капитал ва пул бозорлари ўсиши учун талаб ва таклифни тартибга солишга қаратилган регулятор ва институционал ислоҳотларни қўллаб-қувватлашга қаратилган.

Банк хабарномасида ОТБ Ўзбекистонга 400 миллион долларлик қарзни қандай шартлар асосида ажратгани очиқланган эмас.

Ўзбекистон Осиё тараққиёт банкига 1995 йилда аъзо бўлган. Ўтган қарийб 30 йил давомида банк мамлакатга 12.5 миллиард АҚШ доллари миқдорида қарз, грант ва техник кўмак тақдим этган.

Ўзбекистон президенти Шавкат Мирзиёев 7-8 август кунлари Қозоғистонга давлат ташрифини амалга оширади. Бу ҳақда Қозоғистон президенти матбуот хизмати маълумот тарқатди.

Хабарномада Мирзиёевнинг Қозоғистонга ташрифи кун тартибидан қандай тадбирлар ўрин олгани очиқланган эмас.

Шавкат Мирзиёев Қозоғистонга сўнгги давлат ташрифини 2021 йил охирида амалга оширган эди.

Келаётган август ойида Қозоғистон пойтахтида Марказий Осиё давлат раҳбарларининг олтинчи маслаҳат учрашуви ҳам бўлиб ўтиши кутилмоқда.

Россияда беш ой мобайнида қулликда сақланган жиззахлик аёл асоратдан қутулиб, ватанига қайтишга муваффақ бўлди. Бу ҳақда Ўзбекистон омбудсмани матбуот хизмати маълумот тарқатди.

Қайд этилишича, Россияда қулликка тушиб қолган аёлни Ўзбекистонга қайтариш бўйича саъй-ҳаракатлар фуқаро Ф.Л. томонидан омбудсманнинг Жиззах вилоятидаги минтақавий вакилига ёрдам сўраб мурожаат қилгани ортидан бошланган.

Мурожаатчи Ф. Л. ўз синглиси Ф. С. 2024 йилнинг январь ойида фуқаро Д. О. томонидан алдов йўли билан Россияга ишлаш учун олиб кетилгани, унинг паспорти рўйхатга қўйиш важи билан олиб қўйилиб, 5 ой давомида катта далада мажбурлаб ишлатилганини билдирган.

Пировардида асоратда сақланган жиззахлик аёл Самара шаҳрига қочишга муваффақ бўлган, аммо Ўзбекистонга қайтиб келишга имкон тополмаган.

Омбудсман хабарномасида Республика “Истиқболли авлод” ННТ Жиззах вилоят бўлими билан ҳамкорликда кўрилган чора-тадбирлар ортидан “фуқаро Ф.С. жорий йилнинг 27 июль куни Ўзбекистонга қайтариб олиб келингани”, “ҳозирда у оиласи бағрида” экани қўшимча қилинган.

Самарқанд вилоятининг Оқдарё туманида ноқонуний йўллар орқали хорижга йўллаш ваъдаси билан одамлардан алдаб, пул олган киши қўлга олинган. Бу ҳақда Ўзбекистон Бош прокуратураси ҳузуридаги Иқтисодий жиноятларга қарши курашиш департаменти маълумот тарқатди.

Хабарномада БП ҳузуридаги департаментнинг Оқдарё туман бўлими ва ИИБ ходимлари ҳамкорлигида ўтказилган тезкор тадбирда фуқаролар Э.Х. ва Б.Б.нинг ишончига кириб, уларни Англияга ишга юбориш эвазига 4 500 АҚШ долларини фирибгарлик йўли билан қўлга киритган фуқаро В.И. 1,2 миллион сўм ва 700 АҚШ долларини қайтариб берган вақтида ашёвий далиллар билан ушлангани айтилган.

Шунингдек, терговга қадар текширув давомида фуқаро В.И. 47 нафар фуқарони алдаб, чет давлатларга ишга юбориши эвазига жами 37 минг 160 АҚШ долларини фирибгарлик йўли билан қўлга киритганлиги аниқланган.

Навоий вилоятида ўтказилган тадбирда эса фуқаро Р.Д. фуқаро А.Ф.ни Жанубий Кореяга яшаш ва ишлаш учун жўнатиши ҳамда виза ҳужжатларини тайёрлаб бериши эвазига “фирибгарлик йўли билан 4 000 АҚШ долларини олган вақтида ашёвий далиллар билан ушланган”и айтилган.

“Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда”, дейилган департамент хабарномасида.

Жорий йилнинг 26 июлидан Фарғона вилояти божхона бошқармасининг “Фарғона” чегара божхона пости ҳамда Шоҳимардонга кириш қисмида жойлашган “Оққия” божхона маскани туну кун ишлаш режимига ўтказилган. Ўзбекистон Давлат божхона қўмитаси матбуот хизмати маълумот тарқатди.

Қайд этилишича, икки давлат чегарасида жойлашган чегара божхона постларидан самарали фойдаланишга доир келишувга Қирғизистон президенти Садир Жапаровнинг 18-19 июль кунлари Ўзбекистонга давлат ташрифи доирасида эришилган эди.

Президентлар келишуви ортидан Ўзбекистон ва Қирғизистон божхона ҳамда чегара хизмати раҳбарлари Фарғона вилоятидаги чегара-божхона постлари фаолиятини биргаликда кўздан кечириб, янги божхона постларини ташкил этиш ва мавжудларидан самарали фойдаланиш, божхона постларида тирбандликларнинг олдини олиш борасида мавжуд имкониятларни таҳлил қилишган. Пировардида божхона масканлари 24 соатлик иш тартибига ўтган.

“Эндиликда Шоҳимардонга дам олгани бораётган фуқаролар ушбу божхона объектлари орқали исталган вақтда ҳаракатланиш имкониятига эга бўлдилар”, дейилган божхона қўмитаси хабарномасида.

“Водил чинори” халқ дорбозлик жамоаси бадиий раҳбари Турсунали Мамажонов 28 июль куни 75 ёшида вафот этди. Бу ҳақда Маданият вазирлиги матбуот хизмати маълумот тарқатди.

Маълумотларга кўра, халқ орасида Турсунали полвон номи билан танилган марҳумнинг дафн маросими якшанба куни ўзи туғилиб ўсган “Водил” қишлоғида ўтказилган.

1949 йили Фарғона вилоятида туғилган, умрининг кўп йилларини Ўзбекистоннинг турли жойларида (асосан Шоҳимардонда) полвонлик ва дорбозлик томошаларини кўрсатиш билан ўтказган Турсунали полвоннинг Фарғона вилояти ҳайвонот боғи ташаббускори ҳамда фахрий эколог бўлгани айтилади.

Ўтган асрнинг 80-йиллари охири ва 90-йиллари бошида мухолифатдаги “Бирлик” ҳаракати ва “Эрк” партиясининг фаол аъзоси бўлган Турсунали Мамажоновга аввалги президент Ислом Каримов даврида узоқ йиллар давомида “ўгай”ларча муносабатда бўлинган.

Кейинги йилларда расмийлар билан муносабати тузалган Турсунали Мамажонов 1-даражали “Меҳнат фахрийси” кўкрак нишони ҳамда “Ўзбекистон Республикасида хизмат кўрсатган маданият ходими” фахрий унвони билан тақдирланган эди.

Ўзбекистон президенти Шавкат Мирзиёев 28 июль оқшомида Парижда ўтаётган ёзги Олимпия ўйинларида чемпионликни қўлга киритган Диёра Келдиёрова билан телефон орқали мулоқот қилган.

Президент матбуот хизмати маълумотига кўра, Мирзиёев Ўзбекистон тарихида ёзги Олимпия ўйинларида аёллар ўртасида биринчи марта чемпион бўлган Келдиёровани тарихий ғалаба билан қизғин табриклаб, ота-онаси ва мураббийларига миннатдорлик билдирган.

Самарқандлик Диёра Келдиёрова ёзги Олимпия ўйинларида дзюдо бўйича беллашувларнинг 52 килограммгача вазн тоифасида барча рақибаларини енгиб, Ўзбекистон терма жамоаси таркибида илк олтин медалга эга бўлган.

Финал баҳсида у 2020 йилги Олимпиада чемпиони косоволик Дистриа Красника устидан ғалаба қозониб, чемпионлик шоҳсупасига чиқишга муваффақ бўлган.

Ўзбекистон Олий Мажлисининг Қонунчилик палатаси ҳамда маҳаллий кенгашлар депутатлари сайлови жорий йилнинг 27 октябрь куни ўтказилади. Бунга оид қарор Марказий сайлов комиссиясининг 26 июль куни бўлиб ўтган мажлисида қабул қилинди.

МСК хабарномасида сайлов куни Ўзбекистон Конституциясининг 128-моддаси ва Сайлов кодексининг 14, 36-моддаларига мувофиқ белгилангани қайд этилган.

“Марказий сайлов комиссияси томонидан Ўзбекистон Республикаси Конституцияси ва Сайлов кодексида белгиланган муддатлардан келиб чиқиб, бугундан, яъни 2024 йил 26 июлдан Ўзбекистон Республикаси Қонунчилик палатаси депутатлари ва маҳаллий кенгашлар депутатлари сайлови бўйича сайлов кампаниясига старт берилиб, Календарь режа тасдиқланди”, дейилган хабарномада.

Шу тариқа Олий Мажлис Қонунчилик палатаси, Халқ депутатлари вилоятлар ва Тошкент шаҳар кенгашлари, Халқ депутатлари туман ва шаҳар кенгашларига сайловлар октябрь ойининг сўнгги якшанбасида бўлиб ўтиши кутилмоқда.

Ўзбекистонда парламент қуйи палатаси ва маҳаллий депутатлари сайлови шу йил октябрида бўлиб ўтишига бундан ўн кун муқаддам Россиянинг Санкт-Петербург шаҳрига борган ўзбекистонлик депутатлар ишора қилишган эди. Ўшанда Сенат раиси Танзила Норбаева бошчилигидаги Ўзбекистон парламенти делегацияси МДҲ Парламентлараро ассамблеяси халқаро кузатувчиларини жорий йилнинг октябрь ойида Ўзбекистонда бўлиб ўтадиган сайловларни кузатишга таклиф қилишган.

Бунгача Ўзбекистонда келаётган кузда парламент ва маҳаллий кенгашларга сайлов ўтказилиши МСК томонидан ҳам, бошқа бир ваколатли идора томонидан ҳам расман тасдиқланган эмас.

Президент Шавкат Мирзиёев ўтган йил 6 мартида сиёсий партиялар ролини ошириш учун - мажоритар ва пропорционал сайлов тизимига ўтишни таклиф қилган.

Ушбу таклиф асосида 2023 йилнинг 18 декабрь куни “Ўзбекистон Республикасининг айрим қонун ҳужжатларига сайлов ва референдум ўтказиш тартибини янада такомиллаштиришга қаратилган ўзгартириш ва қўшимчалар киритиш тўғрисида”ги қонун қабул қилинган.

Ҳужжатга мувофиқ, бундан буён парламентдаги 150 ўриннинг ярми - пропорционал шаклда - партиявий рўйхатлар билан, ярми - мажоритар тизимда - номзодларга овоз бериш йўли билан тақсимланиши лозим.

Жорий йилнинг 25 июль куни Фарғона вилоятининг Фарғона тумани ҳудудида шиддатли жала ва дўл ҳодисалари кузатилган. Бу ҳақда Гидрометеорология хизмати агентлиги маълумот тарқатди.

Ўзбекистонлик метеорологлар қайдича, пайшанба куни Фарғона тумани Шоҳимардон МФЙ ҳудудида жойлашган Қуркул сел йўлида соат 15:30 да секундига 1,5-2 метр кублик сел оқимлари вужудга келган, бироқ оқим аҳоли ва ҳудудларга зарар етказган эмас.

Айни пайтда Фарғона тумани Шоҳимардон қишлоғи тоғ-адирликларида соат 15:30 да жала ёмғир ва дўл ёғиши натижасида секундига 4-5 метр кублик сел оқимлари вужудга келган, бунинг натижасида қишлоқ врачлик пункти ҳовлиси ҳамда маҳалли аҳоли вакилларига қарашли тўртта ҳовли-жой қум-шағал билан тўлган.

“Ўзгидромет” вакиллари 25 июль куни Фарғона тумани Ёрдон МФЙ ҳудудида жойлашган Букан сел йўлида ҳам соат 15:30 да секундига 1,5-2 метр кублик сел оқимлари вужудга келгани, бундан аҳоли ва ҳудудларга зарар етмаганини маълум қилишган.

Хабарномада айни пайтда Фавқулодда вазиятлар вазирлиги ходимлари ҳудудда тозалаш ишларини олиб боришаётгани, аҳоли орасида жабрланганлар йўқлиги қўшимча қилинган.

Аввалроқ Гидрометеорология хизмати агентлиги 23-26 июль кунлари кутилаётган ёғин-сочин Ўзбекистоннинг тўртта вилоятида сел-сув тошқини ҳодисаларига сабаб бўлиши мумкинлиги ҳақида огоҳлантирган эди. Сел кутилаётган ҳудудлар орасида Фарғона вилоятининг Фарғона тумани ҳам бўлган.

Ўзбекистон Марказий банки бошқаруви асосий ставкани 0,5 фоизга пасайтириб, йиллик 13,5 фоиз даражасида белгилаш тўғрисида қарор қабул қилган.

МБ қайдича, июнь ойида умумий инфляция йиллик 10,6 фоиз даражасида шаклланиб, инфляциянинг барқарор компонентлари ва мева-сабзавотлар нархларида сезиларли пасайиш кузатилган, ташқи бозорлардаги нархлар динамикаси ҳам импорт инфляциясига пасайтирувчи таъсир кўрсатишда давом этяпти.

“Шунингдек, озиқ-овқат товарлари инфляциясининг пасайиши ҳамда алмашув курси барқарорлиги аҳолининг инфляцион кутилмаларига ижобий таъсир кўрсатиб, июнь ойида сезиларли пасайишига олиб келди. Бу эса кутилмалар томонидан инфляцияга босимларни пасайиб боришига шароит яратади”, дейилган Марказий банк хабарномасида.

МБ асосий ставкани сўнгги бор 2023 йилнинг март ойида ўзгартирган, ўшанда ставка 15 фоиздан 14 фоизга пасайтирилган эди.

Айни пайтда МБ раиси Мамаризо Нурмуродов пайшанба куни Тошкентда ўтказилган анжуманида асосий ставканинг ярим фоизга пасайтирилиши “пул-кредит шароитларининг қатъийлик даражасига сезиларли таъсир кўрсатмаслиги”ни таъкидлаган.

Мулозимга кўра, 2025 йилнинг май ойиигача нисбатан юқори даражадаги инфляция (9 фоизгача) сақланиб қолади, шунинг учун регулятор пул-кредит сиёсатини юмшатишга ўтяпти, деб бўлмайди.

“Агар вазият биз кутгандан яхшироқ бўлса, биз асосий ставкани кўриб чиқишга тайёрмиз. Бироқ ҳозир бундай тенденция бошланди, деб айта олмаймиз”, деган Марказий банк раиси.

Польшада украиналик икки ўсмирга пичоқ билан ҳужум қилганликда гумонланган ўзбекистонлик Машҳурбек Козимжонов ҳибсдан озод қилинган. Бу ҳақда Ўзбекистоннинг Польшадаги элчихонаси маълумот тарқатди.

Элчихона матбуот хизмати қайдича, 26 ёшли ўзбекистонлик йигит Бродненск боғида содир бўлган ҳолат юзасидан Варшава полициясига жабрланувчи сифатида кўрсатма берган.

Аввалроқ Польшанинг Wyborcza нашри пойтахтдаги боғлардан бирида ўзбекистонлик йигит украиналик ўсмирларга пичоқ билан ҳужум қилиб, уларга шикаст етказгани ҳақида хабар қилган эди.

Ўзбекистоннинг Польшадаги элчихонаси томонидан ёйинланган видеода Машҳурбек Козимжоновнинг ўзи уч-тўрт нафар украиналик унга ҳужум қилгани, у эса ўзини ҳимоя қилиш чоғида украиналиклардан бирига қаттиқроқ шикаст етказгани, бунинг ортидан унга қарши жиноят иши қўзғатилгани ҳақида айтган ва иш ойдинлатилишида ёрдам кўрсатгани учун ўзбек дипломатларига миннатдорлик билдирган.

Статистика агентлиги ҳисоботига кўра, Ўзбекистон жорий йилнинг июнь ойида хорижга 181,5 миллион долларлик газ сотган. Бу ўтган йилнинг шу даврига нисбатан 2,4 баравар, жорий йилнинг май ойига нисбатан эса 24 баравар кўп.

Агентлик ҳисоботидан келиб чиқилса, ўтган ярим йил ичида Ўзбекистон хорижга 241,4 миллион долларлик газ экспорт қилган. Хусусан, январь ойида чет ўлкаларга 21 миллион долларлик, февраль ойида 5,7 миллион долларлик, март ойида 18,7 миллион долларлик, апрель ойида 6,9 миллион долларлик, май ойида эса 7,6 миллион долларлик газ сотилган.

Аввалроқ ХХР Бош божхона бошқармаси Ўзбекистондан йил бошидан буён қарийб 235 миллион долларлик газ импорт қилингани ҳақида маълум қилган эди. Хитойдан ташқари Ўзбекистон Қирғизистон билан Тожикистонга ҳам газ етказиб беряпти.

Айни пайтда, Статистика агентлиги қайдича, жорий йилнинг январь-апрель ойларида Ўзбекистон хориждан 809,5 миллион долларлик газ импорт қилган. Бу 2023 йилнинг шу давридаги кўрсаткичга нисбатан тўрт баравар кўпдир.

Жорий йилнинг январь-июнь ойларида Ўзбекистон хорижга 4,2 миллиард долларлик олтин сотган. Бу ҳақда Статистика агентлигининг биринчи ярим йилликдаги Ташқи савдо айланмасига оид ҳисоботида айтилган.

Агентлик ҳисоботидан келиб чиқилса, мамлакатнинг олтин экспорти ўтган йилнинг шу даврига нисбатан 4,1 фоизга камайган.

Аввалроқ Озодлик Жаҳон олтин кенгаши (World Gold Council) маълумотига таянган ҳолда, 2024 йилнинг апрель ва май ойларида Ўзбекистон хорижга олтин экспортини кескин камайтириб, бор-йўғи 1 тонна олтин сотгани ҳақида хабар қилган эди.

Бу мамлакатнинг жорий йил февраль ва март ойларида хорижга сотган олтини миқдоридан 23 баравар кам – биринчи чоракда Ўзбекистон чет давлатларга 23 тонна олтин экспорт қилиб, дунёда энг кўп олтин сотган мамлакатга айланган эди.

Ўзбекистон 2023 йилда ҳам жами 25 тонна олтин сотган, шу тариқа дунёда энг кўп олтин экспорт қилган мамлакатлар орасида иккинчи ўринни эгаллаганди.