Uđđâ anarâškielâ sárnooh, sämitiggevaaljâi anarâš iävtukkâsah já kielâtrauma – taah láá ive 2023 enâmustáá luhhum anarâškielâliih uđđâseh

1. Enâmustáá kiäsuttii uđđâ anarâškielâ sárnooh

Ive 2023 kesimáánu aalgâst Säämi máttááttâskuávdáást valmâštuvvojii vuot love uđđâ anarâškielâ sárnod. Taat anarâškielâlâš uuđâs lâi kiäsuttâm puoh enâmustáá lohheid taan ive. Uđđâsist anarâškielâ uáppeeh Bianca Benini, Jarmo Pyykkö, Kaisa Tikka-Morottaja, Kari Chan já Kaisa-Maria Poikela muštâleh maid sij oppii škovliittâs ääigi.

• Uđđâ anarâškielâ sárnooh áiguh porgâškyettiđ sämikielân, juátkiđ kielâuápuid já sámástiđ aldemuigijn

2. Lohheid kiäsuttii meid sämitiggevaaljâi anarâš iävtukkâsah

Sämitiggevaaljah lijjii čohčuv 2023 já talle väljejii meid uđđâ jesânijd sämitiigán. Nubben enâmustáá luhhum artikkâlist anarâš iävtukkâsah muštâlii maht sij ovdediččii anarâšâi aašijd sämitiggeest já maggaar ohtâvuotâ sist lii anarâškielân. Puoh anarâš iävtukkâsah väljejuvvojii uđđâ sämitiigán, Inka Musta, Leo Aikio, Anu Avaskari, Aslak Pekkala já Anni Koivisto eidusâš jesânin já Marjaana Aikio värijesânin.

• Anarâš iävtukkâsah halijdeh ovdediđ anarâškielâ já eennâmkevttim aašijd sämitiggeest – anarâškielâliih iävtukkâsah láá uccáá

3. Kielâtraumâ kieđâvuššee uuđâs čokkij ennuv lohheid

Kuálmádin enâmustáá luhhum uuđâs muštâlij kielâtraumast. Nuorttâlâš párnáid vuávájum Kielâpiervâlist škoovlân -haahâ ornij ive aalgâst savâstâllâmehidijd kielâtraumast nuorttâlâškielâlâš párnái vaanhimáid. Eehid maŋa uárnejeijeid lâi čielgâs, ete eehid kalga orniđ meid anarâš- já tavesämikielâlij párnái vaanhimáid.

• Kielâtrauma puáhtá leđe soro, ilo já vaje, já tom lii feerim meid Iiris Kangas – ääšist savâstâllâm lii algâttum já toos oro lemin tárbu

4. Sämipárnái vaijeem perustij lohheid taan ive

Lii lukko šoddâđ Sáámán. Niäljádin enâmustáá luhhum artikkâl muštâl pärniäššiváldálii čielgiittâsâst, mon mield sämipárnááh láá luholiih já vajeh pyereest. Aanaar Menišjäävrist ässee Benjamin Mattus šadda luholâžžân tast ko luándu lii alda.

• Sämipárnááh láá luholiih já vajeh pyereest – Benjamin Mattus, 13, šadda luholâžžân tast, ete luándu lii alda

5. Aanaarlii kištočyeigei Kanada mätki kiäsuttij meid

Majemuš enâmustáá luhhum artikkâl muštâl aanaarlijn viiljâin, Piäkká já Elias Tervaniemist kiäh vuolgijn ive aalgâst čuoigâđ kišto Kanadan arktâlâš tälvikištoid vuossâmuu keerdi.

• Piäkká já Elias Tervaniemi čuoigâv Kanada arktâlâš tälvikištoin vuossâmuu keerdi.