Aanaarlâš Essi Morottaja lii Čuovvâd-pargojuávhuinis uážžum Suomâ kulttuur ruttâráájust 90 000 eurod Šuoŋâsuonjâreh-párnáimuusik haavâ várás. Ulmen lii rähtiđ kuulmâ sämikielân párnáid lavluid, nuottâkirje mast láá meid toimâmravvuuh, skiäru já konsertturnee.
Taat lii jotkâ Šuoŋâpiäju-haahân, mon rahtii Unná Junná -rááiđun. Juurdâ vuolgij tast, ko Morottaja halijdij lase párnáid muusik. Sun vuávááškuođij muusik pääihist jieijâs párnáid já talle muštâlij tast Unna Junná -juávkun, mii movtáskij ääšist. Tuon pargo ohtâvuođâst juávkku smietâškuođijd, et taan šiev jurduu puávtáččij ovdediđ val lase.
Čuovvâd-pargojuávkun kuleh Essi Morottaja lasseen Jessika Lampi, Ulpu Mattus-Kumpunen já Anna Lumikivi.
– Mii lep uuccâm suullân ive išeruuđâid taas já tääl uážuim stuorrâ ruttâsume, illood Morottaja.
Morottaja osko, et sist mana aainâs-uv ihe taan hommáást. Sii láá jo ihe tassaaš algâttâm, mut tääl sii pyehtih porgâškyettiđ eenâb, ko lii ruttâ tađe várás. Pargojuávhust motomijn lii máhđulâsvuotâ porgâđ taan homá olespeivipargon.
– Lep jo ovdil álgám smiettâđ uulmijd, uuccâm ovtâspargoskipárijd, misthân lii jo ennuv materiaal, tääl älgip porgâđ tain, et uážžum tom materiaalin, muštâl Morottaja.
Uási materiaalist lii lamaš meid Šuoŋâpiäju-rááiđust, mut meid uđđâ lavluuh láá puátimin. Puoh láá sii jieijâs rähtim pitáh. Motomijd pittáid sii jurgâleh sämikielâst nuubán.
– Láá motomeh tagareh lavluuh, moh láá nuuvt čonnum jieijâs kulttuurân, et taid ep äälgi jurgâliđ, muštâl Morottaja.
Suomâ kulttuurruttârááju lii mieđettâm ohtsis paijeel 30 miljovn euro verd išeruuđâid jieškote-uvlágán projektijd várás. Tast paijeel 183 000 eurod monnii projektáid, main láá sämmiliih mield. Projekteh kyeskih eereeb iärrás kirječälimân, muusikân já arkkitehtuurân.