Pasepeeivi aalgij Arctic Winter Games -tábáhtus Alaskast. Tälvikištoh láá tego arktisii kuávlu algâaalmugnuorâi olympialiih.
Suomâ pel Säämist uásálist taan tove tuše ohtâ kištottâllee, čyeigee Piäkká Tervaniemi. Tervaniemi lii šoddâm Anarist, mutâ jotá tääl valastâllâmluvâttuv Ruávinjaargâst.
Arktisijd tälvikištoid peesih uásálistiđ 13–18-ihásiih nuorah. Taan ahejuávhust aktivliih kištočyeigeeh láá Suomâ pel Säämist uccáá. Tervaniemi tiätá suu lasseen tuše nube aktivlii kištočyeigee, suu viiljâ.
– Tääbbin Suomâ pel Säämist iä lah čyeigeeh, jiem tieđe mondiet toh iä lah perustum čuoigâmist, imâštâl Tervaniemi.
Veikkâ Tervaniemi lii áinoo vyelgee Suomâ pel, te Taažâst já Ruotâst vyelgih skipáreh fáárun. Suu mielâst lii suotâs vyelgiđ tälvikištoid.
– Tobbeen uáiná skipárijd já piäsá kištottâllâđ maaŋgâ riijkkâ čyeigeigijn.
Uásálisteijeemeeri Suomâ pelni oro uccomin ivveest ihán
Taažâst já Ruotâst kiišton vyelgim kiäsut maaŋgâid. Säämi ovdâsteijeeh láá ohtsis masa kyehtlov, čiälgá Säämi valastâllâmlito nettisijđoin.
Čyeigeid väljejeh Säämi miäštárkišto puátusij vuáđuld já jyehi riijkkâ jođetteijeeh väljejeh kištottâlleid. Pyeremuuh peesih uásálistiđ tälvikištoid, muštâl Britt Somby Säämi valastâllâmlittoost.
– Mij ucâlep stuárráb perustume Suomâ pelni. Muu mielâst oro lemin, ete uásálisteijeemeeri Suomâ pelni ucco ivveest ihán.
Taat lii nubbe kerdi, ko Piäkká Tervaniemi vuálgá čuoigâđ kiišton. Moonnâm tove kišto uárnejui Kanada koskâoosijn, já Tervaniemi puovtij pááikán fáárust kulmâ silbâmiitaal. Magarehkin vuárdámušah sust iä lah kiišton taan tove.
Ohtuu ij kuittâg taarbâš mađhâšiđ, ko kiišton vuálgá fáárun meid Tervaniemi välmejeijee Yrjö Portti.
Arctic Winter Games -tábáhtus uárnejuvvoo 10.–16.3.2024. Ohjelmist láá valastâllâm lasseen muusik,tälvikarnivaal já kulttuurgaala.