Anna Näkkäläjärvi-Länsman ja Niillas Holmberg almmustahtiiga ođđa luohteskearruid Ijahis idja -festiválas. Näkkäläjärvi-Länsman lea ovttastahttán suopmelaš árbevirolaš gándila ja elektrovnnalaš musihka luohtái. Holmbergges lea ohcalan luođi duohkái árbevirolaš luonddu jienaid.
Holmberg muitala, ahte soai leaba Pekka Aikioin ohcan nu lunddolaš jietnamáilmmi luohtái go vejolaš. Luođit lea Holmberg dološ sogaluođit.
– Skearrus ii leat olláge čuojahuvvon duogášmusihkka. Moai letne Bávlosa Beahkáin fitnan Buolbmátjotoivožis fatnasis báddemin. Mun sugan fatnasa ja juoiggan iežan máttuid.
Holmberg dadjá eanet ja eanet juoigagoahtán iežas soga luđiid. Son ii leat dađi eanet hutkan dahje plánen, jietnamáilbmi luđiid birra dušše šattai lunddolaččat eallinbirrasis. Luđiid duogážis lottit civket, rievssahat skeiket ja guoika šávvá.
– Fanas, skolkkas ja šloŋka. Dat jietnamáilbmi lea vehá dego jávkamin min geasseárgabeaivvis. Hálidan dan jietnamáilmmi man nu láhkai gáhttet ja buktit olbmuid beljiide dan.
Jalvvi Niillas almmustahttii vahkuloahpa áigge Luođik-jietnaduoji lassin maid ođđa girji Goatnelle.
Ođđalágan musihkka duogážis ja maid video
Anna Näkkäläjärvi-Länsman skearrus Bálvvosbáiki temán leat sámeeallin, sámiid máilbmigovva ja jurddašanvuohki. Skearru musihkka ovttastahttá juoga mii lea boaris ja juoga mii lea ođđa.
– Das lea mu juoiganjietna ja de lea dat juovkagándil, mii lea maid hui dološ jietna. De dat leat ovttastuvvon hui ođđalágan eletrovnnalaš máilbmái, mii ii leat dakkár maid mii gullat radios. Dat lea eambo dakkár mii govvida sámi luonddu ja vaikko dan dovddu.
Näkkäläjärvi-Länsman lea ovttasbargan skearru musihka vuođul maid videoduoji mediadáiddár Marja Viitahuhtain. Dat leamašan oaidnimis maid Sámemusea Siiddas.
– Dat lea várra earálágan vásáhus guldaleaddjái dahje geahččái, go dat video dieđusge maiddái doalvu jurdagiid iešguđet guovlluide. Mun jáhkán, ahte dat veahkeha guldaleaddji ovttaláhkai beassat mielde dasa.
Divvojuvvon 20.8.2024 diibmu 9.38: Gándila namma divvojuvvon ja sámiid osku divvojuvvon sámiid máilbmigovvan.