Buolbmátlaš Andreas Njarga lea iežas sániiguin fástabivdi ja velábá maiddái boaris dego eana. Son leamašan Deatnogáttis nu guhkká go muitá.
– Nu guhkká go bisun ceaggut ja nagodan čuožžut fatnasis ja čuoimmi doallat, geavahan čuoimmi sihke vearjun ja maiddái caggin jos mun dárbbašan dan. Mun gal háliidan bivdit go mus lea varas dat.
Ovtta geasi son ii fitnan Deanu alde. Dat lei go vuosttaš mánná riegádii.
– Na dathan lei lihkku dieđusge, Njarga himiha.
Njarga muitala ahte ruohttasat mat čatnet su Deatnogáddái, leat nu nannosat ahte daidda eai bastte ákšut eaige mohtorsahát.
– Deatnu lea muhtun láhkai dego suotna mii golgá čađa goruda ja fitná váimmus ja sielus, son govvida.
Ja jos geasa nu lei vel eahpečielggas mii sutnje lea dehálaš, de lea albmás t-báidi badjelis mas lohká ”Deatnu”.
”Predáhtorbivdu dego heajos buhtadussan”
Muhtumiidda lea goittotge earenoamaš lossat go ii beasa geavahit Deanu dego agibeaivve dáppe olbmot leat dan geavahan. Eandalit olbmuide geat leat riegádan dán máilbmái čuoibmi gieđas ja geat leat hárjánan borrat luosa 730 geardde jagis.
– Dat gal leamaš lossat eahpitkeahttá, muhto de lea vehá jeđđehussan go beasan bivdit eará guliid. Munhan sáhtán muhtun gudjora, guvžžá goddit, ja dathan maid leat buorit guolit, ja čuovžža ja soavvila, Njarga smiehtada.
Andreas lea maid eamidiinnis Astrid Njarggain movttáskan nu gohčoduvvon predáhtorbivdui, nappo hávggaid bivdit, ja soai leabage juohke hávggas dahkan guollegáhkuid. Andreas oaivvilda goittotge ahte sudno hávgabivddus ii leat ollu mearkkašupmi luossanállái, ja galggašedje leat olbmot geain lea bargun bivdit hávggaid albma firpmiin.
– Jos moai guokte-golbmalogi hávgga godde, dat ii leat go biru čalmmis rihpa, son dadjá.
Ruoššaluosaid bivddii maid diibmá álgogeasi. Leš go danin ahte loahpageasi daid gálgan álgá leat jo oallelágan hommá, dego guorbasamos hávggaidge gálgan.
– Stuorra hávgga bánit leat dego krokodiilabánit, ja dat lea nu issoras bargu, Njarga duikuda.
Suhkan miehterávdnjái ii nuppe dáfus leat nu issoras bargu, de Njarga guovttos áiguba lunddolaččat maid searvat Ellos Deanu sáttasuhkamii, man vuolgga lea Joganjálmmi vuolábealde Roavesavvonis maŋŋebárgga 2.7.2024.
