Suoma searvvuš eallá dál eahpesihkkaris dilis ja olbmot smihttet, mii leat Suoma boahtteáigi. Eahpesihkkaris dovddut bohtet oidnosii maiddái anárlaččaid jearahallamiin, maid Yle Sápmi gieskat dagai.
Jearahallamat laktásit tv-prográmmaráidui, mas čielggadedje, mii lea suopmelašvuođa váimmus.
Stuorra bearraša eadni váillaha sámemánáide oahppogirjjiid ja lagabui doavttirbálvalusaid
Guđa máná eadni Henna Tervaniemi ássá bearrašiinnis Anárjávregáttis Anáris. Son dovdá, ahte sin bearaš birge bures.
Tervaniemi smiehtada goittotge lagamušaid ja bearraša olggobeale olbmuid, de aivve buohkain ii leat seammá buorre dilli go sis.
Son namuha, ahte Suomas ja eandaliige davvin dásseárvu ii ollašuva dássidit.
– Buohkat eai leat dásseárvosaččat. Dáppe davvin juohkehaš ii fidne nu álkit doavttirbálvalusaid. Ja jus fidne, de oassi dain lea gáiddusin.
Tervaniemi bállá, ahte eandaliige nuoraid ja boarrásut olbmuid buohta gáiddusbálvalusat buktet hástalusaid.
– Gáiddusdoavttir leat hirbmat váttis. Eaige doppe vealttakeahttá čielgga buot áššit, mat galggašedje čielgat. Go doaktáriin lea njunnálaga, ášši leat čielgasut dikšut.
Tervaniemi mielas ovdal dearvvasvuođadikšu doaimmai bures, muhto dál oanehis áiggis dilli lea rievdan fuonit guvlui. Su mielas sivva dasa lea dat, go dán jagi álggus doavttirbálvalusat leat sirdašuvvan Lappi buresveadjinguovlluide ja dat oidno bálvalusaid oažžumis.
Nubbi fuolla sus lea mánáid gielalaš rivttiide.
– Dál smiehtan, ahte sámemánát eai leat dásseárvosaččat suopmelaš mánáiguin, danin go buot ávdnasiid it sáhte lohkat iežas eatnigillii.
Luondu buktá dorvvolašvuođa eallimii
Hilbos Ásllat, Aslak Jomppanen orru Goškanjávregáttis lahka Leammi. Son lea hárjánan bargat ja birget luonddus ja vásiha, ahte ii dárbbaš veahki nu guhká go ieš veadjá buot bargat.
Jomppanen guolásta ja čoaggá murjjiid ja guobbariid vai oažžu borramuša beavdái. Boaldenmuoratge bohtet iežas fámuiguin stobu lusa. Ealáhatbeivviid illun Aslak Jomppanen biepmada bohccuid stobu luhte áiddistis.
– Jus mun áiggun juoga nu bálvalusa fitnet, de nu guhká go mun ieš nagodan johtit daid maŋis, de dallehan mun fitnen daid. In mun eará láhkai gal fitne daid bálvalusaid.
Sávvá barggu ja visttiid
Juha Feodoroff lea eret Čeavetjávrris. Son guhkes áiggi eallán čoahkkebáikkiid olggobealde ja lea maid hárjánan dasa, ahte bálvalusat leat unnán.
Liikká son váillaha muhtin bálvalusaid ruovttugillái.
Son sávvá, ahte buohkaide livčče bargu ja visti gos ássat.
– Anára gielda sáhtášii dahkat eanet ássanvistiid sidjiide, geat fárrejit turismabarguid maŋis Avvilii, dadjá Feodoroff.